ᖁᐊᕐᑕᖅ
About
1956-ᒥ ᑕᑯᓐᓇᕋᑦᓴᓕᐊᕕᓂᐅᑦᓱᓂ, ᑖᓐᓇ ᐅᓂᒃᑳᑕᐅᔪᖅ ᑕᑯᑎᑦᓯᔪᖅ ᐃᓄᐃᑦ ᐃᓅᒍᓯᖏᓐᓂᒃ ᐅᑭᐅᒥ ᖁᐊᕐᑕᒥ, ᐃᒡᓗᖏᑦ ᐊᖏᔪᕐᓚᒪᕆᐅᑎᓗᒋᑦ ᐃᓚᒌᑦᑐᑦ ᐊᒥᓱᐃᒍᒻᒪᑕ. ᐃᓅᓯᖏᑦ ᐱᐅᓯᑐᖃᕐᑎᒎᕐᓱᑎᒃ ᐱᓇᓱᐊᓲᒍᓐᓂᒪᑕ ᒪᙯᑦᓱᑎᒃ, ᐊᕐᓀᑦ ᓄᓂᕙᑦᑎᓗᒋᑦ, ᐃᓅᖃᑎᒌᑦᑎᓗᒋᑦ, ᐃᒡᓗᓕᑎᓪᓗᒋᑦ, ᐱᐊᕃᑦ ᐱᓐᖑᐊᓗᑳᑦᑎᓗᒋᑦ … ᑖᓐᓇ ᐅᓂᒃᑳᑕᐅᑦᓱᓂ ᑕᑯᓐᓇᕋᑦᓴᖅ ᑕᑯᑎᑦᓯᒥᔪᖅ ᐃᒡᓘᑉ ᐃᓗᐊᓃᑦᓱᑎᒃ ᑕᑯᓐᓇᕋᑦᓴᓕᐅᕐᑕᐅᔪᓂᒃ, ᐃᒡᓘᐃᑦ ᐃᓗᖏᑦ ᑕᑯᑦᓴᐅᑎᓪᓗᒋᑦ, ᓂᓚᒥᒃ ᐃᒐᓛᖃᕐᓱᑎᒃ, ᐊᖏᔪᑲᓪᓚᒥᒃ ᖁᓪᓕᖃᕐᓱᑎᒃ, ᐊᓯᖏᓐᓂᓗ.
ᖁᐊᕐᑕᖅ (1956)
ᑕᑯᓐᓇᕋᑦᓴᖅ ᓇᓗᓀᕐᓯᔪᖅ ᐃᓄᐃᑦ ᐃᓅᒡᒍᓯᕕᓂᖓᓂᒃ ᒥᑭᔪᒥ ᐅᑮᕕᒻᒦᓱᑎᒃ ᐃᒡᓗᐃᑦ ᐊᐳᑏᑦ ᐊᖏᔪᕐᓚᐅᑎᓗᒋᑦ.
16 mm ᑕᑯᓐᓇᕋᑦᓴᖅ ᑕᐅᑦᑐᓕᒃ (ᓂᐯᑦᑑᓱᓂ)
19-ᒥᓂᑦᔅ-ᑐᕐᑐᖅ
ᑐᑭᒧᐊᕐᑎᓯᔪᕕᓂᖅ : ᐱᕐᓈ ᓴᓚᑏᓐ ᑕᖕᒃᓘᕐ
ᐊᑦᔨᓕᐅᕆᔪᕕᓂᖅ : ᐱᕐᓈ ᓴᓚᑏᓐ ᑕᖕᒃᓘᕐ
ᑕᑯᓐᓇᕋᑦᓴᓕᐊᕕᓂᖅ ᖁᐊᕐᑕᖅ ᓄᓇᕕᒻᒥ ᐅᑭᐅᒍᑎᓪᓗᒍ 1956-ᒥ, ᐃᑲᔪᕐᓯᒪᑎᓪᓗᒋᒃ R.P. Antoine ᐊᒻᒪᓗ Dion, ᐃᑦᓯᒐᕐᔪᐊᒥᐅᒃ ᓂᐅᕕᐊᑦᓴᑕᕐᓂᒧᑦ.
ᓯᕗᓪᓕᖅ ᓂᐯᑦᑑᓱᓂ ᑕᑯᓐᓇᕋᑦᓴᓕᐊᕆᔭᐅᓚᐅᕐᓯᒪᔪᖅ ᐱᕐᓈ ᓴᓚᑏᓐ ᑕᖕᑭᓘᕐ-ᒧᑦ 1956-ᒥ. ᑌᒪ 1958-ᒥ ᐅᖃᐅᓯᕐᑕᖏᑦ ᐃᓕᔭᐅᓂᐊᓕᕐᒪᑕ ᓂᒡᒋᒥᐅᓅᓕᖓᑎᓪᓗᒋᑦ, ᐊᒻᒪᓗ ᑐᓴᕐᓂᔮᖃᕐᐸᓓᓕᕐᓱᓂ ᐁᕕᓕᖕᒥᐅᑦ ᐃᓐᖏᕈᓯᖏᓐᓂᒃ, ᙯᑕᕕᓂᐅᑎᓪᓗᒋᑦ R.P Arthur Thibert-ᒧᑦ ᐃᑦᓯᒐᕐᔪᐊᒥᐅᒧᑦ; ᑖᓐᓇ ᐱᓇᓱᐊᕐᑕᐅᓚᐅᕐᓯᒪᔪᖅ ᐃᑲᔪᕐᓯᒪᑎᓪᓗᒍ Comité du Film Ethnographique français, Musée de l`homme, Paris-ᒥᐅᖅ. ᑕᑯᓐᓇᕋᑦᓴᖅ ᐅᖄᔭᐅᔪᖅ ᓂᐅᕕᐊᕆᔭᐅᓚᐅᕐᓯᒪᔪᖅ Radio-Canada-ᑯᓄᑦ ᑐᓴᕐᓴᐅᒐᔭᕐᑎᓗᒍ (ᖃᐅᔨᒪᑎᓐᓇᒍ ᑕᑯᓐᓇᕋᑦᓴᓕᐅᕐᑐᕕᓂᖅ) ᑕᑯᑦᓴᐅᑎᑕᐅᓐᓂᒪᑦ ᐅᐃᒍᐃᑦ ᑕᓚᕖᓴᖓᓐᓂ ᑕᓚᕖᓴᓕᕆᔩᑦ ᐱᓇᓱᓐᓂᒥᓂᒃ ᕿᑲᐅᑦᔨᑯᑖᕐᓂᖏᓐᓂ (1958 ᓄᓐᖑᐊᓂ). ᐱᓇᓱᓐᓂᒥᓂᒃ ᕿᑲᐅᑦᔨᔪᑦ ᓄᕐᖃᓚᐅᕐᓯᒪᔪᑦ ᕋᓃ ᓚᕓᒃ ᓄᕐᖃᑎᑐᐊᕐᒪᑦ ᐱᓂᐊᕐᓂᓕᕆᓂᕐᒥᓗ ᐱᒋᐊᓯᑦᓱᓂ ᐃᓕᖃᕐᓱᓂ ᔮᓐ ᓚᓵᔾ-ᒥᒃ, ᐱᒋᐊᓪᓚᕆᓚᕿᑎᓪᓗᒍ Quiet Revolution-ᒍᓂᕋᕐᑕᐅᔪᖅ; ᑕᑯᓐᓇᕋᑦᓴᖅ ᑌᑲᓂᑦᓭᓇᖅ ᐊᕐᕌᒍᕐᒥ ᑕᑯᓐᓇᕋᑦᓴᐅᓚᐅᕐᓯᒪᒻᒥᔪᖅ Télé Luxembourg-ᒥ. ᖃᒻᒥᐅᓂᕐᓴᑯᑦ ᑕᑯᓐᓇᕋᑦᓴᓕᐅᕐᑐᕕᓂᖅ ᐃᓂᓪᓓᒋᐊᓕᕐᓂᒥᔪᖅ 2014-15-ᓂ, ᐃᓄᓐᓅᓕᖓᑎᓪᓗᒍ, ᓯᕗᓪᓕᐹᑦᓯᐊᒥ ᑕᑯᓐᓇᕋᑦᓴᓕᐊᕕᓂᖓᓐᓂᑦ ᑕᑯᓐᓇᕋᑦᓴᓕᐊᓪᓗ ᒪᓕᑦᑎᑕᕕᓂᐅᑦᓱᑎᒃ ᐅᓪᓗᐃᑦ ᐃᖏᕐᕋᓂᖏᓐᓂᒃ.
ᐃᓕᑕᕆᔭᐅᒍᑎᑖᕐᑕᕕᓂᖅ Award Connaissance du Monde-ᒧᑦ 1957-ᒥ, ᑐᑭᑖᕆᔨᐅᑎᓪᓗᒍ Jean Rouch, ᐱᓯᒪᑦᓱᓂ Société des Explorateurs et Voyageurs français, Paris-ᒥᑦ.
ᓱᓇᒥᑦᓯᐊᑎᓗᒍ ᓯᑯᑦᓴᔭᒨᕐᑕᕕᓂᖅ
ᕿᒻᒥᖅ ᐊᐳᑎᒥ ᐊᖁᐱᔪᖅ; ᐊᐳᑎᒧᑦ ᒥᓗᕐᑕᖅ, ᒪᑭᑲᓪᓚᑐᖅ ᐸᖓᓕᑦᓯᓯᑦᓱᓂᓗ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᓇᓕᕐᙯᑐᖅ (ᔭᓄᐊᕆ) 1956-ᒥ. ᑎᕆᒐᓐᓂᐊᑦ ᖃᐅᔨᒣᓕᖓᓐᓈᓗᖓ ᑲᖏᕐᓱᒥᐅᑦ ᕿᒻᒥᖏᓐᓅᓚᐅᕐᓯᒪᔪᖅ ᕿᒻᒦᑦ ᓄᖑᑲᓴᓚᕿᑎᓪᓗᒋᑦ.
ᓯᑕᒪᑦ ᕿᒻᒦᑦ ᐸᖓᓕᑦᑐᑦ, ᐊᓄᓯᒪᑦᓱᑎᒃ ᖁᒧᑏᓐᓄᑦ ᐅᓂᐊᕐᓱᒋᒃ. ᑕᑯᑦᓭᑦ ᐊᓄᖏᑦ ᐊᑦᔨᒌᖕᖏᑐᓂᒃ ᑕᐅᑦᑐᓖᑦ.
ᐊᑦᔨᒌᖕᖏᑐᑎᒍᑦ ᐊᑦᔨᓕᐊᕕᓃᒃ ᒪᕐᕈᐃᒃ ᕿᒧᑦᓰᑦ ᕿᒻᒥᖏᑦ ᐸᖓᓕᑦᑐᑦ ᖃᒧᑏᓐᓂᒃ ᐅᓂᐊᕐᓱᑎᒃ (ᑕᑯᑦᓴᐅᖏᑦᑑᒃ ᖃᒧᑏᒃ).
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒪᕐᕉᒃ ᐃᓅᒃ ᑲᖏᕐᓱᒥᐅᒃ ᑐᑭᑖᓕᕐᑐᕕᓃᒃ ᖁᐊᕐᑕᒥᑦ ᕿᒻᒥᓯᐅᕆᐊᒍᒪᒋᐊᖅ. ᑌᑰᓇ ᑲᖏᕐᓱᒦᓚᐅᕐᓯᒪᔪᖓ, ᑌᒣᒻᒪᑦ ᑖᒃᑯᐊ ᒪᕐᕉᒃ -- ᔮᓂ ᐱᑕᓗᐊᐱᒃ ᐊᒻᒪᓗ ᔫᓯᐱ ᓇᓴᖅ ᐅᕙᓐᓂᒃ
ᐊᖑᑏᒃ ᒪᕐᕉᒃ ᐊᒻᒪᓗ ᐊᑕᐅᓯᖅ ᕿᒻᒥᖅ. ᐊᖑᑏᑦ ᐃᓚᖓᑦ ᕿᒧᑦᓯᓕᕆᔪᖅ (ᑎᒍᒥᐊᕐᓱᒋᒃ ᓯᕗᖏᒃ). ᐊᐳᑎᒥ ᒪᖑᑦᓯᒪᔪᖅ ᐸᓇᒃ ᓴᓂᐊᓃᑦᓱᓂ, ᐊᒻᒪᓗ ᓴᕕᕋᔭᖅ ᐃᕐᓯᕕᒃ ᓯᕗᐊᓃᑦᑐᖅ ᑕᑯᑦᓴᐅᓱᓂ.
ᐊᖑᑎᒃ ᐱᓇᓱᐊᕐᑐᖅ ᖃᒧᑏᒃ ᐊᒻᒪᓗ ᐃᓪᓘᑉ ᓴᓂᐊᓂ, ᓯᑕᒪᑦ ᕿᒻᒦᑦ ᓴᓂᐊᓃᑦᑐᑦ. ᕿᔪᒻᒥᒃ ᐃᒋᑦᓯᔪᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐃᖏᕐᕋᓚᐅᕐᓯᒪᔪᒍᑦ ᓯᑕᒪᓂ ᐅᓪᓗᓂ ᐱᖓᓱᓂᓪᓗ ᐅᓐᓄᐊᓂ. ᐅᓐᓄᑕᒫᑦ ᒥᑭᔪᒥᒃ ᐃᒡᓗᓕᖃᑦᑕᓚᐅᕐᓯᒪᔫᒃ ᐅᓪᓕᕕᒋᓂᐊᕐᑕᑎᓂᒃ, ᐅᓪᓛᑯᓪᓗ ᕿᒻᒥᓂᒃ ᐊᓅᕆᓯᕙᑦᓱᑎᒃ ᑌᒪ
ᒪᕐᕉᒃ ᐊᖑᑏᒃ ᐃᓪᓘᑉ ᓴᓂᐊᓂ ᓂᑯᕐᕋᔫᒃ, ᖃᒧᑏᓪᓗ ᐊᒻᒪᓗ ᕿᒧᑦᓰᑦ. ᐊᖑᑏᑦ ᐃᓚᖓ ᑎᒍᒥᐊᕐᑐᖅ ᐴᕐᒥᒃ ᖃᒧᑏᓐᓅᓯᑦᓱᓂ.
ᕿᒻᒥᖅ ᐊᐳᑎᒥ ᐊᖁᐱᔪᖅ. ᐊᓄᓯᒪᑦᓱᓂ ᐃᐱᕐᓯᒪᔪᖅ.
ᓯᑕᒪᑦ ᕿᒻᒦᒃ ᐸᖓᓕᑦᑐᑦ, ᐊᓄᓯᒪᑦᓱᑎᒃ ᐱᑐᑦᓯᒪᔪᓂᒃ ᖃᒧᑏᓐᓄᑦ ᐅᓂᐊᕐᑕᒥᓄᑦ. ᑕᑯᑦᓭᑦ ᐊᓄᖏᑦ ᐊᑦᔨᒌᖕᖏᑐᓂᒃ ᑕᐅᑦᑐᓖᑦ.
ᕿᒻᒥᖅ ᐊᐳᑎᒥᒃ ᐊᖁᐱᔪᖅ. ᐊᓄᓯᒪᑦᓱᓂ.
ᐃᓪᓗᖅ ᓴᕕᐅᔭᕐᑐᐊᓯᒪᔪᖅ ᐅᖂᓗᑕᓂᒃ. ᒪᕐᕉᒃ ᐊᕐᓈᒃ ᓴᓂᐊᓂ ᐱᓱᑦᑑᒃ. ᕿᒧᑦᓯᓂᓪᓗ ᓴᓂᒥᐅᑕᖃᕐᓱᑎᒃ. ᐅᖓᓯᑦᑕᒋᐊᓪᓚᖓᓂ, ᑕᑯᑦᓭᑦ ᐊᓯᖏᑦ ᐊᐳᑏᑦ ᓴᓇᒪᔪᑦ ᐊᒻᒪᓗ ᐃᓪᓗᕕᒐᖃᕐᕕᒃ. ᐃᓄᒃ ᓴᓇᒪᔪᓃᑦᑐᕕᓂᐅᑦᓱᓂ ᐊᐳᑎᓂ ᐅᑎᓕᕐᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᖁᐊᕐᑕᐅᑉ ᙯᕐᑐᖓᓐᓂᑦ ᖁᐊᕐᑕᒧᑦ ᑎᑭᑦᑎᓗᑕ ᑕᑯᑦᓴᐅᔪᒍᑦ. ᑌᑦᓱᒪᓂᐅᑎᓪᓗᒍ ᑐᒃᓯᐊᕕᒃ ᐃᓪᓗᕈᐊᑐᐊᒍᓚᐅᕐᓯᒪᔪᖅ. ᐊᓂᕐᕋᒋᔭᐅᒻᒥᔪᑦ ᐊᖏᔪᐃᓐᓈᓘᑦᓱᑎᒃ ᐃᓚᒌᑦ ᐃᒡᓗᒋᓚᐅᕐᓯᒪᔭᖏᑦ, ᐃᒻᒥᒎᕐᑎᑕᐅᒪᑦᓱᑎᒃ, ᒪᕐᕉᒃ ᐱᖓᓱᓪᓘᓃᑦ
ᐊᓯᖓᑎᒍᑦ ᑕᑯᑦᓵᒃ ᒪᕐᕉᒃ ᐃᓪᓘᒃ ᐊᑦᔨᓕᐅᕐᑕᕕᓃᒃ ᖃᕐᖃᒦᑦᑐᒧᑦ, ᑕᒪᖏᒃ ᒪᕐᕉᓂᒃ ᐃᓪᓗᖃᑎᒌᕝᕕᓖᒃ, ᑕᒪᖏᒃ ᒪᕐᕉᓂᒃ ᐃᓪᓗᐊᕈᓯᕐᑕᓖᒃ ᑲᑕᐅᑉ ᑐᕐᓲᖏᓐᓂ ᐊᒻᒪᓗ ᐅᖂᓯᔭᕐᓱᑎᒃ, ᐊᒻᒪᓗ ᓴᕕᐅᔭᕐᑐᐊᒋᐊᓪᓚᓂᒃ ᐅᖂᓗᑕᓕᐅᕐᓯᒪᑦᓱᑎᒃ. ᐃᓪᓘᒃ ᐊᑯᓐᓂᖓᓃᑦᑐᖅ ᐊᓐᓄᕌᓂᒃ ᐸᓂᕐᓰᕕᒃ ᐊᑦᓱᓈᖅ.
ᑖᒃᑯᐊᓭᓐᓀᑦ ᐊᑦᔨᓕᐅᕐᑕᐅᔪᕕᓃᑦ ᖃᕐᖃᐅᑉ ᖄᒋᐊᓪᓚᖓᓂ. ᒪᕐᕉᒃ ᐊᖑᑏᒃ ᖃᕐᖃᒥᒃ ᒪᔪᕋᕐᑑᒃ ᐊᑦᔨᓕᐅᕈᑎᒥᒃ ᓵᖕᖓᓱᑎᒃ.
ᒪᕐᕈᐃᒃ ᐊᑦᔨᓕᐅᕐᑕᕕᓃᒃ ᒪᕐᕉᒃ ᐃᓪᓘᒃ ᐊᐳᑦᔭᐅᒪᔫᒃ, ᐁᑉᐸᖓ ᒪᕐᕉᓂᒃ ᖄᖓ ᖁᑭᐅᑎᑕᓕᒃ. ᐊᑦᔨᓕᐅᕐᑕᐅᓂᕐᒥᔪᖅ ᓴᓂᕋᒋᒃ ᓴᐅᒥᐊᓂ ᐃᓪᓘᒃ ᓄᐃᑕᑎᓪᓗᒋᒃ ᒪᕐᕉᒃ ᕿᒻᒦᒃ (ᐁᑉᐸᖓ ᐊᖁᐱᔪᖅ).
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑖᕙᓂ ᐱᕐᓯᑐᕕᓈᓘᑐᐊᕐᒪᑦ ᐃᒡᓗᐃᑦ ᐊᐳᑦᔭᐅᕙᓚᐅᕐᑐᐃᑦ, ᑕᕐᕿᓗ ᓈᑐᐊᕐᒪᑦ, ᐊᓯᖏᓐᓂᒃ ᐃᒡᓗᓕᒋᐊᖃᖃᑦᑕᓲᕕᓃᑦ, ᐅᑭᐅᑐᐃᓐᓈᓗᒻᒥ, ᐊᓂᕐᕋᒋᒐᓱᐊᓕᕐᑕᖏᑦ ᐊᐳᑦᔭᐅᓗᑐᐊᓗᑦᓴᐸᓐᓂᒪᑕ ᐊᓪᓛᑦ ᐊᐳᑎᐅᑉ ᐊᑖᓃᓕᕐᓱᑎᒃ.
ᑖᒃᑯᓭᓐᓈᒃ ᕿᒻᒦᒃ ᒪᕐᕉᒃ; ᓄᐃᑕᓕᕐᒥᑎᓪᓗᒍ ᐊᑖᒋᓂᕐᓴᖓ, ᐃᓪᓘᑉ ᑲᑕᖓ ᓄᐃᑎᓪᓗᒍ ᑐᕈᓯᖅ ᐃᓪᓗᒥᑦ ᐊᓂᔪᖅ, ᖁᖓᑦᓱᓂ ᐊᑦᔨᓕᐅᕈᑎᒥᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᔦᑯ, ᐃᒡᓗᖓᓗ ᐊᐳᑦᔭᕕᓂᐅᑦᓱᓂ ᐱᕐᑐᒧᑦ. ᐊᖑᑎᐅᒻᒥᔪᓂᑦ ᓱᒃᑫᓂᕐᓴᐅᒫᐱᑦᑐᖅ ᑕᑯᓐᓇᓯᐊᓐᖏᓇᒥ ᐊᖑᑏᓪᓗ ᐅᖃᕐᑐᕕᓂᐅᑦᓱᑎᒃ ᐃᒡᓗᓕᔭᒥᓂᒃ
ᐊᖑᑎᒃ ᐃᓪᓗᓕᔪᖅ, ᒪᔪᕋᐅᑏᓐᓃᑐᖅ, ᖁᓕᒋᐊᕕᑦᑐᖅ. ᖃᒧᑏᒃ ᓄᐃᑕᔫᒃ ᐊᐳᑎᒦᑦᑑᒃ, ᐃᓪᓘᑉ ᓴᓂᐊᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᖃᒧᑎᒥᓂᒃ ᓴᓐᓂᖓᒃᑫᔪᖅ ᐃᓗᐊᓂᑦ ᓴᕕᐅᔭᕐᑕᒥᓂᒃ ᑕᑉᐸᐅᖓᒃᑫᕙᓪᓕᐊᓚᖓᒐᒥ ᖁᓕᒌᒍᑎᒋᓂᐊᕐᑕᒥᓂᒃ; ᑌᒣᓘᕐᓂᖓᓂ ᑎᒍᐊᕆᑦᓱᒍ ᐃᕐᓂᖓ ᓯᓚᑖᓃᑦᓱᓂ ᐃᑲᔪᕐᑐᖅ.
ᑕᓪᓕᒪᑦ ᑲᒃᑲᓛᑦ ᐊᕐᐸᓕᑭᑕᕐᑐᑦ ᐃᓪᓗᒥᒃ ᑫᕙᓪᓓᓱᑎᒃ. ᐃᓄᒃ ᐃᓪᓘᑉ ᓴᓂᐊᓂ ᐱᓇᓱᐊᕐᑐᖅ. ᕿᒻᒦᑦ ᓄᓇᓕᐊᕈᕐᓂ ᐸᖓᓕᑭᑕᕐᒥᔪᑦ.
ᒪᕐᕉᒃ ᐃᓪᓘᑉ ᖃᒧᒃᑲᐅᔮᒃ ᐁᑉᐸᖓᑕ ᐊᑭᓐᓇᖓᓂ ᓇᐸᔫᒃ. ᒪᕐᕉᒃ ᑲᒃᑲᓛᒃ ᐊᓚᒃᑲᑑᒃ; ᐁᑉᐸᖓ ᖃᒧᒃᑲᐅᔮᓐᓂᒃ ᑎᒍᓯᔪᖅ, ᐁᑉᐸᖓ ᐃᖏᕝᕕᓕᒃ ᖃᒧᒃᑲᐅᔮᓐᓂᒃ. ᓯᕗᓪᓕᖅ ᑲᒃᑲᓛᖅ ᓰᕐᖁᒥᑕ ᐃᓪᓗᐊᓂᒃ ᖃᒧᒃᑲᐅᔭᒨᕐᓯᔪᖅ ᐃᖏᕐᕋᑎᑦᓯᓯᑦᓱᓂᓗ, ᐊᐳᑎᒃᑯᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᑕᑯᒍᓐᓇᑐᒍᑦ ᐃᒡᓗᒥᒃ ᐊᐳᑦᔭᐅᒪᓪᓚᕆᒐᓛᑦᓯᐊᓕᕐᑐᒥᒃ, ᐊᒻᒪᓗ ᐊᓂᕐᕋᒋᔭᐅᔪᒥ ᐃᒐᓛᑉ ᑭᖏᓐᓂᖓᓂᒃ, ᐊᒻᒪᓗ ᐱᐊᕃᑦ ᐊᓃᓐᖑᐊᑐᑦ ᓯᑐᕋᓐᖑᐊᓱᑎᒃ, ᐊᓯᓗᑳᖃᕐᒥᓱᑎᒃ. ᐊᓃᓐᖑᐊᑐᑦ ᑌᑦᓱᒪᓂᑕᔭᕐᓂᒃ ᓱᖃᑦᓯᐅᑎᖃᕐᓱᑎᒃ. ᐱᐊᕃᑦ ᐊᓂᕐᕋᒥᑕ ᓴᓂᐊᓂ ᐊᓃᓐᖑᐊᕈᒪᓲᕕᓃᑦ ᑕᑯᓐᓇᐅᔮᕐᓗᑎᓗ ᐃᓄᒻᒪᕆᓐᓂᒃ ᐱᓇᓱᐊᕐᑐᓂᒃ.
ᓄᓇᓕᐊᕈᐃᑦ: ᕿᒻᒥᖅ ᑐᑲᕐᑐᖅ ᑲᒃᑲᓛᓪᓗ ᐃᓪᓗᒥᒃ ᑫᕙᓪᓓᖃᑦᑕᓱᑎᒃ ᐊᕐᐸᓕᑭᑕᕐᑐᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓐᓇ ᐃᒡᓗᓕᔭᐅᔪᒥᒃ ᑫᕙᓪᓓᓕᕆᕗᑦ.
ᐊᖑᑎᒃ ᐃᓪᓗᓕᐅᕐᑐᖅ. ᒪᔪᕋᐅᑏᓐᓅᑐᖅ ᑎᒍᒥᐊᕐᓱᓂ ᓴᕕᐅᔭᕐᑐᐊᒥᒃ. ᒪᔪᕋᕐᓱᓂ, ᓴᕕᐅᔭᕐᑐᐊᒥᒃ ᖁᓛᓅᕐᓯᔪᖅ ᐸᓇᒥᓄᑦ ᐃᓕᑦᓱᒍ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᑕᑯᒍᓐᓇᑐᒍᑦ ᑎᒍᐊᕆᑦᓱᒍ ᐃᕐᓂᕆᔭᐅᔪᒥᒃ ᐃᒡᓗᓕᔭᐅᔪᒥᒃ ᐅᑦᓯᑐᕐᑐᓴᐅᔮᕐᑐᒥᒃ, ᐊᒻᒪᓗ ᐃᒡᓘᑉ ᐃᓗᖓᓂᒃ ᓴᕕᐅᔭᕐᑕᐅᕋᑖᓂᒃ ᐃᑎᕐᓯᕕᐅᔪᕕᓂᕐᒥᒃ. ᐱᒋᐊᓕᑌᓐᓇᓱᑎᒃ ᓴᕕᐅᔭᕐᑕᐅᔪᑦ ᐃᒡᓘᑉ ᐃᓂᒋᓂᐊᕐᑕᖓᓂ ᐱᒋᐊᕐᑕᐅᓲᕕᓃᑦ, ᑭᓯᐊᓂ ᓴᕕᐅᔭᓕᐅᕆᐊᙯᓐᓈᕋᒥᒃ, ᐃᒡᓗᓕᐊᒥᑕ ᐅᖓᓯᑦᑕᒐᓛᖓᓂᑦ ᓴᕕᐅᔭᓕᐅᓲᕕᓃᑦ ᐊᐳᑎᖃᕐᓂᓴᐅᒻᒪᑦ ᐊᐱᑎᓗ ᓯᑎᓂᕐᓴᐅᓱᓂ.
ᐊᖑᑎᒃ ᓴᕕᐅᔭᕐᑐᐊᑐᖅ ᐃᓪᓗᓴᒥᒃ.
ᐊᖑᑎᒃ ᐃᓕᔨᔪᖅ ᓴᕕᐅᔭᕐᑐᐊᒥᒃ ᐃᓪᓗᒧᑦ, ᑌᒪ ᑕᑯᓴᕐᓱᓂ ᐊᑦᔨᓕᐅᕈᑎᒥᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓐᓇ, ᔦᑯ ᓴᕕᐅᔭᕐᑕᕕᓂᕐᒥᓂᒃ ᐊᖏᔪᒥᒃ ᐃᓕᔨᓕᕐᖁᖅ ᖁᓕᒌᒍᑎᒋᓯᔭᒥᓂᒃ. ᓴᕕᐅᔭᕐᑕᕕᓂᓕᒫᓂᒃ ᑲᑎᓐᖓᓯᐊᒃᑫᓂᖅ ᑲᑕᒐᓂᐊᕐᑎᓇᒋᑦ ᐱᑦᓯᐊᒋᐊᖃᓲᕕᓃᖅ. ᑭᓯᐊᓂ ᑌᒪᓐᖓᓕᒫᑲᓵᒃ, ᑕᕐᕿᖅ ᓈᑐᐊᕐᒪᑦ ᐃᒡᓗᒃ ᐊᓯᑦᔨᒋᐊᖃᓲᕕᓂᖅ.
ᑲᒃᑲᓛᑦ ᐱᖕᖑᐊᑐᑦ ᐃᓪᓘᑉ ᓯᓚᑖᓂ; ᓯᑐᕐᖃᒥ ᐊᐳᑎᒥ ᓯᑐᕋᖕᖑᐊᑐᑦ. ᐃᓪᓗᖅ ᑐᓄᐊᓃᑦᑐᖅ ᐃᓯᕆᒍᑎᓕᒃ ᖁᓛᓂ ᐳᔪᕐᑐᒥᒃ ᐊᒻᒪᓗ ᐃᒐᓛᖃᕐᓱᓂ ᓯᑯᒥᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᑯᑦᓴᐅᔪᖅ ᓂᕈᒥᑦᑐᖅ ᑎᕐᑐᖅ ᐊᓂᐊᒻᒪᑦ ᐃᒡᓗᒥᑦ ᓂᓪᓕᒪᔪᒻᒪᕆᐊᓗᒻᒨᓱᓂ (ᖁᐊᓪᓚᕆᐊᓗᑦᓴᓲᖅ) ᐊᓂᐊᑦᓱᓂ ᐃᓯᕆᒍᑎᐊᐱᒃᑯᑦ. ᐃᒐᓛᖓ, ᐊᖏᔪᐊᓘᒃ ᓂᓛᓘᒃ ᑕᓯᐅᑉ ᓯᑯᖓᓂᑦ ᐱᔭᕕᓂᐅᑦᓱᓂ, ᓈᒻᒪᓯᓕᑎᕐᑕᕕᓂᐅᑦᓱᓂ ᓵᓪᓕᑎᕐᑕᐅᓱᓂᓗ ᐃᒡᓘᑉ ᐃᓗᐊ ᖃᐅᒪᑦᓯᐊᓂᐊᕐᒪᑦ. ᓯᓇᕐᖁᑑᒥᒃ ᒥᑭᔫᑦᓱᓂ ᐃᒐᓛᖃᕐᑐᖅ ᓯᕐᓗᐊᒥ, ᓯᕐᓗᐊᓗ ᖁᐊᕐᓂᒃ ᓂᕿᖃᐅᑎᐅᓲᕕᓂᐅᑦᓱᓂ ᐅᕝᕙᓘᓐᓂᐊᓛᑦ ᐃᖃᓗᓐᓂᒃ. ᓯᕗᓪᓕᐹᖅ ᐃᒡᓗᖅ ᑐᕐᓲᖑᕗᖅ ᕿᒻᒦᑦ ᓯᓂᕝᕕᒋᓲᕆᑦᓱᒍ ᐃᑦᔨᓕᒻᒪᕆᓕᕐᒪᑦ. ᑌᒣᒻᒪᑦ ᑕᑯᒍᓐᓇᑐᒍᑦ ᐊᐳᑏᑦ ᐃᒡᓗᐃᑦ ᓴᓇᒻᒪᖏᓐᓂᒃ ᐊᑦᑕᓇᒐᓛᓐᖏᑐᓂᒃ: ᐱᐊᕃᑦ ᐃᒡᓗᐃᑦ ᖄᖏᓐᓄᑦ ᒪᔪᕋᒍᓐᓇᓲᕕᓃᑦ ᑲᑕᓚᖓᒐᑎᒃ ᐃᓗᐊᓄᑦ.
ᓄᓇᓕᐊᕈᐃᑦ: ᐃᓪᓘᑉ ᓴᓂᐊᓂ ᑲᒃᑲᓛᑦ ᒪᔪᕐᖃᒥ ᓯᑐᕋᖕᖑᐊᑐᑦ, ᐊᒻᒪᓗ ᐊᑦᔨᓕᐅᕈᑎᒧᑦ ᐊᕐᐸᓯᑦᓱᑎᒃ. ᑕᑯᑦᓴᐅᒥᔪᑦ ᐊᕐᓀᑦ ᐊᑦᔨᓕᐅᕈᑎᒥᒃ ᑕᑯᓐᓇᑐᑦ. ᕿᒻᒦᑦ ᑐᑲᕐᑐᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᑕᑯᓐᓇᑐᑎᑦ ᐃᒡᓗᐃᑦ ᐊᑭᓐᓇᖏᓐᓂᒃ ᐃᒡᓗᒥᒃ ᓇᐸᑎᑦᓯᓯᐊᕐᑐᓂᒃ, ᑕᐳᑕᕐᑕᐅᓲᒍᑦᓱᑎᒃ ᐱᕐᓯᓕᕐᐸᑦ ᐊᓄᕐᓯᐅᒌᒃᑯᑕᐅᑦᓱᑎᓘᕐᑐᓂᒃ. ᐊᓄᕆ ᓴᕿᓕᑐᐊᕐᒪᑦ ᐃᒃᑮᓇᕐᓯᐊᓗᑦᓴᓲᖅ ᐊᓄᕆᑎᓪᓗᒍ ᑕᕐᕋᒥᑦ, ᓂᒡᒋᐅᑉ ᐊᑐᐊᕐᓂᖓᓂᑦ ᑕᕐᕋᐅᑉ ᐅᐊᓐᓂᖓᓂᓗ. ᐊᓄᕆ ᓯᕿᓂᕐᒥᖔᕐᑐᖅ ᐁᔪᖓᓂᕐᓴᐅᒫᐱᓲᖅ, ᑭᓯᐊᓂ ᐊᓄᕇᑦ ᐊᑐᓂᑦ ᑎᑭᑎᑦᓯᓲᑦ ᐊᑦᑕᓇᕐᑐᓂᒃ ᐃᒡᓗᒧᑦ ᐊᐳᑎᒧᑦ; ᐊᓄᕆ ᓂᕈᒥᑦᑐᖅ ᐊᐅᑦᓯᑲᐱᓲᒍᕙᓚᐅᕐᑐᖅ ᐃᒡᓗᒥᒃ, ᐃᒡᓗᐃᓗ ᐊᑭᓐᓇᖏᑦ ᑕᐳᑕᕐᑕᕕᓂᐅᑐᐊᕐᒪᑕ ᐃᒡᓗᐃᑦ ᐊᑯᓃᕐᓂᓴᐅᒍᓐᓇᓲᕕᓃᑦ ᑲᑕᒐᓐᖏᓂᕐᒥᓂ. ᒫᓂᑕᒐ ᑕᒍᓐᓇᑐᑎᑦ ᐃᒡᓘᑉ ᓴᓇᒻᒪᖓᓂᒃ, ᑲᑕᒌᒃᑯᑎᖏᑦ ᐊᐳᑎᐅᑎᓪᓗᒋᑦ.
ᑐᕈᓯᖅ ᐃᓪᓘᑉ ᓴᓂᐊᓂ ᓇᖏᕐᑐᖅ, ᐊᒻᒪᓗ ᐃᒐᓛᖓᑎᒍᑦ ᓯᑯᑎᒍᑦ ᐃᑦᓱᐊᖓᑦᓱᓂ. ᐃᑦᓱᐊᖓᒌᕋᒥ ᓯᑐᕐᖃᑯᑦ ᐃᓪᓘᑉ ᐊᑭᓐᓇᖓᒍᑦ ᓯᑐᔪᖅ. ᐃᓪᓗᖅ ᐃᓯᕆᒍᑎᓕᒃ ᐳᔪᕐᑐᒥᒃ.
ᐊᖑᑎᒃ ᐃᓪᓘᑉ ᑭᓪᓕᖓᓂᒃ ᐳᐊᕐᕆᔭᕐᑐᖅ.
ᐊᑦᔨᓕᐅᕐᑕᕕᓃᑦ ᑕᓪᓕᒪᑦ ᐊᕐᓀᑦ ᑲᑎᒪᔪᑦ. ᐃᓚᖓᑦ ᑲᒃᑲᓛᒥᒃ (ᐱᓱᒋᐅᕐᓂᒥᒃ) ᑎᒍᒥᐊᕐᑐᖅ ᐊᑦᔨᓕᐅᕈᑎᒧᑦ ᐱᓱᑦᓱᓂ. ᑌᒪ, ᖃᓂᓪᓕᓱᓂ ᐊᕐᓇᖅ ᑲᒃᑲᓛᒥᒃ ᑎᒍᒥᐊᕐᑐᖅ (ᑲᒃᑲᓛᒥᒃ ᐊᑦᔨᓕᐅᕐᑕᐅᑎᑦᓯᔪᖅ, ᐃᔪᕐᓱᓂᓗ).
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᓯᓚᑦᓯᐊᒍᖃᑦᑕᓕᑐᐊᕐᒪᑦ ᐊᖑᑏᑦ ᐅᖓᓯᑦᑐᒧᑦ ᒪᙯᒋᐊᕐᓯᒪᑎᓪᓗᒋᑦ, ᐊᕐᓀᑦ ᑲᑎᓲᕕᓃᑦ ᒥᕐᓱᖃᑎᒌᓯᑦᓱᑎᒃ ᐊᓯᖏᓐᓂᓘᓐᓃᑦ ᐱᓇᓱᐊᕐᓱᑎᒃ, ᐊᓕᐊᓲᕕᓂᐅᑦᓱᑎᓗ ᓂᕆᖃᑎᒌᒋᐊᒥᒃ. ᑌᒪᓐᖓᓕᒫᓪᓗ ᐳᓛᕐᑐᓂᒃ ᓂᕆᑎᑦᓯᓲᕕᓂᐅᑦᓱᑎᒃ. ᐃᒻᒪᖄ ᐃᓄᐃᑦ ᐳᓛᕐᓱᑎᒃ ᓂᕆᒃᑲᑕᐅᓲᕕᓃᑦ ᑌᒫᑦᓭᓇᖅ ᐳᓛᕐᑕᐅᓕᕋᒥᒃ ᐳᓛᕐᑎᒥᓂᒃ ᓂᕆᑎᑦᓯᓲᕕᓂᐅᒻᒥᑎᓗᒋᑦ. 1956-ᒥ ᓄᓇᕕᒃ ᑐᒃᑐᖃᓚᐅᕐᓯᒪᓐᖏᒪᑦ, ᑲᒻᐸᓂᒃᑯᑦ ᑐᒃᑐᐊᕈᔦᑦ ᐊᒥᖏᓐᓂᒃ ᐊᒃᓛᕕᒻᒥᑦ ᑎᑭᑎᑦᓯᓚᐅᕐᓯᒪᔪᑦ ᑖᕙᓂᒥᐅᑦ ᐊᓛᔅᑲᒥ ᑐᒃᑐᐊᕈᕐᓂᒃ ᐱᕈᕐᓰᕕᖃᓚᐅᕐᓯᒪᒻᒪᑕ. ᑌᒣᓘᕐᓱᑎᒃ, ᑲᒻᐸᓂᒃᑯᑦ ᐃᓄᐃᑦ ᓄᓇᓕᖏᓐᓂᒃ ᐊᒥᖃᕐᑎᓯᒍᓐᓇᓚᐅᕐᓯᒪᔪᑦ ᐱᑕᖃᓐᖏᑐᓂᒃ. ᓯᐊᕉᓕᕐᒪᑦ, ᑐᒃᑐᐃᑦ ᐅᑎᓕᓚᐅᕐᓯᒪᔪᑦ ᐊᒥᓱᒻᒪᕆᐅᓕᕐᓱᑎᒃ, ᐅᓪᓗᒥᓗ ᐊᐅᓚᓲᒍᓕᕐᓱᑎᒃ ᑕᕐᕋᒪᕆᐊᓗᒻᒧᑦ ᐃᒪᕐᐱ ᑎᑭᑐᐃᓐᓇᕋᑕᕐᓱᒍ.
ᐊᖑᑎᒃ ᓯᓚᒥ ᐱᓱᑦᑐᖅ, ᐊᑦᔨᓕᐅᕈᑎᒃᑲᑐᒧᑦ ᒪᓕᑦᑕᖅ ᑲᒃᑲᓛᓄᑦ ᐊᒻᒪᓗ ᐊᕐᓇᒧᑦ ᐁᑎᓪᓗᒍ ᓂᑯᕐᕋᔪᓄᑦ ᐃᓪᓘᑉ ᓴᓂᐊᓂ.
ᐊᕐᓀᑦ ᐃᓪᓘᑉ ᑲᑕᖓᑕ ᓴᓂᐊᓂ ᓂᑯᕐᕋᔪᑦ. ᐃᓚᖓᑦ ᑲᒃᑲᓛᒥᒃ ᑎᒍᒥᐊᕐᑐᖅ (ᐱᓱᒋᐅᕐᓂᒥᒃ), ᑌᒪ ᐃᓪᓗᒧᑦ ᐃᑎᕐᓂᐊᓕᕋᒥ. ᐃᓪᓘᑉ ᑲᑕᖓᑕ ᖁᓛᓂ ᒪᕐᕉᒃ ᐹᓘᒃ ᕿᔫᓐᓂ ᑲᑉᐳᑎᓯᒪᔫᓐᓂᒃ ᐊᐳᑎᒥ ᐸᕐᓂᓯᔫᒃ.
ᐊᕐᓀᑦ ᑕᓪᓕᒪᑦ ᑐᑭᓕᕇᑦᓱᑎᒃ ᐱᓱᑦᑐᑦ. ᐃᓘᓐᓇᑎᒃ ᕿᑐᕐᖓᒥᓂᒃ ᐊᒪᐅᑎᓄᑦ ᐊᒫᕐᑐᑦ.
ᑖᒃᑯᓭᓐᓀᑦ ᑕᓪᓕᒪᑦ ᐊᕐᓀᑦ, ᑐᓄᖕᖓᔪᑦ. ᐱᓱᒍᓐᓀᓱᑎᒃ ᕿᕕᐊᕐᑐᑦ, ᐊᑦᔨᓕᐅᕈᑎᒥᒃ ᑕᑯᓐᓇᓯᑦᓱᑎᒃ. ᐅᖓᑖᓃᑦᑐᖅ ᐃᓪᓗᖅ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᐊᕐᓇᖅ ᐊᒪᐅᓯᔭᕐᑐᖅ. ᐊᑦᔨᓕᐅᕈᑎᒥᒃ ᖁᖓᑦᑐᖅ.
ᑕᓪᓕᒪᑦ ᐊᕐᓀᑦ ᐱᓱᑦᑐᑦ ᑐᑭᓕᕇᑦᓱᑎᒃ (ᕿᑐᕐᖓᒥᓂᒃ ᐊᒪᐅᑎᓄᑦ ᐊᒫᕐᑐᑦ). ᐊᑦᔨᓕᐅᕈᑎᒧᑦ ᒪᓕᑦᑌᑦ ᐊᖑᑏᓐᓂᒃ ᒪᕐᕉᓂᒃ ᖄᖐᑎᓪᓗᒋᑦ (ᖃᒧᑏᒃ ᐱᕐᕌᖏᓐᓂᒃ ᓇᓄᐃᕐᑑᒃ) ᑌᒪ ᐃᓪᓗᒧᑦ ᐃᑎᕐᓂᐊᓕᕋᒥᒃ.
ᖃᓂᑦᑑᑎᓪᓗᒍ ᐊᑦᔨᓕᐅᕐᑕᕕᓂᖅ ᐊᕐᓇᖅ ᑲᒃᑲᓛᒥᒃ (ᐱᓱᒋᐅᕐᓂᒥᒃ) ᐊᒫᕐᑐᖅ ᐊᒪᐅᑎᒧᑦ. ᑲᒃᑲᓛᒥᒃ ᐅᖄᕕᓕᒃ ᐊᑦᔨᓕᐅᕈᑎᒥᓪᓗ ᖁᖓᑦᓱᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᓚᓕ ᐊᒫᕐᑐᖅ ᓄᑲᕐᐹᒥᓂᒃ ᐊᒪᐅᑎᒧᑦ; ᑖᓐᓇ ᐊᒪᐅᑎᒃ ᑐᒃᑐᔭᐅᑦᔭᖏᑦᑐᖅ.
ᐊᖑᑎᒃ ᖃᒧᑏᒃ ᐱᕐᕌᒋᓐᓂᒃ ᓇᓄᐃᕐᑐᖅ, ᕿᔪᑲᓪᓚᒥᒃ ᓯᒃᑭᑕᐅᓕᖓᔪᒥᒃ ᐊᑐᕐᓱᓂ. ᐊᑦᔨᓕᐅᕈᑎᒥᒃ ᖁᖓᑦᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᔪᒋᓂ. ᖃᒧᑎᒥᑕ ᐱᕐᕌᒋᓐᓂᒃ ᓯᕐᒥᓕᕐᑐᐃᔪᕕᓂᖅ, ᓯᕐᒥᖅ ᐊᐅᑦᑎᖄᕐᓱᒍ ᑌᒪ ᐱᕐᕌᓅᕐᓱᒍ ᖁᐊᕐᓯᐊᕆᓂᐊᕐᓗᒍ. ᑌᒪ ᙯᒍᕐᓱᒋᒃ ᓇᓄᐃᕐᓂᐊᓕᕋᒥᒋᒃ ᒪᓂᕋᐅᓂᐊᕐᒪᑎᒃ, ᒪᓂᕋᐅᓕᑐᐊᕋᒥᓪᓗ ᓵᑦᑐᐊᐱᒥᒃ ᓂᓚᖃᓲᒍᑦᓱᑎᒃ ᖃᒧᑏᒃ ᐱᐊᑦᑑᓂᐊᕐᒪᑎᒃ ᐃᖏᕐᕋᓕᕈᑎᒃ ᐊᐳᑎᑎᒍᑦ ᓯᑯᑎᒍᓪᓗ. ᐊᑯᓃᓚᖓᓗᓂ ᒪᙯᒋᐊᓚᖓᑕᒫᑦ, ᔪᒋᓂ ᓱᓇᓕᒫᒥᓂᒃ ᐱᐅᑦᓯᐊᒐᓗᐊᕐᒪᖔᑕ ᖃᐅᔨᒐᓱᐊᓲᖅ ᓱᑲᓪᓚᓴᕐᓂᕈᓂ ᐅᐸᓗᐃᔭᐅᓂᐊᓐᖏᓇᒥ; ᖃᒧᑏᒃ ᐊᑐᐃᓐᓇᕈᕐᑎᑕᐅᓲᒃ ᓱᑲᑦᑑᓂᐊᕐᒪᑎᒃ ᐱᐊᑦᑐᓯᐊᖑᓗᑎᒃ. ᓯᐊᕐᕆᔭᐅᑎᑯᑖᕐᑎᐅᔮᕐᑐᑦ ᓯᐊᕐᕆᔭᐅᑎᑯᑖᒥᓂᒃ ᐱᐊᓗᓯᕐᑐᐃᓱᑎᒃ, ᑭᓯᐊᓂ ᐅᕙᓂ, ᓄᓇᒥᑦ ᐱᔪᓂᑦ ᖃᒧᓯᐅᕈᑎᖃᕆᐊᖃᓲᖅ.
ᐊᓯᐊᒍᑦ ᐊᑦᔨᓕᐅᕐᑕᕕᓂᖅ ᑖᓐᓇᓭᓐᓇᖅ ᐊᖑᑎᒃ, ᖃᒧᑏᓐᓂᒃ ᓇᓄᐃᕐᑐᖅ. ᕿᒻᒥᖅ ᑭᓪᓕᖓᓂ ᐃᑦᓯᕙᔪᖅ.
ᖃᓂᑦᑑᑎᓪᓗᒍ ᐊᑦᔨᓕᐅᕐᑕᕕᓂᖅ ᐊᖑᑎᒃ ᖃᒧᑏᒃ ᐱᕐᕌᒋᓐᓂᒃ ᓇᓄᐃᕐᑐᖅ. ᐊᑦᔨᓕᐅᕈᑎᒥᒃ ᖁᖓᑦᑐᖅ.
ᖃᓂᑦᑑᑎᓪᓗᒍ ᐊᑦᔨᓕᐅᕐᑕᕕᓂᖅ ᐊᖑᑎᐅᑉ ᐊᒡᒐᖏᒃ, ᐃᓕᔨᒐᓱᐊᕐᑐᖅ ᐊᑦᓱᓈᒧᑦ ᓇᐅᓚᒥᒃ (ᓇᑦᓯᓂᐅᑎᒥᒃ).
ᒪᕐᕉᒃ ᐊᖑᑏᒃ ᐊᑐᐃᓐᓇᕈᕐᑎᑑᒃ ᓇᑦᓯᓯᐅᕈᑎᓂᒃ ᓴᓇᕐᕈᑎᓂᒃ; ᐁᑉᐸᖓ ᐋᕐᕿᓱᐃᔪᖅ ᐃᒋᒪᐅᑉ ᐊᑦᓱᓈᖓᓂᒃ, ᐁᑉᐸᖓ ᐊᕙᑕᕐᒥᒃ ᐳᕕᕐᓯᑎᓪᓗᒍ. ᐊᑦᔨᓕᐅᕈᑎᒥᒃ ᖁᖓᑦᑑᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᐃᓕᓐᓂᐊᑎᑕᐅᔪᖓ ᐊᕙᑕᓕᐅᕈᓯᕐᒥᒃ ᓇᑦᓯᔭᒥᑦ, ᓇᑦᓯᔭᖅ ᐅᓕᑦᑎᓱᒍ ᑌᒪ ᓱᑲᖓᒐᓱᐊᒻᒪᕆᑦᑎᓗᒍ ᒥᕐᓱᑕᐅᓂᐊᓕᕐᒪᑦ ᑭᓪᓛᐱᖃᑐᐃᓐᓇᑎᓪᓗᒍ ᐳᕕᕐᑕᐅᐸᑦ ᐅᐊᕐᑕᐅᑉ ᐃᓂᒋᒐᔭᕐᑕᓂᒃ. ᐊᕙᑕᖅ ᕿᓚᑦᑕᐅᓯᐊᓲᖅ ᐆᒪᔪᕐᑕᐅᒐᓱᐊᕐᑐᖅ ᐊᔪᒐᔭᓐᖏᒪᑦ, ᐅᓈᕐᑕᕕᓂᐅᒐᓗᐊᕈᓂ ᐊᕐᖁᓇᓪᓚᕆᑦᑕᐅᓗᓂᓘᓐᓃᑦ, ᐅᕝᕙᓘᓐᓃᑦ ᖁᕿᑦᑕᕕᓂᐅᒍᓂ ᑐᖁᒋᓐᖏᑕᖓᒍᑦ ᐊᖑᑏᑦ ᐅᓈᕆᒋᐊᑲᓪᓚᒋᐊᖃᓲᒍᓐᓂᒪᑕ ᑐᖁᓴᐅᑎᒥᒃ.
ᑖᒃᑯᓭᓐᓈᒃ ᐊᖑᑏᒃ ᒪᕐᕉᒃ, ᐊᕙᑕᕐᒥᒃ ᕿᓚᑦᓱᐃᔫᒃ ᐃᒋᒪᐅᑉ ᐊᑦᓱᓈᖓᓄᑦ. ᐊᖑᑏᒃ ᐁᑉᐸᖓ ᐆᒪᔪᕐᒥᒃ ᑎᒃᑯᑐᖕᖑᐊᓴᕐᑐᖅ, ᓄᓇᒥ ᐅᖓᓯᑦᑐᒥ (ᐆᒪᔪᕐᓯᐅᓂᕆᓛᕐᑕᒥᓂᒃ ᐊᑑᑎᖕᖑᐊᓴᕐᑑᒃ).
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑌᒣᒻᒪᑕᒐ… ᒫᓂ ᑕᐸᑐᓵᓗᑳᓐᖑᐊᑐᑦ ᐅᕙᓐᓂᒃ, ᐃᓚᖓᑦᑕᐅᖅ ᐅᕙᓐᓂᒃ ᓄᑦᓱᑎᓪᓗᒍ ᑕᑯᑎᑦᓯᒍᒪᒐᒥ ᐅᑦᔪᕕᓂᕐᒥᒃ ᐅᓪᓘᒃ ᒪᕐᕉᒃ ᓈᓕᕐᑑᒃ ᐅᑦᔪᑕᐅᓚᐅᔪᑎᓪᓗᒍ; ᕿᒧᑦᓯᓄᑦ ᐊᑦᓱᓈᑦᓭᑦ, ᐊᓄᑦᓭᑦ ᐃᐱᕋᐅᑕᑦᓭᓗ ᓇᑲᑎᕐᑕᐅᓯᒪᓕᕇᕐᑐᑦ.
ᐊᖑᑏᒃ ᒪᕐᕉᒃ ᐁᑉᐸᖓ ᐃᒋᒪᒥᒃ ᐃᒋᑦᓯᔪᖅ, ᐊᒻᒪᓗ ᒪᕐᕉᒃ ᐊᖑᑏᒃ ᑖᒃᑯᐊ ᓇᐅᓕᕐᓯᒪᔪᒥᒃ ᓇᑦᓯᒥᒃ ᐅᓂᐊᖕᖑᐊᓴᕐᑑᒃ, ᐱᒐᓱᐊᒻᒪᕆᖕᖑᐊᓴᕐᓱᑎᒃ ᐃᒫᓃᑦᑐᒥᒃ ᖃᕝᕕᑎᑦᓯᖑᐊᑦᓴᑑᒃ. ᐃᔪᕐᑑᒃ ᐊᑦᔨᓕᐅᕈᑎᒥᒃ ᑕᑯᓐᓇᓱᑎᒃ.
ᕿᑲᕐᑐᖅ ᐊᑦᔨᓕᐊᕕᓂᖅ ᓇᑦᓯᖅ ᑐᖁᖓᔪᖅ, ᓇᐅᓕᑦᓯᒣᓐᓈᑐᖅ ᐊᒻᒪᓗ ᐃᒋᒪᒃ ᐊᑕᖏᓐᓈᓱᓂ.
ᐊᕐᓇᐅᑉ ᐊᒡᒐᖓ ᖁᓪᓕᒥᒃ ᐃᑭᑦᓯᒐᓱᐊᕐᑑᑉ ᐃᒃᑭᑎᒧᑦ. ᑕᕐᖁᑎᒃ (ᕿᔫᑦᓱᓂ) ᖁᓪᓕᐅᑉ ᖄᖓᓃᑦᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᑕᑯᒍᓐᓇᑐᒍᑦ ᖁᓪᓕᒥᒃ; ᑕᑯᒍᓐᓇᒍᒪᒐᑦᑕ ᐃᒡᓘᑉ ᐃᓗᐊᓕ ᓱᔪᖃᓕᕐᒪᖔᑦ, ᐃᒡᓗᖅ ᐊᒻᒫᐱᑦᑕᕗᑦ ᖃᐅᒪᓂᕐᓴᐅᓂᐊᕐᒪᑦ, ᓴᐅᒥᐊᓗᒃ ᑌᒣᓘᓚᐅᕐᓯᒪᒻᒥᒪᑦ 1920-ᓂ.
ᐊᕐᓇᐅᑉ ᐊᒡᒐᖓ ᖁᓪᓕᐅᑉ ᐃᑯᒪᓂᖓᓂᒃ ᓈᒻᒪᓯᓪᓕᑎᕆᔪᖅ ᑕᕐᖁᑎᒧᑦ.
ᐊᑦᔨᓕᐊᕕᓂᖅ ᐊᕐᓇᖅ ᖁᓪᓕᐅᑉ ᐃᑯᒪᓂᖓᓂᒃ ᓈᒻᒪᓯᓪᓕᑎᕆᔪᖅ ᑕᕐᖁᑎᒧᑦ. ᑲᒃᑲᓛᒥᒃ ᐊᒪᐅᑎᒧᑦ ᐊᒫᕐᑐᖅ. ᐅᖄᑦᓱᓂ, ᐊᒪᐅᑎᒥᓂᒃ ᐋᕐᖀᒋᐊᕐᓱᓂ, ᐊᒻᒪᓗ ᐊᑦᔨᓕᐅᕈᑎᒥᒃ ᖁᖓᑦᓱᓂ.
ᐊᕐᓇᖅ ᐃᑦᓯᕙᔪᖅ ᐃᓪᓘᑉ ᐃᑦᓯᕙᐅᑕᖓᓂ ᐃᓪᓗᒥ. ᑲᒥᒻᒥᒃ ᑲᒥᓂᑦᓴᐅᑎᒧᑦ ᑲᒥᓂᑦᓴᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᓲᓯ ᐋᓗᐸ, ᐊᐅᓚᔨᕐᖂᑐᖓ ᐊᖑᑎᖓ ᐋᓐᓂᐊᕕᒻᒨᑕᕕᓂᐅᑎᓪᓗᒍ, ᐃᓅᒻᒥᔪᑦ ᐊᒥᓱᒐᓛᑦ ᑌᒣᑕᐅᓐᓂᒥᒻᒪᑕ, ᐅᒥᐊᕐᔪᐊᑰᕐᑎᑕᐅᑦᓱᑎᒃ ᒪᑦᑖᕕᐊᓗᒃᑯᑦ ᓰ.ᑎ.ᖃᐅ-ᑯᑦ. ᑌᑦᓱᒪᓂᒋᐊᖅ ᓯᑯᓯᐅᑎ ᑎᑭᑐᐊᕐᒪᑦ, ᓰ.ᑏ.ᖄᐅ, ᐊᒥᓱᒐᓛᑦ ᐃᓄᐃᑦ ᓱᕐᖁᐃᑕᐅᓚᕿᕙᓚᐅᕐᑐᑦ ᐳᕙᓪᓗᒋᐊᖏᑦ ᑌᒪ ᐊᐅᓪᓚᐅᔭᐅᓚᕿᓂᐊᓕᕋᒥᒃ. ᐃᓄᐃᑦ ᐊᐅᓪᓚᓯᒪᕙᓚᐅᕐᑐᑦ ᑕᕐᕿᓂ ᐱᖓᓲᔪᕐᑐᓂ, ᐃᓛᓐᓂ ᐃᓄᐃᑦ ᐅᑕᕐᕿᒋᐊᖃᕐᐸᓚᐅᕐᑐᑦ ᐊᐅᔭᐅᓛᓕᕐᒥᔪᒥᒃ ᐁᑉᐸᖏᑦ ᐊᖓᔪᕐᖄᖏᓪᓘᓃᑦ ᐊᓂᕐᕋᓛᕐᓂᖏᓐᓂᒃ ᐋᓐᓂᐊᕕᒻᒥᑦ. ᓲᓯ ᑲᒥᓂᑦᓴᑐᖅ.ᑖᒃᑯᐊ ᑲᒦᒃ ᖃᓪᓕᓂᖃᑦᔭᖏᑦᑑᒃ ᐊᓗᒋᒃ ᖃᓪᓕᓂᓐᖑᖃᓕᐅᑦᔨᑕᐅᓲᒍᒻᒪᑎᒃ ᐊᓪᓓᑦ ᑲᒥᖏᑎᑐᑦ. ᐅᓇ ᑲᒥᒃ ᐅᑦᔪᔭᖅ, ᕿᓯᖓ ᐃᑦᔪᔪᐊᓗᒃ ᐃᒻᒥᖃᔭᓐᖏᑑᑦᓱᓂᓗ ᑭᓯᐊᓂ ᕿᑐᒻᒪᓴᕐᓯᒪᓐᖏᑐᖅ, ᑌᒣᒻᒪᑦ ᖃᐅᓯᓕᑐᐊᕋᒥ ᓯᑎᓕᒻᒪᕆᓲᖅ ᐊᕿᓪᓕᓴᕐᑕᐅᒋᐊᖃᓚᕿᑦᓱᓂ ᑭᓕᐅᑕᒧᑦ ᑲᒥᓂᑦᓴᐅᑎᒧᓪᓘᓃᑦᐊᑎᔭᐅᒍᓐᓇᓯᑦᓯᐊᓂᐊᕐᒪᑦ. ᐅᓇᑦᑕᐅᖅ ᐊᕐᓀᑦ ᐱᓇᓱᒋᐊᖃᕐᐸᑕᕕᓂᖏᑦᑕ ᐃᓚᖓᑦ.
ᑖᓐᓇᓭᓐᓇᖅ ᐊᕐᓇᖅ, ᑲᒥᐅᑉ ᐁᑉᐸᖓᓂ ᑲᒥᓂᑦᓴᓯᒻᒥᔪᖅ ᑕᓯᑎᕐᓱᒍ. ᑐᓄᔪᖅ ᐅᖄᕕᖃᓯᑦᓱᓂ ᕿᑐᕐᖓᒥᓂᒃ.
ᐊᕐᓇᖅ ᒥᑎᐅᑉ ᖁᓂᕈᖏᓐᓂᒃ ᓴᓃᔦᔪᖅ. ᓴᓃᔦᒍᑎᖓ ᕿᔪᒃ ᐃᕐᓯᕕᒃ ᐊᑦᓱᓈᕐᑕᓕᒃ ᑭᑭᐊᓄᑦ ᐃᓕᐅᕐᖃᓯᒪᔪᓂᒃ. ᑐᓄᐊᓃᑦᑐᖅ ᐃᓪᓘᑉ ᐊᑭᓐᓇᖓᓂ ᓇᐸᑦᓱᓂ ᑲᒥᓂᑦᓴᐅᑎᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑌᑦᓱᒪᓂᐅᑎᓗᒍ ᑯᓂᒍᕐᑕᑐᕕᓃᑦ ᒥᑏᑦ ᐅᓪᓗᖏᓐᓂᑦ – ᐃᓄᐃᓪᓗ ᖁᓂᒍᕐᓯᐅᓯᑎᕕᓂᐅᑦᓱᑎᒃ – ᒥᑏᑦ ᐅᓪᓗᓕᐅᓲᒍᒻᒪᑕ ᖁᓂᒍᕐᒥᓂᒃ ᐊᑐᕐᓱᑎᒃ. ᐅᖃᐅᓯᖅ ᖁᓂᒍᖅ ᐱᓯᒪᔭᕗᑦ ᒥᑏᑦ ᖁᓂᒍᖏᓐᓂᑦ, ᒥᑎᕐᒥᑦ. ᑌᒪ ᖁᓂᒍᕐᓂᒃ ᐅᓗᓐᓂᐊᓕᕋᒥᒃ ᐊᑦᓱᓈᓗᑳᑎᒍᑦ ᓱᑲᖓᒐᓱᐊᒻᒪᕆᑦᑐᑯᑦ ᓴᓃᔭᕐᓱᒋᑦ, ᖁᓂᒍᐃᑦ ᐅᕿᑦᑐᐊᐱᐅᒐᒥᒃ ᐊᑦᓱᓈᓄᑦ ᓂᐱᑐᐃᓐᓇᖃᑦᑕᑎᓪᓗᒋᑦ.
ᐊᕐᓇᖅ ᓇᑲᑎᕆᔪᖅ ᑲᒥᐅᑉ ᐊᓗᖓᓂᒃ ᐅᓗᒥᓄᑦ, ᕿᔫᑉ ᖄᖓᓃᑦᑎᓗᒍ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᓇᑦᓯᖓᔭᑐᖃᖅ, ᓲᓯ ᐋᓗᐸᐅᑉ ᐊᓈᓇᖓ ᖃᒧᒑᓗᒻᒧᓗ ᐅᑯᐊᕆᔭᐅᑦᓱᓂ, ᑌᑦᓱᒥᖓᐅᑫᓐᓇᑐᖅ ᐃᒡᓗᒥᒃ ᓲᖑᓯᓕᕐᑕᐅᑫᓐᓇᑐᒥᒃ ᓇᒻᒥᓂᓕᒃ. ᓇᑦᓯᖓᔭᖅ ᐃᓕᑦᑎᑐᑦᓴᐅᔮᓕᕐᑐᖅ ᓇᑦᓯᔭᒥᒃ. ᐅᓇ ᑲᒥᐅᑉ ᐊᓗᑦᓴᖓ ᑲᓈᕐᒨᑕᐅᓚᖓᑦᓱᓂ ᐊᓗᓕᒫᑦᓯᐊᖓᑎᒍᑦ ᒥᕐᓱᓗᒍ.
ᖃᓂᓐᓂᓴᐅᑎᓪᓗᒍ ᐊᕐᔨᓕᐅᕐᑕᕕᓂᖅ ᐊᕐᓇᖅ ᑖᓐᓇᓭᓐᓇᖅ, ᑲᒥᐅᑉ ᐊᓗᖓᓂᒃ ᑭᓂᑎᕐᑐᖅ ᐊᕿᓪᓕᑎᕐᓱᒍ (ᑖᓐᓇᓭᓐᓇᐅᖂᕐᑐᒥᒃ ᐊᓗᒻᒥᒃ ᐅᓗᒥᓄᑦ ᐃᓕᑦᑎᑫᓐᓇᑕᒥᓂᒃ).
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑭᓯᐊᓂ ᒥᕐᓱᒋᐊᓚᐅᕋᓂ ᓯᓈᖓᓂᒃ ᑭᓗᖃᕐᕕᒋᓚᖓᔭᕐᒥᓂᒃ ᑭᓂᑎᕐᖄᓲᖅ ᕿᓯᔦᑦ ᓯᑎᔪᐊᓘᒻᒪᑕ ᕿᑐᒻᒪᓴᕐᑕᐅᓂᓐᖏᓇᒥᒃ, ᑌᒣᒻᒪᑦ ᓄᕙᒻᒥᓄᑦ ᖃᐅᓯᓕᕐᑎᕆᑦᓱᓂ ᑭᓂᑎᓯᓲᖅ ᐊᕿᓪᓕᓴᕐᓱᒍ ᒥᕐᓱᓕᕐᐸᑦ ᒥᕐᖁᑎᒃ ᐱᔭᕐᓃᓘᓐᖏᓂᕐᓴᐅᓂᐊᕐᒪᑦ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᒥᕐᖁᑎᖃᐅᑎᒃ (ᑎᒻᒥᐊᑉ ᐊᒥᕕᓂᖓ), ᐃᕙᓗᑦᓴᓂᒃ ᑕᑕᑦᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᒥᕐᖁᑎᖃᐅᑎᒃ ᐊᖏᔪᕕᓂᐅᑦᓱᓂ ᑑᓪᓕᔭᖅ, ᐅᓕᓐᖓᔪᖅ ᐅᑲᓕᔭᕐᑎᑐᑦ. ᒥᕐᖁᑎᖃᐅᑎᑦᓯᐊᕌᓗᒃ ᓄᑮᑦ (ᐃᕙᓗᐃᑦ) ᐃᓗᐊᓃᑦᑐᑦ ᒥᕐᓱᕈᑕᐅᓲᑦ ᓱᔪᑲᐱᓐᖏᓂᕐᓴᐅᓲᒍᒻᒪᑕ. ᑐᒃᑐᖃᓐᖏᑐᐊᕐᒪᑦ ᕿᓚᓗᒉᑦ ᐊᓯᖏᓪᓘᓃᑦ ᐆᒪᔪᐃᑦ ᓄᑭᖏᓐᓂᒃ (ᐃᕙᓗᖏᓐᓂᒃ) ᐃᕙᓗᓕᐅᓲᕕᓃᑦ.
ᐊᕐᓴᖅ ᑎᒍᓯᔪᖅ ᐃᕙᓗᒻᒥᒃ ᒥᕐᖁᑎᖃᐅᑎᒥᑦ ᐊᒻᒪᓗ ᑭᒍᑎᒥᓄᑦ ᐊᕿᓪᓕᑎᓯᑦᓱᒍ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑭᓯᐊᓂ ᐱᐅᓂᕐᐹᓯᐊᖅ ᓄᑭ ᑐᒃᑐᕕᓂᕐᒥᑦ ᐱᔭᐅᕙᑦᑐᕕᓂᖅ, ᓂᐅᒋᓐᓂᑦ ᐱᑦᓱᒍ, ᐃᕙᓗᓕᐊᕆᑦᓱᒍ, ᐊᒥᓲᓐᖏᑐᐊᐱᓐᓂᒃ ᐃᕙᓗᓕᐊᕆᓚᖓᔭᕐᒥᓂᒃ ᐊᒧᓯᓲᒍᑦᓱᑎᒃ ᕿᓯᓕᕆᒍᑎᒋᓂᐊᕐᑕᒥᓂᒃ. ᓄᑭ (ᐃᕙᓗᒃ) ᑕᓯᓲᖅ ᖃᐅᓯᓕᒐᓛᐱᑦᑐᕕᓂᐅᑐᐊᕋᒥ, ᑌᒣᒻᒪᑦ ᐱᐅᔪᓪᓗᑐᐊᓘᓲᖅ ᐃᒻᒥᖃᔭᓐᖏᑐᓂᒃ ᑭᓗᖃᓲᒍᒻᒪᑕ ᑭᓗᖏᑦ ᖁᒻᒧᑦ ᐊᒻᒧᓗ ᐃᖏᕐᕋᑐᐃᓐᓇᑎᓗᒋᑦ.
ᖃᓂᑦᑑᑎᓗᒋᑦ ᐊᑦᔨᓕᐅᕐᑕᕕᓃᒃ ᐊᒡᒐᖏᒃ ᐃᕙᓗᒻᒥᒃ ᐊᕕᑦᓯᔪᖅ ᐊᑐᓚᖓᔭᒥᓂᒃ ᒥᕐᓱᓗᓂ.
ᐊᓯᐊ ᓂᒪᖕᖏᑐᖅ ᐊᑦᔨᓕᐅᕐᑕᕕᓂᖅ ᒥᕐᖁᑎᖃᐅᑎᖓ ᐃᕙᓗᑦᓴᓂᒃ ᑕᑕᑦᑐᖅ.
ᖃᓂᑦᑑᑎᓪᓗᒋᒃ ᐊᑦᔨᓕᐅᕐᑕᕕᓃᒃ ᐊᒡᒐᖏᒃ ᐃᕙᓗᑦᓴᔭᒥᒃ ᑎᒍᒻᒥᑐᕐᓱᓂ ᐊᒻᒪᓗ ᑫᕙᓪᓚᑎᕆᑦᓱᓂ ᐊᑕᐅᓯᕐᒥᒃ ᑕᑭᑦᑐᑳᒥᒃ.
ᐊᕐᓇᖅ ᒥᕐᓱᓯᔪᖅ ᕿᓯᔭᒥᒃ ᐃᕙᓗᒃ ᐊᑐᓯᑦᓱᒍ.
ᐊᕐᓇᖅ ᑕᓯᑎᕆᔪᖅ ᐊᕿᓪᓕᓭᑦᓱᓂᓗ ᑲᒥᐅᑉ ᐊᓗᖓᓂᒃ ᐊᒡᒐᒥᓄᑦ.
ᐊᕐᓇᖅ ᓴᑰᑦᑐᖅ ᕿᓯᒻᒥᒃ ᓴᕕᕋᔭᕐᒥᒃ ᓴᑰᒍᑎᖃᕐᓱᓂ. ᕿᓯᓐᓂᒃ ᐊᕿᓪᓕᓭᒍᑎᒃ ᐊᑭᓐᓇᒥ ᓇᐸᔪᖅ ᐅᖓᑖᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ, ᓇᑦᓯᖓᔭᖅ ᐅᑦᔪᔭᒥᒃ ᑭᓕᐅᑕᕐᑐᖅ ᐊᓗᓕᐊᑦᓴᒥᓂᒃ ᐊᕿᓪᓕᑎᕆᒐᓱᐊᕋᒥ. ᐅᑦᔪᔭᖅ ᐊᖏᔪᐊᓘᔮᕐᑐᖅ ᑭᓯᐊᓂ ᓇᑦᓯᖓᔭᐅᑉ ᓴᓂᕋᖓᖏᑦᑎᒍᑦ ᐃᒧᓚᖓᔭᖓ ᑲᓈᖓᓄᑦ ᒥᕐᓱᓂᐊᕋᒥᐅᒃ, ᑕᑯᒍᓐᓇᑐᑎᑦ ᖃᓄᖅ ᐊᓗᖓ ᐃᒧᓲᒍᒻᒪᖔᑦ ᒥᕐᓱᑕᐅᓚᖓᑦᓱᓂ ᖃᓪᓕᓂᖓᓄᑦ ᑲᓈᖓᓄᓗ.
ᓂᒪᖕᖏᑐᑦ ᐊᑦᔨᓕᐊᕕᓃᑦ 4 - 5 ᑲᒦᑦ ᐃᓪᓗᒥ, ᓱᓇᔭᐅᓂᖏᑦ ᐊᑦᔨᒌᖕᖏᑐᑦ, ᐃᓚᐅᑎᓪᓗᒋᒃ ᓇᑦᓯᐅᑉ ᒥᕐᖁᔭᖏᑦ ᐊᒻᒪᓗ ᓇᑦᓯᐅᑉ ᕿᓯᖏᑦ.
ᓯᑕᒪᑦ ᓂᕿᑐᐃᓐᓇᒥᒃ ᓂᕆᔪᑦ (ᐅᕝᕙᓘᓐᓃᑦ ᐆᒪᔪᕕᓂᕐᓂᒃ ᕿᒻᒥᖃᐅᑎᑦᓴᓂᒃ) ᐊᐳᑎᒥ, ᓯᓚᒦᑦᓱᑎᒃ.
ᐊᐅᓚᔫᓕᐊᕕᓂᖅ ᓄᓇ (ᐊᐅᓚᔫᓕᐅᕈᑎᒃ ᓂᒪᕐᑎᓗᒍ) ᑕᑯᑦᓴᐅᓯᑎᓪᓗᒋᒃ ᒪᕐᕉᒃ ᐊᖑᑏᒃ ᐅᖄᖃᑦᑕᐅᑎᔫᒃ, ᐊᖑᑎᐅᑉ ᐁᑉᐸᖓ ᑕᕆᐅᒥᒃ ᑕᑯᓐᓇᑐᖅ, ᓯᓈᒥᓪᓗ ᐊᒻᒪᓗ ᐃᒪᕐᒥᒃ. ᑌᒪ ᑕᑯᒋᐊᓪᓚᑐᒍᑦ ᓄᓇᒥᒃ ᑕᑯᑦᓴᐅᑎᓪᓗᒍ ᖃᔭᖅ ᓄᓇᒦᑦᑐᖅ ᐊᒻᒪᓗ ᐃᓄᐃᑦ ᓴᓂᐊᓂ ᓂᑯᕐᕋᔪᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑌᒪᓐᖓᓕᒫᑲᓵᒃ ᐊᓄᕆᓕᑐᐊᕐᒪᑦ ᓯᕿᓂᕐᒥᑦ, ᓯᑯᐊᓗᒃ ᑎᑦᑕᐅᓲᖅ ᑲᖏᕐᓱᒥᑦ ᐊᓂᓚᕿᑦᓱᓂ. ᑕᒐ ᑐᕓᕐᒪᑦ ᕿᕐᓂᖓᔪᖅ ᐳᔫᔮᕐᑐᖅ ᓄᐃᔪᖅ ᐅᔪᕆᒥᐊᕐᒥ ᑐᑭᓯᔭᐅᑦᓱᓂᓗ ᑐᕓᕐᓯᒪᓕᕆᐊᖓ. ᐊᖑᑏᑦ ᕿᒧᑦᓯᓱᑎᒃ ᑐᕙᓕᐊᓲᕕᓃᑦ ᓯᓈᓕᐊᕐᓱᑎᒃ. ᑕᑯᒍᓐᓇᑐᑎᑦ ᐃᓐᓈᕈᐊᐱᐅᔮᕐᑐᒥᒃ ᐅᖓᓯᑦᑑᑎᓪᓗᒍ ᒪᓕᓐᓄᑦ ᑌᒣᓕᔭᕕᓂᐅᑦᓱᓂ ᐃᓐᓈᕈᐊᐱᐅᔮᓯᑎᓪᓗᒍ ᓯᓈᓂ ᓄᓇᐅᓪᓗ ᑐᕙᐅᓪᓗ ᐊᑯᓐᓂᖓᓃᑦᓱᓂ.
ᐊᖑᑏᑦ ᐱᖓᓱᑦ ᓯᓚᒥ ᓂᑯᕐᕋᔪᑦ: ᐃᓚᖓᑦ ᖁᑭᐅᑎᓂᑦᓴᑐᖅ, ᐊᒻᒪᓗ ᐊᓯᒋᒃ ᒪᕐᕉᒃ ᐅᖄᖃᑦᑕᐅᑎᔫᒃ ᑐᐹᑭᑦᓱᑎᓪᓗ.
ᐊᖑᑎᒃ ᐊᐳᓯᕐᓯᒪᔪᒃᑯᑦ ᖃᕐᖃᑯᑦ ᐱᓱᑦᑐᖅ, ᖁᑭᐅᓯᔭᕐᓱᓂ ᐊᒻᒪᓗ ᑐᐹᑭᑦᓱᓂ. ᖃᕐᖃᒥᑦ ᓯᑐᒌᕋᒥ, ᖃᕐᖃᐅᑉ ᐊᑭᓐᓇᖓᓄᑦ ᓇᑉᐯᔪᖅ ᖁᑭᐅᑎᒥᓂᒃ, ᑌᒪ ᐱᓱᓯᓂᐊᓕᕋᒥ ᐱᖓᓱᓄᑦ ᕿᒻᒥᓄᑦ ᓯᓂᑦᑐᓄᑦ ᐁᑦᓱᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐊᖑᓇᓱᑦᑏᑦ ᒪᓃᑦᑑᓱᓂ ᐃᓐᓈᕈᐊᐱᒥᒃ ᒪᔪᓲᕕᓃᑦ ᓇᓯᒍᒪᒐᒥᒃ ᓇᑦᓯᖃᕐᒪᖔᑦ ᐊᓪᓗᒥᑦ ᐳᐃᓚᖓᔪᓂᒃ,
ᒪᕐᕉᒃ ᐊᖑᑏᒃ ᓂᕿᑐᐃᓐᓇᑐᕐᑑᒃ ᖁᐊᕐᒥᒃ, ᓯᓚᒥ, ᓴᕕᒻᒥᓂᒃ ᐊᑐᕐᓱᑎᒃ. ᓴᕕᕋᔭᕐᒥ ᐃᓗᓕᒻᒥ ᑎᕐᑎᑐᖅ ᓴᓂᐊᓃᑦᑐᖅ, ᐊᒻᒪᓗ ᖃᒧᑏᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐊᒥᓱᕌᒐᓛᐱᑐᐊᕋᒥᓪᓗ ᑐᕙᑐᐃᓐᓇᒥ ᓇᑦᓯᕕᓂᕐᒥᒃ ᐆᔪᓕᐅᓲᕕᓂᐅᑦᓱᑎᒃ ᐆᓇᕐᑐᖓᓂᒃ/ᖃᔪᖓᓂᒃ ᐱᓚᖓᑦᓱᑎᒃ ᐅᕝᕙᓘᓪᓃᑦ ᑌᒣᓚᓐᖔᑦ ᐁᐸᔪᕐᑐᓚᖓᑦᓱᑎᒃ.
ᐊᖑᑎᒃ ᑕᕆᐅᒥ ᖃᔭᕐᑐᑐᖅ. ᑐᓄᐊᓃᑦᑐᑦ ᖃᕐᙯᑦ ᑕᑯᑦᓭᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᒫᑎᐅᓯ ᑯᓗᓛᖅ ᖃᔭᒃᑭᓯᒪᔪᖅ ᓇᑦᓯᕕᓂᕐᓂᒃ ᖁᑭᕐᑕᕕᓂᕐᓂᒃ ᐃᑭᑖᕐᑕᕕᓂᕐᓂᓗ ᐁᑦᓯᒍᑎᒋᓂᐊᕋᒥᐅᒃ, ᐅᕝᕙᓘᓐᓃᑦ ᐃᒫᓃᑦᑐᓂᒃ ᓇᑦᓯᓂᒃ ᓴᖑᑎᑦᓯᒐᓱᐊᓚᖓᒐᒥ ᒪᙯᑦᑏᑦ ᑐᕙᐅᑉ ᓯᓈᓃᑦᑐᑦ ᒥᑦᓵᓄᑦ. ᓇᑦᓰᑦ ᐸᓯᔦᓀᓲᒍᒻᒪᑕ. ᓇᑦᓰᑦ ᓴᕕᕋᔭᕐᕙᓛᓂᒃ ᐅᕕᓐᖏᐅᓱᕝᕙᓛᓂᓪᓘᓃᑦ ᑐᓵᓕᑐᐊᕋᒥᒃ ᖃᓂᓪᓕᒋᐊᓲᑦ ᖃᐅᔨᒍᒪᒐᒥᒃ ᓱᔪᖃᓕᕐᒪᖔᑦ, ᓱᕐᕙᓂᒃ ᑐᓵᓕᑐᐊᕋᒥᒃ ᑐᓵᑦᓯᐊᑐᓪᓚᕆᐊᓘᒐᒥᒃ.
ᐊᖑᑎᒃ ᖃᔭᕐᑐᑐᖅ ᐸᕈᕐᑐᖅ ᑎᑭᑉᐸᓕᐊᔪᖅ ᐊᑦᔨᓕᐅᕈᑎᒧᑦ. ᑎᑭᓪᓗᑐᕋᒥ ᖃᓂᑕᖃᓯᑦᓱᓂ ᐊᑦᔨᓕᐅᕈᑎᒥᒃ ᖁᖓᑦᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᑯᒍᓐᓇᓕᕆᕗᑎᑦ ᐃᒪᖅ ᐅᕐᓱᐊᑐᒻᒪᕆᐅᓕᕐᒪᑦ. ᒫᑎᐅᓯ ᐅᑎᕆᕗᖅ.
ᓯᓈᓄᑦ ᑎᑭᒐᒥ, ᐊᖑᑎᒃ ᖃᔭᕐᒥᑦ ᐲᕐᓱᓂ ᓯᑯᒧᑦ ᑐᓪᓕᑐᖅ. ᐊᓯᐊ ᐊᖑᑎᒃ ᐁᕕᓕᒃ ᐃᑲᔪᕆᐊᕐᓱᓂ ᖃᔭᕐᒥᒃ ᓴᕐᕙᐅᑎᑦᓯᑌᓕᓯᑦᓱᓂ ᑎᒍᒥᐊᕐᓱᒍ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᓇᓕᕐᙯᑐᒥ (ᔭᓄᐊᕆ) ᐅᓪᓗᑭᓐᓂᓴᐅᓲᖅ, ᐅᓇᑦᑕᐅᖅ ᓇᓕᕐᙯᑑᑉ ᓄᓐᖑᐊᓂ, ᐊᖑᓇᓱᑦᑏᑦ ᑖᕐᓯᓚᐅᕐᑎᓇᒍ ᐅᑎᕋᓱᐊᕆᐊᖃᓲᕕᓃᑦ ᐅᓐᓄᐊᒥ ᐊᐅᓚᒋᐊᒥᒃ ᐊᑦᑕᓇᕐᑑᒪᑦ ᑐᕙᐅᑉ ᓄᓇᑐᐃᓐᓇᐅᓗ ᐊᑯᓐᓂᖓᑎᒍᑦ ᐊᐅᓚᒐᓱᒋᐊᖅ ᓯᑯ ᓯᖁᒥᑦᑐᕕᓈᓘᒻᒪᑦ ᐊᑦᑕᓇᕐᑐᓚᕆᐊᓘᓯᑦᓱᓂ. ᐱᔭᕆᐊᑐᓂᕐᓴᐅᒫᐱᑦᑐᖅ ᐃᑳᒐᓱᒋᐊᒥᒃ ᕿᒧᑦᓯᓱᓂ ᖃᔭᖅ ᕿᓚᑦᓯᒪᑎᓪᓗᒍ ᖃᒧᑏᓐᓄᑦ ᖃᓄᐃᓕᓐᖓᒍᓐᓀᓗᑎᒃ ᐃᑳᑦᓯᐊᓚᖓᑐᐊᕐᐸᑕ.
ᐱᖓᓱᑦ ᐊᖑᑏᑦ ᖃᔭᕐᒥᒃ ᓄᓈᕆᔪᑦ. ᐃᓚᖓᑦ ᓯᑯᐃᔦᔪᖅ ᓴᕕᒻᒥᓄᑦ, ᐊᒻᒪᓗ ᐊᓯᐊ ᐊᖑᑎᒃ ᖁᑭᐅᑎᒥᒃ ᑎᒍᒥᐊᕐᑐᖅ.
ᐊᖑᑎᒃ ᐊᖁᖕᖓᔪᖅ ᓯᓚᒥ, ᓂᕿᑐᐃᓐᓇᑐᕐᑐᖅ ᓴᕕᒻᒥᓄᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᒐ ᑐᕙᕐᒥ ᓂᕆᕐᖄᑫᓐᓇᖁᑦ ᐃᖏᕐᕋᓯᓐᖏᓂᕐᒥᓂ, ᐃᓇᓗᐊᕌᐲᑦ ᐃᓗᐃᔭᕐᓱᒋᑦ; ᑌᒣᓕᖓᔪᓂᒃ ᓂᕈᒥᑦᑑᑎᓪᓗᒋᑦ ᓂᕆᒋᐊᒥᒃ ᒪᒪᕐᓴᓲᕕᓂᐅᒐᒥᒃ. ᑌᒪᓐᖓᓕᒫᑲᓵᒃ ᐁᐸᔪᕐᒥᒃ ᑎᖑᕐᒥᒃ ᐊᕕᑦᓯᐊᓲᕕᓃᑦ ᐃᓚᕐᕿᐊᐱᑦᓴᓱᒍ, ᐆᒻᒪᑎᒐᓚᒻᒥᒃ, ᐆᒻᒪᑎᒃ ᓂᕆᔭᐅᓲᒍᒻᒪᑦ ᐊᖑᑎᓄᑦ ᓄᒃᑭᕈᑎᒋᓚᖓᑦᓱᒍ ᑎᒥᖓᓄᓗ ᐱᐅᔫᑦᓱᓂ.
ᐊᖑᑎᒃ ᓯᑯᐃᔦᔪᖅ ᖃᔭᕐᒥᒃ ᐸᓇᒥᓄᑦ. ᒪᕐᕉᒃ ᐊᓯᖏᒃ ᐊᖑᑏᒃ ᖃᔭᐅᑉ ᓴᓂᐊᓂ ᓂᑯᕐᕋᔫᒃ, ᐊᒻᒪᓗ ᐊᓯᐊ ᐅᑯᖓᔪᖅ ᓱᓇᓕᕆᑦᓱᓂᑭᐊᖅ.
ᐊᖑᑎᒃ ᐊᓄᐃᑦᔮᕆᔪᖅ ᕿᒻᒥᓂᒃ. ᕿᒻᒦᑦ ᐊᒻᒪᓗ ᖃᒧᑏᒃ ᓴᓂᐊᓃᑦᑐᑦ.
ᓯᑕᒪᑦ ᐊᖑᑏᑦ ᖃᒧᑎᒥᓂᒃ ᐸᕐᓀᓂᔪᑦ ᕿᒧᑦᓯᕈᑎᒋᓂᐊᕐᑕᒥᓂᒃ (ᑕᑯᑦᓭᑦ ᒪᕐᕉᒃ ᖃᒧᑏᒃ ᐊᒻᒪᓗ ᒪᕐᕈᐃᒃ ᕿᒧᑦᓰᒃ).
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑖᕐᓯᐸᓪᓕᐊᓕᕐᖁᖅ ᕿᒻᒦᓗ ᐊᒥᓱᒐᓛᑦ ᐊᓅᕐᑐᑕᐅᓕᕐᓱᑎᒃ, ᐊᖑᓇᓱᑦᑎᓕᒫᑦ ᕿᒻᒥᒥᓂᒃ ᖃᐅᔨᒪᑦᓯᐊᑐᑦ ᕿᒻᒦᓗ ᐃᓚᑦᓴᔭᒌᑦᓱᑎᒃ.
ᐃᓪᓘᑉ ᐃᓗᐊᓂ ᐊᑦᔨᓕᐅᕐᑕᕕᓂᖅ: ᐊᖑᑎᒃ ᐃᓪᓘᑉ ᑐᕐᓲᖓᓂᑦ ᐱᑦᓱᓂ ᐃᑎᕐᑐᖅ ᐅᒃᑯᓯᒥᒃ ᐊᒻᒪᓗ ᓴᕕᒻᒥᒃ ᑎᒍᒥᐊᕐᓱᓂ. ᐅᒃᑯᓯᒻᒥᒃ ᓴᒃᑯᐃᔪᖅ ᑲᑉᐳᑎᑦᓱᒍᓗ ᓴᕕᒃ ᐊᐳᑎᒧᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᖃᒧᒑᓗᒃ ᒪᙯᒋᐊᖃᑕᐅᓐᓂᔭᖏᑦᑐᖅ ᐃᒡᓗᒥᓂᒃ ᐊᑦᑕᓀᓪᓕᑎᕆᒋᐊᖃᕐᓂᕋᒥ, ᑭᓯᐊᓂ ᐊᓐᓂᑐᕐᑕᕕᓂᕐᓂᒃ ᓂᖏᖃᑕᐅᑦᓯᐊᑐᖅ ᐃᓚᖃᕐᑎᓗᒍ ᓇᑦᓯᐅᑉ ᐅᕐᓱᖓᓂᒃ ᐸᓂᒻᒥᓅᓚᖓᔭᒥᓂᒃ ᖁᓪᓕᖓ ᐅᕐᓱᓴᕐᑖᓂᐊᕐᒪᑦ. ᖃᒧᒑᓘᑉ ᐸᓂᖓᑕ ᐊᖑᑎᖓ ᐋᓐᓂᐊᕕᒻᒦᑐᑦ, ᐊᑖᑕᖓᑕᓗ ᐊᕐᓇᖓ, ᑌᒣᒐᓗᐊᕋᒥᒃ ᖃᓄᐃᓲᒍᑦᔭᖏᑦᑐᑦ ᐃᑲᔫᑎᑦᓯᐊᓲᖑᒐᒥᒃ, ᐊᒻᒪᓗ ᖃᒧᒑᓗᒃ ᓇᒻᒥᓂᕐᒥᓂᒃ ᐃᒡᓗᖃᕋᒥ ᓄᓇᓕᒻᒧᑦ ᐃᓚᐅᑦᓯᐊᑐᐃᓐᓇᑐᖅ ᐊᓐᓂᑐᕐᑕᓂᒃ ᓂᖏᖃᑕᐅᑦᓯᐊᓲᒍᑦᓱᓂ.
ᖃᓂᑦᑑᑎᓪᓗᒍ ᐊᑦᔨᓕᐅᕐᑕᕕᓂᖅ ᖁᓪᓕᐅᑉ ᐃᑯᒪᖓ.
ᐊᕐᓇᖅ ᐃᑦᓯᕙᔪᖅ ᖁᓪᓕᐅᑉ ᓴᓂᐊᓂ ᕿᑐᕐᖓᒥᓂᒃ ᐊᒪᐅᑎᒧᑦ ᐊᒫᕐᓱᓂ. ᐃᖑᓚᑦᑐᖅ ᖃᔪᓕᐊᒥᓂᒃ ᓴᕕᕋᔭᕐᒦᑐᒥᒃ ᐆᔪᓕᐅᕈᑎᒥ, ᑌᒪ ᖁᓪᓕᐅᑉ ᖁᓛᓄᑦ ᓂᕕᖕᖓᓱᒍ ᐆᔪᓕᐅᕈᑎᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᓇᑦᓯᕕᓂᒐᓛᐱᒻᒥᒃ ᑎᕐᑎᑎᑦᓯᔪᖅ ᓄᑲᕐᐹᖓ ᐊᕐᕌᒍᕐᑖᕆᐊᕕᐊᑦᑐᖅ ᓂᕆᓂᐊᕐᒪᑦ ᖁᓪᓕᐅᑉ ᖁᓛᓂ ᐃᒐᔭᕕᓂᖓᓂᒃ. ᐱᐊᕋᖃᕐᐳᖅ ᐅᓪᓗᓕᒫᑲᓵᑦᓯᐊᖅ ᐊᒫᕐᑕᐅᓲᒥᒃ ᐊᓈᓇᒥᓄᑦ.
ᐃᓪᓘᑉ ᐃᓗᐊᓂ ᐊᑦᔨᓕᐊᕕᓂᖅ ᐃᒐᓛᖅ ᓯᑯ ᑲᓃᔭᕐᑕᐅᔪᖅ ᐅᓗᒻᒧᑦ ᐱᑐᑦᓯᒪᔪᒧᑦ ᕿᔪᒻᒧᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᓂᓪᓕᒪᓂᒋᒃ ᐊᑦᔨᒌᓐᖏᓂᖏᓐᓄᑦ ᐃᒡᓘᓗ (ᐃᒡᓗ ᕿᐅᓐᓇᑐᑲᓪᓚᒃ, ᓗᐊᕌᓗᓐᖏᑲᓗᐊᕐᓱᓂ) ᐊᒻᒪᓗ ᓯᓚᐅᑉ, ᓂᓚᒃ ᖃᓂᑦᑐᒥᑦ ᑕᓯᕐᒥᑦ ᐱᔭᕕᓂᖅ ᑲᓂᕐᔪᖃᓕᕐᑐᖅ ᓵᓪᓕᑎᕐᑕᐅᓚᖓᑦᓱᓂ ᐃᒐᓛᒍᓕᐊᓚᖓᒐᒥ ᐃᒡᓗᒧᑦ. ᒪᕐᕉᓂ ᐃᒐᓛᓕᒃ ᖁᓕᕇᑦᑑᓂᒃ, ᐅᓪᓗᑯᑦ ᐃᒡᓘᑉ ᐃᓗᐊ ᖃᐅᒪᖁᓪᓗᒍ.
3 - 4 ᖃᒧᑏᑦ ᕿᒻᒥᓄᑦ ᐅᓂᐊᕐᑌᑦ. ᐊᑐᓂᑦ ᖃᒧᑏᑦ ᐃᓄᓐᓄᑦ ᐃᑦᓯᕙᕕᐅᔪᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᓇᑦᓯᐊᓕᐅᒍᓕᕐᒪᑦ (ᒫᑦᓯ) ᐅᓪᓗᑐᓯᐅᓂᕐᓴᐅᓯᓲᖅ ᐃᓄᐃᓪᓗ ᐅᕝᕙᓘᓐᓃᑦ ᐊᒥᓲᓂᕐᓭᑦ ᐃᓄᐃᑦ ᑐᑭᑖᕐᑐᕕᓂᐅᑦᓱᑎᒃ ᓯᕿᓂᓕᐊᕈᒪᒋᐊᖅ. ᓯᕿᓂᓕᑦᑖᓕᑐᐊᕋᒪ ᑲᖏᕐᓱᓕᐊᕆᐊᒥᒃ ᐅᖄᔪᖓ, ᓄᓇᑐᕐᓕᓕᐊᕆᐊᒥᓪᓗ ᖃᔭᕐᑕᓕᐅᓂᕋᕐᑕᐅᓲᒍᕐᖂᑐᒥᒃ, ᐃᓚᒌᓗᑳᑦ ᑖᕙᓂ ᐅᐱᕐᖏᓂᐊᕐᓂᒪᑕ ᐳᐃᔨᓯᐅᖃᑦᑕᕈᒪᒧᑦ ᐳᐃᔩᑦ ᐱᔭᐅᒍᓐᓇᓂᕐᓴᐅᓕᓚᐅᔪᒻᒥᒪᑕ.
ᑐᑭᓕᕇᑦ ᐊᑦᔨᓕᐅᕐᑕᕕᓃᑦ (ᕿᒧᑏᓐᓃᑐᒧᑦ) ᕿᒧᑦᓯᓱᓂ. ᑕᑯᑦᓴᖑᕐᑐᖅ ᐊᖑᑎᒃ ᐃᑦᓯᕙᔪᖅ ᓯᕗᐊᓂ ᖃᒧᑏᒃ ᐊᒻᒪᓗ ᓄᐃᑦᓱᑎᒃ ᐊᓯᖏᑦ ᕿᒧᑦᓰᑦ ᖃᒧᑏᓪᓗ ᓯᕗᐊᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᔪᒋᓂᐅᓕᕇᕐᒥᔪᖅ.
ᑕᑯᑦᓵᒃ ᖃᒧᑏᒃ ᐅᓂᐊᕐᑕᐅᔫᒃ ᕿᒻᒥᓄᑦ. ᑕᑯᑦᓴᐅᑎᑌᑦ ᐊᓯᐊᓂ ᖃᒧᑦᓯᓂ ᑭᓪᓕᖓᓂ ᐃᑯᒪᔪᒧᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂᓗ ᑕᑯᒍᓐᓇᓱᑕ Mr. Walton-ᒥᒃ, ᓯᕗᓪᓕᐹᑦᓯᐊᒍᑦᓱᓂ ᑲᕙᒪᑐᖃᒃᑯᑦ ᐃᓄᓕᕆᔨᒃᑯᖏᓐᓂ ᐱᓇᓱᑦᑎᖄᕕᓂᖅ. ᐊᐅᓚᔨᑦᓯᐊᑐᐊᕈᒪ ᐊᖁᑦᑎᖃᓚᐅᕐᓯᒪᔪᖅ ᐹᑉ ᒣ-ᒥᒃ, ᐹᑉ ᒣᓪᓗ ᐊᑖᑕᒋᔭᐅᓚᐅᔪᑦᓱᓂ ᒥᐊᔨ ᓭᒪᓐ-ᒧᑦ. ᐹᑉ ᐱᓇᓱᕝᕕᖃᓚᐅᕐᓯᒪᔪᖅ ᑰᑦᔪᐊᒥ ᑐᓵᔨᐅᑦᓱᓂ, ᑌᑦᓱᒪᓂᐅᑎᓗᒍ ᐃᓚᒋᔭᐅᓚᐅᕐᓯᒪᒐᒥ ᐃᑭᑦᑐᐊᐱᓐᓄᑦ ᑐᓵᔨᓄᑦ. ᑰᑦᔪᐊᒥᑦ ᐱᔪᕕᓂᐅᓚᐅᕐᓯᒪᔪᑦ ᑐᑭᑖᕆᒋᐊᕐᑐᓱᑎᒃ ᐁᕙᐅᑎᔪᖃᓕᕐᓂᒪᑦ ᐱᐅᓯᑐᖃᕐᑎᒍᑦ ᑲᑎᑎᑕᐅᔪᖃᕐᓂᒪᑦ ᐊᕐᓈᐱᒃ ᖁᓄᑎᓪᓗᒍ, ᑲᑎᔭᐅᓕᓚᐅᕐᓯᒪᔫᒃ ᐱᓀᓗᑕᕆᔭᐅᓕᕐᑐᖅ ᓭᒻᒪᐅᑕᐅᑎᓪᓗᒍ.
ᑕᑯᑦᓭᑦ ᕿᒧᑦᓰᑦ, ᑎᑭᑉᐸᓕᐊᔪᑦ ᐊᑦᔨᓕᐅᕈᑎᒧᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑌᒣᒻᒪᑕᒐ ᓯᕿᓂᕐᒧᑦ ᐅᑎᓕᕐᒪᑕ ᒪᓕᓐᖏᔦᓕᓚᐅᕐᓯᒪᔪᖓ. ᐃᑦᓯᒐᕐᔪᐊᑯᑦ ᐊᔪᕿᕐᑐᐃᔨᖓ, ᐲᕐᑎᐅ, ᖃᒻᒥᐊᐱᒃᑯᑦ ᑭᖑᓪᓕᐸᐅᓕᕐᓱᓂ ᐊᑌᓐᓇᑑᑦᓱᓂ ᐊᔪᕿᕐᑐᐃᔨᐅᖏᓐᓇᓚᐅᔪᔪᖅ ᓄᓇᕕᒻᒥ, ᐃᓛ ᑕᕐᕋᒥ ᓄᓇᓕᓐᓂ ᐊᔪᕿᕐᑐᐃᕙᑦᓱᓂ, ᐃᓄᓐᓄᑦ ᐃᓐᓂᐊᓚᐅᕐᓯᒪᔪᖅ ᖃᔭᕐᑕᓕᒻᒦᓕᕇᕐᑐᓄᑦ ᑖᕗᓐᖓᓴᓕᕈᑎᓪᓗ; ᐃᓚᖏᑦ ᐃᓚᒌᑦᑐᑦ ᖃᔭᕐᑕᓕᒻᒥᐅᑦ ᐃᑦᓯᒐᕐᔪᐊᖑᕐᑕᐅᓯᒪᓕᕇᓚᐅᕐᓯᒪᔪᑦ. ᐊᓯᖏᑦᑕᐅᖅ ᐃᓄᐃᑦ ᐊᒥᒃᑭᓱᑎᒃ ᑲᒻᐸᓂᒃᑯᓕᐊᕐᑐᑦ ᓂᐅᕐᕈᓯᒍᒪᒐᒥᒃ ᓂᐅᕐᕈᓯᕐᑎᒧᑦ ᔨᒥ ᕗᐊᑦ-ᒧᑦ. ᑌᒫᒃ ᑭᓯᐊᓂ ᓴᒃᑯᑖᕈᓐᓇᓲᕕᓃᑦ ᐃᒻᒪᖄᓪᓗ ᓴᓇᐅᒐᐅᑎᓂᒃ, ᐳᓐᓂᓂᒃ ᐊᓯᖏᓐᓂᓗ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇᑦᑕᐅᖅ ᐅᖓᓯᑦᑑᔭᖏᑦᑐᖅ ᑕᑯᑫᓐᓇᑕᕐᑎᓂᑦ ᓯᑕᒪᐅᔪᓐᖏᒐᕐᑐᑦ ᖃᒧᑏᑦ ᐊᕕᑦᑎᓗᒋᑦ ᑎᑭᓚᐅᕋᑎᒃ ᑲᖏᕐᓱᒧᑦ ᐊᑦᔨᒌᓐᖏᑐᓄᑦ ᓄᓇᓕᐊᓚᖓᑦᓱᑕ. ᒫᓂᑦᑕᐅᖅ ᑕᑯᒍᓐᓇᑐᑎᑦ ᕿᒻᒥᓂᒃ ᐃᓗᓯᕐᓱᓯᐊᕐᑐᓂᒃ, ᓂᕆᒃᑲᑕᐅᒪᑦᓯᐊᓱᑎᒃ ᐃᒪᕐᐱᒥᐅᑌᑦ ᐅᕐᓱᖏᓐᓂᒃ ᖃᐅᔨᒣᓕᖓᓇᕐᑐᓄᓪᓗ ᑎᑭᑕᐅᓚᐅᕐᓯᒪᒐᑎᒃ ᐊᓯᖏᑦ ᕿᒻᒦᑦ ᓯᕿᓂᕐᒥᐅᒍᓂᕐᓭᑦ ᖃᐅᔨᒣᓕᐅᕐᖃᓚᐅᕐᓯᒪᒻᒪᑕᓕ.
ᖃᐅᔨᒋᐊᕐᕕᓴᖅ
ᑐᑭᒧᐊᕐᑎᓯᔨᐅᑉ
1. ᐊᐅᓚᓂᖅ, ᐃᒡᓗ, ᐃᓗᐊ, ᓇᑦᓯᓯᐅᕐᓂᖅ, ᖃᒧᑏᒃ, ᑲᒻᒥᐅᓂᖅ [PDF 281.27kB]
ᐊᓪᓚᓯᒪᔪᑦ ᐅᖃᓕᓚᒫᕋᓱᐊᕐᓗᒋᑦ ᖃᕋᑕᐅᔭᒃᑯᑦ ᐱᑕᖃᕆᐊᓕᒃ Adobe Acrobat Reader