ᐃᓱᒪ
ᐱᔾᔪᑕᐅᔪᖅ
ᐊᕋᒍᖓᓂ 1985, ᓴᖃᓕᐊᓯ ᑯᓄᒃ ᐅᕕᓂᐅᖃᑎᒌᖏᓐᓂᕐᒧᑦ ᐊᔪᕈᑕᐅᒐᓗᐊᕐᑎᓪᓗᒋᑦ ᑲᔪᓯᑎᑦᑎᓚᐅᕐᑐᖅ ᐃᓄᒃᑎᑐᑦ ᐅᖃᐅᓯᖓᒍᑦ ᑕᕆᐅᔭᐅᓯᐊᓂ ᑲᓇᑕᒥ ᑲᑎᒪᔨᐅᔪᑦ ᓴᓇᐅᒐᓕᕆᓂᕐᒧᑦ, ᐃᓄᐃᑦ ᑕᑯᓯᒪᔭᖓᒍᑦ, ᓯᕗᓪᓕᕐᐹᖑᓚᐅᕐᑐᖅ ᐃᓄᒃᓄᑦ ᐅᕙᓘᓐᓃᑦ ᓄᓇᖃᕐᖄᕐᓯᒪᔪᓄᑦ ᓴᓇᐅᒐᓕᕆᔨᐅᔪᓄᑦ ᐱᔪᓐᓇᕐᑎᑕᐅᓪᓗᑎᒃ ᑮᓇᐅᔭᓂᒃ ᑐᓂᔭᐅᔪᓐᓇᕐᓯᓪᓗᑎᒃ ᓴᓇᐅᒐᓕᕆᔨᐅᔪᓄᑦ. ᑯᓄᒃ ᓯᕗᓪᓕᕐᐸᖑᓚᐅᕐᑐᖅ ᑕᕆᐅᔭᐅᓯᐅᕐᑎᐅᓪᓗᓂ ᑐᑭᒧᐊᒃᑎᑦᑎᔨ, ᓄᐊᒪᓐ ᑰᓐ ᐊᔾᔨᓕᐅᕆᔨᐅᓪᓗᓂ, ᐸᓪ ᐋᐸᒃ ᓇᑲᑎᕆᔨᐅᓪᓗᓂ ᐊᒻᒪᓗ ᐃᓐᓇᕆᔭᐅᔪᖅ ᐸᐅᓗᓯ ᖁᓕᑦᑕᓕᒃ ᐅᓂᒃᑳᕐᑎᐅᓪᓗᓂ. ᐊᕋᒍᖓᓂ 1990, ᑎᓴᒪᐅᔪᑦ ᐃᑲᔪᕐᑎᒌᒃᑐᑦ ᐱᒋᐊᕐᑎᑦᑎᓚᐅᕐᑐᑦ ᐃᒡᓗᓕᒃ ᐃᓱᒪ ᑕᕆᔭᐅᓯᐅᕐᑎᑦ ᓴᕿᑎᑦᑎᖃᑦᑕᕐᓗᑎᒃ ᑕᕆᔭᐅᓯᐊᓂᒃ ᓇᖏᖕᒥᓂᖅ ᐋᕿᒃᑕᒥᓂᒃ ᐃᓄᐃᑦ ᑕᑯᔭᖓ ᒪᓕᒃᖢᒍ. ᐱᒋᐊᕐᓂᖓᓂᒃ ᑕᕆᐅᔭᐅᓯᐊᖑᔪᑦ ᐃᓱᒪᒃᑯᓐᓄᑦ, ᑕᕆᐅᔭᐅᓯᐅᕐᑕᐅᔪᑦ ᐃᓄᐃᑦ ᐃᓅᓯᖏᓐᓂ 1930 ᐊᒻᒪᓗ 1940, ᑕᑯᒃᓴᐅᑎᑕᐅᓚᐅᕐᑐᑦ ᓄᐃᑦ ᐊᖏᕋᖏᓐᓄᑦ ᐊᒻᒪᓗ ᑕᑯᔭᒐᖃᕐᕕᒃᒥ ᓄᓇᕐᔪᐊᕐᒥ. ᐊᕋᒍᑦ ᖁᓖᑦ ᐊᕋᒍᓂ, ᐃᓱᒪ ᓴᓇᐅᒐᓕᕆᔨᐅᔪᑦ ᐃᑲᔪᕐᓯᒪᔪᑦ ᐃᓄᐃᑦ ᑐᓴᐅᒪᖃᑦᑕᐅᑎᔾᔪᑎᓄᑦ ᑐᖓᕕᒃᒥᒃ, NITV; ᐊᕐᓇᐃᑦ ᑲᑎᓯᒪᔭᖏᑦ, ᐊᕐᓇᐃᑦ ᑕᕆᔭᐅᓯᐅᕐᑎᑦ; ᐊᒻᒪᓗ ᐊᕐᑎᒃ, ᒪᒃᑯᒃᑐᐃᑦ ᐱᖑᐊᕐᑎᑦ ᖁᖏᐊᕐᑎᑦᑎᔩᑦ. ᐊᕋᒍᖓᓂ 2001, ᐃᓱᒪ ᓯᕗᓪᓕᕐᐸᖑᓪᓗᓂ ᑕᕆᐅᔭᐅᑎᓪᓚᕆᐅᔪᖅ, ᐊᑕᓈᕐᔪᐊᖅ ᐅᕿᓚᔪᖅ, ᓵᓛᒃᓴᓚᐅᕐᑐᖅ Caméra d’Or ᑲᓐᔅ ᑕᕆᐅᔭᐅᑎᓂᒃ ᖁᕕᐊᓲᑎᖃᕐᑎᓪᓗᒋᑦ; ᐊᕋᒍᖓᓂ 2002, ᑕᒪᕐᒥᒃ ᐊᑕᓈᕐᔪᐊᖅ ᐊᒻᒪᓗ ᓄᓇᕗᑦ (ᓄᓇᕗᑦ), ᑏᕕᒃᑯᑦ ᑕᑯᒃᓴᐅᔪᒃᓴᖅ 13 ᖏᕐᓱᕐᓗᓂ, ᑕᑯᒃᓴᐅᑎᑕᐅᓚᐅᕐᑐᖅ ᑕᕙᓂ Documenta 11 ᓄᓇᒥ ᑭᓱᓪ Kassel, ᔮᒪᓂ. ᐃᓱᒪ ᑭᖑᓪᓕᕐ ᑕᕆᐅᔭᐅᓯᐊᖓ. ᐅᓂᒃᑳᖓ ᑯᓄᑦ ᕌᔅᒥᐅᓴᓐᑦ, ᒪᑐᐃᕐᓯᔾᔪᑕᐅᓚᐅᕐᑐᖅ ᐊᕋᒍᖓᓂ 2006 ᑐᓛᓐᑐᒥ ᓄᓇᕐᔪᐊᕐᒥᐅᑦ ᑕᕆᐅᔭᐅᓯᐊᓂᒃ ᖁᕕᐊᓲᑎᖃᕐᑎᓪᓗᒋᑦ, ᐱᖓᔪᖓᑦ ᑕᕆᐅᔭᐅᓯᐊᖅ, ᖃᐅᒃᐸᖑᖏᓐᓂᖓᓂ, ᑎᑎᕋᕐᑕᐅᔪᖅ ᐊᒻᒪᓗ ᑐᑭᒧᐊᒃᑎᑕᐅᔪᖅ ᐃᒡᓗᓕᒃᒥ ᐊᕐᓇᐃᑦ ᑲᑎᓯᒪᔭᖏᑦ, ᑕᑯᒃᓴᐅᑎᑕᐅᓚᐅᕐᑐᖅ ᓄᓇᕐᔪᐊᕐᒥ ᑕᕆᔭᐅᓯᐅᕐᓂᕐᒧᑦ ᓵᓚᒋᖃᑦᑕᐅᑎᓇᓱᒃᑐᓂ ᐊᕋᒍᖓᓂ 2009 ᓴᓐᑖᓐᔅ ᑕᕆᔮᒃᓴᓂᒃ ᖁᕕᐊᓲᑎᖃᕐᓂᖅ. ᐊᕋᒍᖓᓂ 2008, ᐃᓱᒪ ᐱᒋᐊᕐᑎᑦᑎᓚᐅᕐᑐᑦ IsumaTV, ᓄᓇᕐᔪᐊᕐᒥ ᓯᕗᓪᓕᕐᐹᖑᔪᖅ ᖃᕋᓴᐅᔭᒃᑯᑦ ᓄᓇᖃᕐᖄᕐᓯᒪᔪᑦ ᑐᓴᐅᒪᖃᑦᑕᐅᑎᔾᔪᑎ, ᑕᑯᔭᐅᔪᓐᓇᕐᓯᓪᓗᓂᓗ 7,850 ᑕᕆᔮᒃᓴᐃᑦ ᐊᒻᒪᓗ ᐅᖃᐅᓯᒃᑯᑦ 71 ᐊᔾᔨᒋᖏᑦᑐᓄᑦ. ᐊᕋᒍᖓᓂ 2012, ᐃᓱᒪ ᓴᕿᑦᑎᓚᐅᕐᑐᑦ ᖃᕋᓴᐅᔭᒃᑯᑦ ᓄᓇᖃᕐᖄᕐᓯᒪᔪᑦ ᐃᓱᒪᒃᓱᕐᓂᖏᑦ, ᖃᕋᓴᐅᔭᒃᑯᑦ ᖃᐅᔨᒋᐊᕐᑕᕐᕕᐅᔪᖅ ᑐᓴᐅᒪᑎᑦᑎᓗᓂ ᖃᐅᔨᒪᑎᑦᑎᓗᓂᓗ ᐃᓄᒃᓂᒃ ᖃᕋᓴᐅᔭᒃᑰᕈᑎ ᓴᖏᖏᓗᐊᕐᑐᓄᑦ ᓄᓇᓕᒃᓄᑦ ᐅᔭᕋᒃᓂᐊᕐᓂᕐᒥᒃ ᐱᒋᐊᕐᐸᓪᓕᐊᓂᐅᔪᒥᒃ ᐹᕕᓐᓛᒃᑯᑦ ᐅᔭᕋᒃᓯᐅᕐᑎᑦ ᓴᕕᒃᓴᒥᒃ ᐊᓯᖏᓪᓗ ᐅᔭᕋᒃᑕᕐᕕᐅᔪᑦ. ᐃᓱᒪ ᓴᕿᑎᓕᓚᐅᕐᒥᔪᑦ ᓱᓕᔪᒥᒃ ᐅᓂᒃᑳᒥᒃ ᑕᕆᔭᐅᓯᐊᒥᒃ ᖃᓄᐃᑦᑐᖃᓚᐅᕐᓂᖓᓂᒃ ᑭᐅᓗᒃᑎᓪᓗᒋᑦ, ᐊᑖᑕᒪ ᓄᓇᖓ (2014). ᖃᖓᑦᑎᐊᖑᓚᐅᕐᑐᖅ ᐱᒋᐊᕐᑕᐅᓯᒪᒃᒥᔪᖅ ᑕᕆᐅᔭᐅᓯᐊᖑᓪᓗᓂ, ᒪᓕᒡᓗᑎᑦ (ᕿᓂᕐᑎᑦ); ᑏᕕᒃᑯᑦ ᓴᕿᔮᕐᑐᒃᓴᐃᑦ, ᐊᖑᓇᓱᖃᑎᒋᓗᒋᑦ ᓯᕗᓕᕗᑦ, ᐊᒻᒪᓗ ᓯᕗᓪᓕᕐᐸᖑᔪᖅ ᕼᐊᐃᑕ −ᐅᖃᐅᓯᖓᒍᑦ ᑕᕆᔭᐅᓯᐊᖑᔪᖅ, ᓴᕕᐅᑦ ᑮᓇᖓ. ᑐᑭᓯᒋᐊᒃᑲᓐᓂᕈᒪᒍᕕᑦ ᑎᑎᕋᕐᕕᒋᓗᒍ info@isuma.tv, ᑕᑯᒋᐊᕐᓗᒍ IsumaTV, ᐊᒻᒪᓗ ᖃᐅᔨᒋᐊᖃᑦᑕᕐᓗᒍ ᐃᓱᒪ ᐅᕘᓇ Twitter, Instagram ᐊᒻᒪᓗ Facebook.
