ᐅᖃᐅᓰᑦ

"ᐊᑐᙱᒃᑯᑎᒃ ᐱᕙᓪᓕᐊᔪᓂᒃ ᐅᓪᓗᒥ ᐱᐅᓂᖅᓴᒃᑯᑦ ᑐᓴᐅᒪᑎᑦᑎᓂᕐᒧᑦ ᐅᖃᖃᑎᖃᕐᓂᕐᒧᓪᓗ ᐃᓄᖕᓂᒃ, ᑲᓇᑕ, ᓄᓇᕗᑦ, ᓄᓘᔮᒃᓴᐃᓪᓗ ᖁᐊᖅᓵᕐᓇᖅᑐᒦᑉᐳᑦ ᑭᖑᕙᓯᓕᑐᐃᓐᓇᕆᐊᖃᕐᓂᖏᓐᓂᒃ, ᐊᔪᖅᓯᓯᒪᓪᓗᑎᒃ 2000−ᖏᓐᓂ [...] ᓄᓘᔮᖕᓂ ᐱᓕᕆᐊᖑᔪᖅ ᐊᖏᓛᖑᖃᑕᐅᕗᖅ ᐊᔪᖅᓴᙱᓛᖑᓪᓗᓂᓗ ᐅᔭᕋᖕᓂᐊᕐᕕᖕᓂ ᓄᓇᕐᔪᐊᓕᒫᒥ. ᐱᕙᓪᓕᐊᓂᖃᖅᑎᓪᓗᒋᑦ ᑕᐃᒪᓐᓇᑎᒋ ᐊᖏᑎᒋᔪᒥᒃ ᐊᒻᒪᓗ ᐊᖏᔪᒻᒪᕆᖕᒥᒃ ᐊᒃᑐᖅᓯᓂᐅᔪᓂᒃ, ᐱᕕᒃᓴᖃᖅᐳᒍᑦ ᑲᒪᒋᔭᒃᓴᖃᖅᖢᑕᓗ ᓴᖅᑭᑎᑦᑎᓂᕐᒥᒃ ᓄᑖᒥᒃ ᐊᑐᖅᑕᐅᔪᓐᓇᖅᑐᒥᒃ ᑐᓴᖅᑕᐅᔪᒃᓴᓄᑦ ᐊᕐᕌᒍᒋᔭᐅᔪᒧᑦ. ᑖᓐᓇ ᓄᓘᔮᖕᓂ
ᐱᓕᕆᔾᔪᓯᖅ ᑕᑯᑎᑦᑎᔪᓐᓇᖅᐳᖅ ᐊᓯᖏᓐᓂᒃ ᐅᔭᕋᖕᓂᐊᕐᕕᖕᓂ ᐱᓕᕆᕙᓪᓕᐊᓕᖅᑐᓂᒃ ᒫᓐᓇᕈᓗᒃ,ᐊᓯᖏᓐᓂᒡᓗ ᓄᓇᕐᔪᐊᓂᒃ ᐊᔾᔨᑲᓴᖏᓐᓂᒃ ᐊᑲᐅᙱᓕᐅᕈᑎᖃᖅᑐᓂᒃ, ᖃᓄᖅ ᐃᓄᐃᑦ ᐊᒻᒪ ᓄᓘᔮᓕᕆᔨᒃᑯᑦ ᐊᑐᖅᐸᖕᒪᖔᑕ ᒫᓐᓇᓕᓴᕐᓂᒃ ᑐᓴᐅᒪᔪᓕᕆᔾᔪᑎᓂᒃ ᑎᑭᐅᑎᔪᒪᓪᓗᑎᒃ
2000-ᖑᓕᖅᑐᓄᑦ ᒪᓕᒃᑕᐅᕙᒃᑐᓂᒃ ᑐᓴᐅᒪᑎᑕᐅᑦᑎᐊᕐᓗᑎᒃ ᐃᓱᒪᖅᓱᕐᓗᑎᒃ ᐃᓚᐅᖃᑦᑕᕐᓗᑎᒃ ᐃᓄᐃᑦ ᓇᖕᒥᓂᖅ ᐅᖃᐅᓯᖅᐳᑦ ᐊᑐᕐᓗᒋᑦ. ᑖᓐᓇ ᑐᑭᓯᒋᐊᒐᒃᓴᖅ ᑕᑯᒃᓴᐅᑎᑦᑎᔪᓐᓇᖅᐳᖅ ᖃᓄᖅ ᐃᑲᔫᑕᐅᔪᓐᓇᖅᑐᓂᒃ ᐱᕙᓪᓕᐊᑎᑦᑎᓂᖅ ᓈᒻᒪᒍᓐᓇᕐᒪᖔᑦ ᐊᒻᒪ ᐊᔾᔨᒌᒃᑎᑦᑎᔪᓐᓇᕐᒪᖔᑦ; ᖃᓄᖅ
ᑐᒃᓯᕋᐅᑕᐅᔪᓐᓇᕐᒪᖔᑦ, ᕿᒥᕐᕈᔭᐅᔪᓐᓇᕐᒪᖔᑦ, ᐊᖏᖅᑕᐅᔪᓐᓇᕐᒪᖔᑦ, ᓇᐅᑦᑎᖅᓱᖅᑕᐅᔪᓐᓇᕐᒪᖔᑦ, ᐊᒻᒪ ᐊᑐᓕᖅᑎᑕᐅᔪᓐᓇᕐᒪᖔᑦ ᐊᑐᕐᓗᑎᒃ ᐅᓪᓗᒥᐅᓕᖅᑐᖅ ᓯᕗᒃᑲᖅᑕᖅᑎᓂᒃ ᖃᕋᓴᐅᔭᓕᕆᔾᔪᑎᓂᒃ."
ᓴᖅᑲᓕᐊᓯ ᑯᓄᒃ ᐃᑲᔪᕆᐊᕐᓂᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᔫᓂ 8, 2012
 

"ᐄ, ᐃᓄᐃᑦ ᐃᓚᐅᑎᑕᐅᔭᕆᐊᖃᖅᐳᑦ ᒫᓐᓇ ᓯᕗᓂᒃᓴᑦᑎᓐᓂᓗ. ᐄ, ᑐᓴᒐᒃᓴᓕᕆᔨᑦ ᑕᐃᑲᓃᑦᑕᕆᐊᖃᖅᐳᑦ. ᐊᒻᒪᓗ ᖁᕕᐊᓱᒻᒪᕆᑉᐳᖓ ᐃᓱᒪ ᑏᕖᒃᑯᑦ ᓯᕗᓪᓕᖅᐹᖑᒻᒪᑦ ᑐᓴᕋᔅᓴᓕᕆᔨᐅᓪᓗᓂ ᐃᓄᐃᑦ ᑐᓴᐅᒪᑎᑕᐅᖁᓪᓗᒋᑦ. ᐊᒻᒪᓗ ᐃᓄᐃᑦ ᐃᓚᒋᔭᐅᔭᕆᐊᖃᕐᒪᑕ ᖃᓄᐃᓕᐅᖅᐸᓪᓕᐊᔪᓄᑦ
ᓄᓇᕗᒻᒥ.
ᐅᑲᓕᖅ ᐃᔨᑦᓯᐊᖅ, ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ
ᐱᔭᐅᔪᖅ ᑕᕐᕆᔮᒃᓴᒥᑦ ‘ᐊᑖᑕᒪ ᓄᓇᖓ’.

"ᓇᓗᓕᕈᔪᒃᑲᒪ ᖃᐅᔨᓴᖅᑕᐅᓂᖏᓐᓂᒃ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐱᔾᔪᑕᐅᔪᑦ ᐅᕙᓂ. ᑲᓇᑕ, ᑲᓇᑕᐅᑉ ᒐᕙᒪᒃᑯᖏᑦ, ᐊᖏᖅᓯᓯᒪᖕᒪᑕ ᑕᒪᒃᑯᓂᖓ ᓄᓇᕐᔪᐊᓕᒫᒥ ᒪᓕᒃᑕᐅᔭᕆᐊᓕᖕᓂᒃ, ᑭᓯᐊᓂᓕ ᓄᓇᕘᒥ ᐃᓅᓯᖃᕋᑦᑕ ᐊᔾᔨᑲᓴᖏᓐᓂᒃ ᓄᓇᕐᔪᐊᑉ ᓯᓚᑖᓃᑦᑐᓂᒃ. ᑕᐃᒪᐃᑦᑐᒥᒃ ᕿᒥᕐᕈᕕᓰ? ᓄᓇᕘᑦ ᐱᑕᖃᙱᒻᒪᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᔭᕆᐊᖃᖅᑕᑦᑎᓐᓂᒃ, ᓴᓇᕝᕕᐊᓗᐃᑦ ᓱᒃᑲᓕᑎᑕᐅᔪᒪᑎᓪᓗᒋᑦ? ᑕᒪᓐᓇ ᑕᐅᑐᒐᕆᕕᓯᐅᒃ? ᓲᖃᐃᒻᒪ ᑕᒪᓐᓇ ᐊᑲᐅᙱᓕᐅᕈᑕᐅᔪᖅ ᑐᓴᖅᓯᒪᒐᒃᑯ. ᐆᒃᑑᑎᒋᓗᒍ, ᖁᒻᒧᐊᑦᑎᑕᐅᓯᒪᔪᒃᑰᕈᓐᓇᐅᑎᓕᕆᓂᖅ ᒐᕙᒪᒃᑯᑦ ᑲᒪᒋᒻᒪᒍ. ᐊᐱᕆᕕᓯᐅᒃ ᐹᕕᓐᓛᓐᑯᑦ ᐊᑐᖁᓗᒋᑦ ᖁᒻᒧᐊᑦᑎᑕᐅᓯᒪᔪᒃᑰᕈᑎᒥᒃ ᐃᓄᐃᑦ ᑐᓴᐅᒪᖃᑎᒌᒍᓐᓇᕐᓂᐊᕐᒪᑕ ᐃᓚᒥᓄᑦ,ᐅᕝᕙᓘᓐᓃᑦ ᐊᐱᕆᕕᓯᐅᒃ ᐹᕕᓐᓛᓐᑯᑦ ᐊᑭᓖᖁᓗᒋᑦ ᖁᒻᒧᐊᑦᑎᑕᐅᓯᒪᔪᒃᑰᕈᓐᓇᐅᑎᒥᒃ ᐃᓄᐃᑦ ᑐᓴᐅᒪᖃᑎᒌᒍᓐᓇᕐᓂᐊᕐᒪᑕ ᐃᓚᒥᓄᑦ? ᑖᒃᑯᐊ ᒪᕐᕉᒃ ᐊᔾᔨᒌᙱᒻᒪᑎᒃ. ᑕᐃᒪ ᐅᖃᖅᑲᐅᒐᒪ ᑲᓇᑕᐅᑉ ᒐᕙᒪᒃᑯᖏᑦ ᐊᑎᓕᐅᖃᑦᑕᕐᒪᑕ ᐊᒻᒪᓗ ᐊᖏᖅᓯᓪᓗᑎᒃ ᓄᓇᕐᔪᐊᓕᒫᒥ ᒪᓕᒃᑕᐅᔭᕆᐊᓕᖕᓂᒃ ᑕᒫᓂ ᒪᓕᒃᑕᐅᖏᑦᑐᓂᒃ. ᓇᓗᓇᐃᖅᓯᕕᐅᔪᒪᑐᐃᓐᓇᖅᑐᖓ ᑕᐃᒪᐃᑦᑐᒥᒃ ᖃᐅᔨᓴᕐᒪᖔᔅᓯ?

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᑦ ᐱᓕᕆᐊᒃᓴᖃᖅᐳᑦ ᐃᓄᐃᑦ ᕿᑭᖅᑕᓃᙶᖅᑐᑦ ᑐᓴᕋᓱᒡᕕᐅᓗᑎᒃ ᐃᓚᐅᑎᑕᐅᓗᑎᒡᓗ ᐱᕙᓪᓕᐊᑎᑦᑎᑎᓪᓗᒋᑦ, ᓂᕆᐅᒃᐳᖓ ᐱᓕᕆᖃᑎᒋᓂᐊᕋᒃᑭᑦ. ᓇᖕᒥᓂᕆᔭᐃᑦ
ᐊᑎᖓ ᐳᐃᒍᕋᒃᑯ, ᑭᓯᐊᓂ ᓂᕆᐅᒃᐳᖓ ᐱᓕᕆᖃᑎᒋᓂᐊᕋᒃᑭᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑎᒍᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᑦ ᐃᑲᔪᖃᑕᐅᓂᐊᕋᔅᓯ ᐃᓄᖕᓄᑦ, ᓄᓘᔮᓕᕆᔨᒃᑯᓐᓄᑐᐊᖑᙱᑦᑐᖅ ᑭᓯᐊᓂ ᐱᓕᕆᕝᕕᓕᒫᒧᑦ." ᐅᑲᓕᖅ ᐃᔨᑦᓯᐊᖅ, ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ (QIA) 2008-ᒥᑦ 2014-ᒧᑦ ᐱᔭᐅᔪᖅ ‘ᐊᑖᑕᒪ ᓄᓇᖓᓂᑦ’.

"ᐃᒪᓐᓇᐅᖁᔨᕗᒍᑦ, ᓄᓘᔮᖕᓂ ᐱᓕᕆᐊᖑᔪᒥ – ᐊᒻᒪᓗᑦᑕᐅᖅ ᐊᓯᖏᓐᓂ ᐅᔭᕋᖕᓂᐊᕐᕕᖕᓂ ᐊᒻᒪ ᐱᕙᓪᓕᐊᑎᑦᑎᓂᐅᔪᓂ, ᐊᒻᒪ ᑮᓇᐅᔭᓕᒫᓂ ᑖᒃᑯᓇᙵᑦ ᐱᔭᐅᔪᓐᓇᖅᑐᓂ – ᑮᓇᐅᔭᖃᖅᑎᑦᑎᓂᖅ ᖃᕋᓴᐅᔭᒃᑰᕈᓐᓇᐅᑎᓄᑦ ᐱᖁᑎᕐᔪᐊᓄᑦ ᐃᑲᔫᑎᖃᕈᓐᓇᖅᐳᖅ, ᓯᕗᓪᓕᖅᐹᒥ, ᐅᖃᖃᑎᖃᕐᓂᕐᒧᑦ ᐃᓄᖕᓂ
ᐊᒻᒪ ᑲᒻᐸᓂᐅᔪᓂ ᑕᒪᒃᑯᓄᖓ ᐊᓯᖏᓐᓄᓪᓘᓐᓃᑦ ᐱᓕᕆᐊᒃᓴᓄᑦ. ᑭᓯᐊᓂ ᐊᓯᖏᓐᓂᑦᑕᐅᖅ ᐱᕚᓪᓕᕈᑎᐅᔪᓐᓇᕐᒥᔪᑦ ᐱᐅᓂᖅᓴᒥᒃ ᖃᕋᓴᐅᔭᒃᑰᕈᓐᓇᐅᑎᒥᒃ, ᓲᕐᓗ ᐃᖅᑲᓇᐃᔭᖅᑎᓄᑦ ᐊᓯᖏᓐᓄᓪᓘᓐᓃᑦ ᐱᔾᔪᑎᓄᑦ ᐅᖃᐅᓯᕆᖅᑲᐅᔭᑦᑎᓐᓄᑦ. ᐅᒃᐱᕆᔭᖃᖅᐳᒍᑦ ᑕᒪᓐᓇ ᐱᐅᔫᓂᖓᓂᒃ
ᐊᑐᕐᓂᖃᕈᓐᓇᖅᖢᓂᓗ ᐱᓕᕆᔾᔪᑕᐅᓗᓂ ᐃᑲᔪᕐᓗᓂ ᐅᔾᔨᕐᓇᖅᓯᑎᑦᑎᓂᕐᒥᒃ ᐱᔪᓐᓇᐅᑎᒋᔭᐅᔪᓂᒃ ᐊᒃᑐᐊᓂᓕᖕᓂᒃ ᐅᖃᖃᑎᖃᕐᓂᐊᕐᓗᓂ ᐃᓄᖕᓂᒃ. ᑕᒪᓐᓇ ᐃᓱᒪᒋᕙᕗᑦ ᐱᓕᕆᖃᑎᒌᖕᓂᖅ ᐊᔾᔨᒌᙱᑦᑑᑎᓂᒃ ᐱᓕᕆᖃᑎᒌᒃᑐᓂᒃ, ᒪᓕᒡᓗᑎᒃ ᑲᒪᒋᔭᒃᓴᖏᓐᓂᒃ ᐊᒻᒪ ᐱᔪᓐᓇᕐᓂᖃᕐᕕᒋᔭᖏᓐᓂᒃ, ᐊᑑᑎᖃᕋᔭᕐᓂᖓᓂᒃ."
ᓗᐃᑦ ᓕᑉᓴᑦ – ᓄᓇᕐᔪᐊᓕᒫᒥ ᐃᓄᐃᑦ ᐱᔪᓐᓇᐅᑎᖏᓐᓄᑦ ᓴᐳᓐᓂᐊᖅᑎ
ᐱᔭᐅᔪᖅ ᑕᕐᕆᔮᒃᓴᒥᑦ ‘ᐊᑖᑕᒪ ᓄᓇᖓ’.

“[...] ᐊᑭᕋᖅᑐᖏᑦᑐᖓ ᐃᓕᒃᓯᓐᓂᒃ ᓄᓘᔮᑦ ᐱᓕᕆᐊᖓᓂᒃ ᒐᕙᒪᒃᑯᓪᓗ. ᐱᓕᕆᖃᑎᒋᔪᒪᕙᒋᑦ.
ᐃᔨᖅᓯᓯᒪᖁᙱᑦᑎᐊᖅᑕᒋᑦ ᑭᓱᑐᐃᓐᓇᕐᒥᒃ. ᐃᓄᐃᑦ ᐃᖅᑲᓇᐃᔭᕋᐃᒻᒪᑕ ᒪᑐᓯᒪᓪᓗᑎᒃ ᐅᕝᕙᓘᓐᓃᑦ ᐅᕙᓐᓂᒃ ᐊᑐᕐᓂᓗᒐᐃᒻᒪᑕ. ᐃᓚᐅᖏᓐᓇᐅᔭᖅᑰᔨᕙᒃᑲᑦᑕ ᑭᓯᐊᓂ ᐱᐅᔪᓂᒃ ᓴᖅᑭᑦᑐᖃᕌᖓᑦ.
ᑕᑯᑐᐃᓐᓇᖅᑰᔨᒐᔅᓯ ᐱᐅᔪᓂᒃ ᑕᕝᕙᓂ ᐱᓕᕆᐊᖑᔪᒥ. ᓂᙵᐅᒪᙱᓚᖓ;
ᓇᓗᓇᐃᖅᓯᔪᒪᑐᐃᓐᓇᖅᑐᖓ. ᑭᓇᒥᑭᐊᖅ ᐃᓚᐃᓐᓇᖅᓯᐅᕋᓱᙱᑦᑐᖓ. ᖁᔭᓐᓇᒦᒃ ᐃᓚᐅᑎᒃᑲᕕᙵ ᑕᕝᕙᓂ ᑲᑎᒪᓂᕐᒥ. ᐃᒻᒪᖄ ᐅᑎᕐᕕᒋᓛᖅᑕᒃᓴᕆᕙᕋ ᐱᔾᔪᑎᓕᖕᓂᒃ ᐃᑦᑕᕐᓂᓴᓕᕆᓂᕐᒧᑦ ᐊᒻᒪ ᐃᑦᑕᕐᓂᓴᖃᕐᕕᖕᓄᑦ. ᐊᒥᓱᐊᓗᖕᓂᒃ ᐃᑦᑕᕐᓂᓴᖃᕐᕕᒃᑕᖃᖅᐳᖅ ᑕᐃᑲᓂ; ᓄᓇ ᐊᔾᔨᐅᙱᑦᑐᒻᒪᕆᐊᓗᒃ, ᐊᓈᓇᒐ ᐃᓅᕝᕕᒋᓚᐅᖅᑕᖓ."
ᓗᐃ ᐅᑕᒃ − ᐃᓅᓪᓗᓂ ᐃᓐᓇᖅ ᐃᒡᓗᓕᖕᒥᐅᑕᖅ ᐃᓚᒋᔭᐅᓪᓗᓂᓗ ᓄᓘᔮᖕᓂ ᐱᓕᕆᐊᖑᔪᒧᑦ ᑲᑎᒪᔨᕋᓛᓄᑦ ᐃᒡᓗᓕᖕᒥ 2012−ᖑᑎᓪᓗᒍ
ᐱᔭᐅᔪᖅ ᑕᕐᕆᔮᒃᓴᒥᑦ ‘ᐊᑖᑕᒪ ᓄᓇᖓ’.