ᑐᑦᑐᔭᖅ
About
ᑐᕌᕐᓂᕆᒐᓱᐊᕐᑕᕋ ᑖᑦᓱᒧᖓ ᑕᕐᕋᓕᔮᓕᐊᕋᓄᑦ ᑕᑯᑎᑦᓯᓯᐊᕈᒪᒐᒪ ᖃᓄᖅ ᑐᑦᑐᐃᑦ ᐱᒻᒪᕆᑦᔪᐊᕌᓗᒻᒥᒃ ᓄᓇᖃᓲᒍᓐᓂᒪᖔᑕ ᐃᓄᐃᑦ ᓄᓇᕕᐅᑉ ᑕᕐᕋᖓᓂᒥᐅᑦ ᐃᓅᒡᒍᓯᑐᖃᕆᓚᐅᔪᔭᖓᓂ ᓄᓇᕕᓕᒫᑦᓯᐊᒥᒐᓚᒃ ᑐᑦᑐᐃᑦ ᐊᓯᐅᓚᐅᕐᑎᓇᒋᑦ ᑐᖓᓕᐊᓂᒃ ᓯᓚᕐᔪᐊᒥ ᐅᓇᑕᕐᓂᔪᐊᖃᕐᑎᓗᒍ, ᐃᒻᒪᖄᓪᓘᓃᑦ ᐊᖃᒍᐊᓂ. ᑐᑦᑐᐃᑦ ᐊᓯᐅᓪᓚᕆᐊᓗᑦᓴᒪᑕ ᐃᓄᓐᓄᑦ ᐱᔭᐅᑦᓴᕌᕐᐸᓕᕐᑐᕕᓃᑦ ᐅᖓᓯᑦᑐᐊᓗᒻᒧᑦ ᒪᙯᒋᐊᕐᑎᓗᒋᑦ ᓇᐹᕐᑐᐃᑦ ᒥᑦᓵᓄᑦ ᑖᕙᓃᓐᓂᒥᒪᑕ ᐊᖏᓂᕐᓭᑦ ᓇᐹᕐᑐᓕᒻᒥᐅᓴᔭᐅᑦᓱᑎᒃ ᑐᑦᑐᐃᑦ ᑖᕙᒃᑯᐊᓗ ᑐᑦᑐᐃᑦ ᓅᑦᑐᕕᓂᐅᑦᓱᑎᒃ ᓄᓇᕕᒻᒧᑦ ᓇᐹᕐᑐᐃᑦ ᒥᑦᓵᖓᓄᑦ.
ᑐᑦᑐᔭᖅ (1971)
ᐱᒻᒪᕆᐅᓂᖏᓐᓄᑦ ᑐᒃᑐᐃᑦ ᑕᕐᕋᒥ ᓄᓇᕕᒻᒥᐅᑦ ᐃᓄᐃᑦ
ᐃᓅᓯᕆᓚᐅᕐᓯᒪᔭᖏᓐᓂ
16 mm ᑕᑯᓐᓇᕋᑦᓴᖅ ᑕᐅᑦᑐᓕᒃ (ᓂᐯᑦᑑᓱᓂ)
20-ᒥᓂᑦᔅ-ᑐᕐᑐᖅ
ᑐᑭᒧᐊᕐᑎᓯᔪᕕᓂᖅ : ᐱᕐᓈ ᓴᓚᑏᓐ ᑕᖕᒃᓘᕐ
ᐊᑦᔨᓕᐅᕆᔪᕕᓂᖅ : ᐱᕐᓈ ᓴᓚᑏᓐ ᑕᖕᒃᓘᕐ
ᐳᕕᕐᓂᑐᒥ ᑕᑯᓐᓇᕋᑦᓴᓕᐊᕕᓂᖅ ᐊᕐᓇᓕᓐᖑᑎᕕᒃ 1971-ᒥ
ᐃᑲᔪᕐᓯᒪᔪᕕᓂᖅ ᔨᒥ ᐃᓐᓈᕈᓕᒃ ᒫᒃ, ᑐᓵᔨᐅᑦᓱᓂ,
ᓯᑯᑦᓴᔭᒨᕐᙯᔨᐅᑦᓱᓂ, ᐅᖃᐅᓯᐅᑉ ᐁᑉᐹᓅᔦᔨᐅᑦᓱᓂ ᑕᑯᓐᓇᕋᑦᓴᓕᐅᕐᑐᒥᓪᓗ ᓴᐳᒻᒥᓯᒪᔪᕕᓂᖅ Sylvie Pharand, ᐃᓕᓐᓂᐊᕇᒍᑎᑖᕐᓯᒪᔪᖅ ᐃᓅᖃᑎᒌᑦᑐᓂᒃ ᖃᐅᔨᓴᕐᓂᒧᑦ, ᓚᕚᓪ ᐃᓕᓐᓂᐊᕕᕐᔪᐊᖓᓐᓂᑦ
ᐃᓄᐃᑦ ᐃᓚᐅᔪᕕᓃᑦ: ᓂᐊᓕ ᐳᑐᒍᖅ, ᔪᐊᓇᓯᐊᓗᒃ, ᔪᐊᓇᓯ (ᐱᖓᓲᔪᕐᑐᓂᒃ ᐅᑭᐅᓕᒃ), ᒣᓇ ᐊᓛᓱᐊᖅ, ᐊᓂᖓ ᑎᒧᑎ, ᐋᓕ ᐱᐊᕋᓛᖅ ᐊᒻᒪᓗ ᓕᓕ ᐸᓂᐊᐱᒃ, ᓗᐃᓴ ᕿᓗᕐᕿ, ᓴᐅᓂᖅ ᓭᒪᓗ (ᑲᒃᑲᓛᒃ).
ᓯᕗᓪᓕᐹᕐᓯᐅᑎᒥᒃ ᐃᓂᓪᓓᔪᕕᓂᖅ: Philippe Legrand ᓛᕙᓪ ᐃᓕᓐᓂᐊᕕᕐᔪᐊᖓᑕ ᓂᐱᓕᓐᓂᒃ ᑕᑯᓐᓇᕋᑦᓴᓕᐅᕐᕕᖓᓂ, ᐊᒻᒪᓗ ᑕᑯᓐᓇᕋᑦᓴᓕᐅᖃᑕᐅᔪᕕᓃᑦ ᓴᐳᑦᔭᐅᓱᑎᒃ ᑐᑭᒧᐊᕐᑎᓯᔨᒧᑦ
ᑮᓇᐅᔭᖃᕐᑎᓯᔪᕕᓃᑦ: CNRS, Canada Council for the Arts, Canadian Museum of Civilization and Département des affaires culturelles du Québec.
ᓱᓇᒥᑦᓯᐊᑎᓗᒍ ᓯᑯᑦᓴᔭᒨᕐᑕᕕᓂᖅ
ᐃᓄᒃ ᐊᕐᓇᖅ ᕿᑐᕐᖓᒥᓂᒃ ᕿᒻᒥᒥᓪᓗ ᐱᓱᖃᑎᓕᒃ. ᐊᕐᓇᖅ ᓇᒻᒪᑐᖅ, ᐊᒪᓗ ᕿᒻᒥᖅ ᓇᒻᒪᐅᓯᔭᕐᑐᖅ ᓇᒻᒪᓱᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᒐ ᒫᓂ ᑕᑯᓐᓇᑐᒍᑦ ᐊᕐᓇᒥᒃ, ᓂᐊᓕ ᐳᑐᒍᕐᒥᒃ, ᐳᑐᒎᑉ ᐊᕐᓇᖓᓂᒃ, ᐳᑐᒍᕐᓗ ᔪᐊᓇᓯᐊᓗᒻᒧᒃ ᓄᑲᕆᔭᐅᑦᓱᓂ, ᓂᐊᓕ ᐱᓱᑦᑐᖅ ᑕᓯᒍᐊᕐᓱᓂ ᕿᒻᒥᒥᒃ ᓇᒻᒪᐅᑎᓕᔭᕐᑐᒥᒃ ᐅᓂᐊᕐᓱᓂ ᑐᐱᐅᑉ ᖃᓇᖓᓂᒃ.
ᓂᐊᖂᓯᔭᕐᓱᓂ ᐊᒻᒪᓗ ᓴᕝᕕᒥᐅᓯᔭᕐᓱᓂ, ᑐᑦᑐᔭᕐᑕᓕᒻᒥᒃ ᐃᒧᒪᔪᒥᒃ ᓇᒻᒪᑐᖅ, ᐃᒪᖃᐅᑎᒥᓪᓗ ᑎᒍᒧᐊᕐᓱᓂ. ᕿᒻᒥᒃ ᓇᒻᒪᐅᓯᔭᕐᑐᖅ ᐊᒻᒪᓗ ᕿᔫᒃ ᑕᑭᔫᒃ ᑐᐱᐅᑉ ᕿᔪᖁᑎᒋᒃ ᐱᑐᑦᓯᒪᑦᓱᑎᒃ ᖁᖏᓯᖓᓄᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᓂᐊᓕ ᑎᒍᒥᐊᕐᑐᖅ ᕿᓯᔭᐅᑦᓱᓂ ᐃᒻᒥᖃᔭᓐᖏᑐᒥᒃ ᐅᒃᑯᓯᒥᒃ ᐃᒥᕐᑕᕋᐅᑎᒥᒃ ᑖᓐᓇᓗ ᐅᒃᑯᓯᒃ ᓇᑦᓯᑐᖃᕕᓂᐅᑦᓱᓂ ᖃᔭᕐᒧᑦ ᐊᒥᐊᕆᔭᕕᓂᐅᑦᓱᓂ. ᐅᒃᑯᓯᒃ ᐃᒥᕐᑕᕋᐅᑎᒋᓲᖓ ᓂᐊᓕᓗ ᒪᓕᑦᑕᐅᒥᑦᓱᓂ ᐃᕐᓂᒥᓄᑦ ᐃᕐᓂᖓᓗ ᒥᑭᔪᒥᒃ ᐊᑎᒋᓯᒪᑦᓱᓂ ᐱᓗᖏᑦ ᐊᓃᖔᕐᑎᓗᒋᑦ, ᐊᑎᒋᓗ ᐅᕐᖂᓂᕐᓴᐅᓱᓂ ᐅᑭᐅᕐᓯᐅᑎᐅᒐᒥ ᐅᕝᕙᓘᓐᓃᑦ ᓯᓚᒃ ᐊᓯᑦᔨᖃᑦᑕᓕᕐᒪᑦ.
(ᓯᕗᐊᓂᑦ ᑕᑯᑦᓭᑦ) ᐁᕕᒥᓄᑦ ᑎᑭᑦᑐᑦ ᓇᒻᒣᔮᕐᑎᓕᕐᑐᑦ
ᐃᓄᒃ ᐊᖑᑎᒃ, ᔪᐊᓇᓯᐊᓗᒃ, ᖃᔭᒃᑯᑦ ᑎᑭᓴᕐᑐᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐃᕐᓂᕇᒃ ᓄᓇᓕᐊᕐᑑᒃ ᐊᖑᑎᖓ ᖃᔭᕐᑐᑎᓪᓗᒍ ᐸᐅᕐᓱᓂ ᑰᓐᓂ ᒪᔪᕐᓱᓂ ᑕᓯᑎᒎᕐᓱᓂᓘᓐᓃᑦ ᐃᑎᑦᔪᒐᖃᑦᑕᓱᓂ ᖃᔭᕐᑐᖃᔭᓐᖏᑐᐊᕋᒥ ᒪᕿᖃᑦᑕᓱᓂ.
ᖃᔭᕐᒥᓂ, ᓯᕗᐊᓂ, ᐅᓯᖏᑦ ᐸᓂᕐᑐᐃᑦ ᕿᓰᑦ ᓴᑭᕕᒻᒣᑐᐃᑦ ᐊᒻᒪᓗ ᐊᖏᔪᕐᓚᐅᓂᕐᓭᑦ ᕿᓰᑦ ᖃᔭᖓᑕ ᑐᓄᐊᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᐊᖑᑎᒃ ᖃᔭᕐᑐᑐᖅ ᔪᐊᓇᓯᐊᓗᒃ ᓵᖓᓂᓗ ᑕᑯᒍᓐᓇᓱᑕ ᐊᒥᕐᓂᒃ ᕿᓯᓐᓂᒃ ᐃᓪᓕᓕᐊᑦᓴᓂᒃ ᐊᓐᓄᕌᓕᐊᕆᒐᑦᓴᓂᓘᓐᓃᑦ, ᐸᓂᕐᑐᐃᑦ ᕿᓰᑦ ᐱᓇᓱᐊᕐᑕᐅᓯᒪᕋᑕᕋᑎᒃ, ᐊᒻᒪᓗ ᔪᐊᓇᓯᐊᓘᑉ ᑐᓄᐊᓂ ᑕᑯᒍᓐᓇᓱᑕ ᐊᒥᐅᑦᓱᓂ ᑐᐱᐅᑉ ᐃᓚᖓᓂᒃ ᑐᐱᕐᓗ ᑐᑦᑐᔭᐅᑦᓱᓂ ᐱᓗᐃᔭᕐᓯᒪᑦᓱᓂ.
ᐊᖑᑎᒃ ᓄᓈᕐᑐᖅ ᓯᑦᔭᒧᑦ ᑐᐊᐸᔮᒧᑦ. ᐊᕐᓇᒧᑦ ᓴᒻᒧᐊᑕᖅ ᖃᔭᐅᓪᓗ ᓯᕗᐊᓂᒃ ᑎᒍᓯᑦᓱᓂ ᐅᕕᖓᑎᑌᓕᓯᑦᓱᒍ. ᖃᔭᕐᒥᑦ ᓅᑦᑐᖅ ᑲᖏᕙᕐᓱᒍᓗ ᓯᑦᔭᒧᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᐊᕐᓇᖅ ᑎᒍᓯᔪᖅ ᖃᔭᐅᑉ ᐊᖁᖓᓂᒃ ᔪᐊᓇᓯᐊᓗᒃ ᓄᓈᓂᐊᕐᒪᑦ ᖃᔭᕐᒥᓂᓗ ᐲᕐᓗᓂ. ᖃᔭᐅᑉ ᐃᑎᕆᐊᕐᕕᖓ ᐃᓄᒃᑎᑐᑦ ᐹᒍᓂᕋᕐᑕᐅᔪᖅ.
ᐊᖑᑎᒃ, ᔪᐊᓇᓯᐊᓗᒃ, ᕿᓚᒍᑦᔮᑎᕆᔪᖅ ᑕᑯᑦᓴᐅᖏᑦᑐᒥᒃ ᓱᓇᒥᑭᐊᖅ.
ᐊᕐᓇᖅ ᐃᓇᖁᓇᕐᑐᒪᕆᒻᒥᒃ ᐊᒪᐅᓯᔭᕐᑐᖅ ᑕᐅᑦᑐᖏᑦ ᐊᑦᔨᒌᖕᖏᑐᓄᑦ ᐱᖁᑎᓄᑦ ᑕᕐᓯᑐᕐᓯᒪᔪᒥᒃ. ᐊᖑᑎᐅᑉ ᓇᑦᓯᔭᐅᑦᓱᓂ ᐴᖃᑦᑕᖓᓂᒃ ᑎᒍᓯᔪᖅ ᐅᓯᖏᑦᑕ ᐃᒻᒧᐊᓃᑦᑐᒥᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᕝᕙᓂ ᓄᓇᑐᐃᓐᓇᒥ ᑕᑯᒍᓐᓇᑐᒍᑦ ᐊᑦᔨᒌᓐᖏᑐᓂᒃ ᓴᐸᖓᕐᓂᒃ/ᐱᖁᑎᓂᒃ ᐊᒪᐅᑎᐅᑉ ᑭᓂᖓᑕ ᑕᑯᒥᓇᕈᑎᖏᓐᓂᒃ.
ᐁᑉᐸᕇᒃ ᕿᓯᔭᒥᒃ ᑐᐱᕐᒥᒃ ᐃᒧᐃᑦᔮᓯᔫᒃ ᐊᒻᒪᓗ ᓇᑉᐸᓯᑦᓱᒍ ᕿᔪᓐᓂᒃ ᖃᓇᖃᕐᑎᓗᒍ ᑐᑭᒧᐊᑦᑐᓂᒃ ᐊᒻᒪᓗ ᓴᓐᓂᖓᔪᓂᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᖃᓄᐃᑦᑐᑐᐃᓐᓇᓕᒫᑦᓯᐊᓂᒃ ᐱᐅᒃᑯᑎᒥᓂᒃ ᓇᑦᓴᓯᔪᑦ. ᑕᑯᓐᓇᓕᕆᕗᒍᑦ ᑐᑦᑐᔭᐅᑦᓱᓂ ᑐᐱᕐᒥᒃ ᓇᑉᐸᑕᐅᒐᓱᐊᕐᑐᒥᒃ: ᐊᒥᓱᒐᓛᓂᒃ ᖃᓇᓕᒃ ᑐᐱᐅᑉ ᓯᕗᕌᓂ ᑐᐱᖅ ᐅᒃᑯᐃᖔᑦᓯᐊᓂᐊᕐᒪᑦ, ᑐᐱᐅᑉ ᕿᑎᖓ ᖃᓇᖃᕐᒥᔪᖅ ᐊᒻᒪᓗ ᑐᐱᓕᒫᑦᓯᐊᖅ ᐅᔭᕋᕐᓄᑦ ᐱᕈᕐᓯᒪᓲᒍᑦᓱᓂ.
ᐊᕐᓇᖅ ᑐᑦᑐᔭᓂᒃ ᐊᒥᓂᒃ ᓇᑲᑎᕆᔪᖅ ᐅᓗᒥᓄᑦ ᑐᐱᐅᑉ ᓯᕗᕌᓂ, ᑲᒃᑲᓛᒧᑦ ᑕᑯᓐᓇᐅᔮᕐᑕᐅᓱᓂ. ᐊᖑᑎᒃ ᑐᐱᕐᒥᑦ ᐊᓂᔪᖅ, ᑐᐹᑭᒥᒃ ᑎᒍᒥᐊᕐᓱᓂ. ᐴᖃᑦᑕᒥᓂᒃ ᓇᒻᒪᑐᖅ. ᐱᓱᓯᔪᖅ ᑐᐱᕐᒥᒃ ᕿᒣᑦᓱᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐊᖑᑎᒃ ᓇᑦᓯᔭᒥᒃ ᐴᖃᑦᑕᓕᒃ ᐱᐅᑎᖏᑦ ᐃᓗᐊᓃᑦᑎᓗᒋᑦ ᑐᑦᑐᓯᐅᕐᓱᓂ ᕿᓐᖑᑏᓐᓄᑦ ᐊᓐᓂᑐᕆᐊᓐᖓᓚᖓᓕᕋᒥ.
ᐊᕐᓇᖅ ᐸᓂᕐᑐᒥᒃ ᐊᒥᕐᒥᒃ ᑎᒍᓯᔪᖅ ᙯᕐᑑᑉ ᖄᖓᓅᕐᓱᒍ. ᑐᕈᓯᕐᒧᑦ ᑕᑯᓐᓇᐅᔮᕐᑕᐅᔪᖅ, ᐊᒥᓕᕆᓯᑎᓪᓗᒍ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑌᒣᓘᕐᑎᓗᒍ, ᐊᕐᓇᖅ ᑐᑦᑑᑉ ᓴᐅᓂᑯᑖᖓᓂᒃ ᓄᕝᕗᕆᑦᓴᓯᒪᔪᒥᒃ ᓴᑭᕕᐅᑎᖃᕐᓱᓂ ᕿᓯᒻᒥᒃ ᐅᕐᓱᐃᔦᔪᖅ ᐊᕿᓪᓕᓂᐊᕐᒪᑦ ᐊᓐᓄᕌᓕᐊᕆᒐᑦᓴᖑᕐᓗᓂ.
ᖃᓂᑦᑑᑎᓪᓗᒋᑦ ᐊᑦᔨᓕᐅᕐᑕᕕᓃᒃ ᐊᒡᒐᖏᒃ, ᐊᒥᓕᕆᔪᖅ. ᑎᒍᒥᐊᕐᑐᖅ ᑕᑭᔪᒥᒃ ᓴᑰᒍᑎᒥᒃ ᑐᑦᑑᑉ ᓴᐅᓂᕕᓂᖓᓂᒃ, ᐊᑐᕐᑕᖓ ᐊᒥᕐᒥᒃ ᕿᑐᓪᓕᑐᐃᒍᑎᒋᑦᓱᒍ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᕿᓯᓕᕆᓂᖅ ᐊᑯᓂᐊᓗᒃ ᐱᓇᓱᐊᕐᑕᐅᒋᐊᖃᓲᖅ ᐊᕐᓇᖅ ᓯᕗᓪᓕᒥ ᑭᓕᐅᑕᒥᒃ ᐊᑐᕐᑐᖅ ᒥᑭᓂᕐᓴᒥᓪᓗ
ᐊᓯᐊ, ᐅᖓᓯᓐᓂᓴᖅ ᐊᑦᔨᓕᐅᕐᑕᕕᓂᖅ ᐊᕐᓇᖅ, ᑭᓘᕐᑐᓭᓐᓇᑐᖅ ᕿᓯᒻᒥᒃ ᐊᓯᐊᓂᒃ, ᐊᑐᕐᓱᓂ ᑕᑭᓂᕐᓴᒥᒃ ᑭᓘᕐᑑᑎᒥᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᕿᓯᓕᕆᓂᖅ ᐊᑯᓂᐊᓗᒃ ᐱᓇᓱᐊᕐᑕᐅᒋᐊᖃᓲᖅ ᐊᕐᓇᖅ ᓯᕗᓪᓕᒥ ᑭᓕᐅᑕᒥᒃ ᐊᑐᕐᑐᖅ ᒥᑭᓂᕐᓴᒥᓪᓗ ᓴᑰᒍᑎᖃᕐᓱᓂ ᑐᑦᑑᑉ ᑭᐊᓯᕕᓂᖓᓂᑦ ᐊᓯᖓᓂᓘᓐᓃᑦ ᓴᐅᓂᕐᒥᒃ ᓂᕈᑑᒐᓛᒍᑦᓱᓂ ᓄᕝᕗᕆᑦᓴᓯᒪᑦᓱᓂᓗ ᕿᓯᖅ ᐊᕿᓪᓕᓯᐊᕐᓂᐊᒪᑦ. ᒫᓂ ᐊᕐᓇᖅ ᐊᖑᑎᖓ ᖃᓄᐃᓪᓗᐊᒪᖔᑦ ᓱᕐᖄᑎᕆᔪᖅ ᓱᕐᖄᑎᕈᑎᒥᓂᒃ ᕿᓯᕐᒨᕆᓚᖓᑦᓱᓂ ᐃᓕᑦᑎᓂᐊᕋᒥ.
ᐊᕐᓇᖅ ᐊᖑᑎᐅᑉ ᐊᖏᓂᖓᓂᒃ ᐆᑦᑐᕋᕐᑐᖅ ᐊᒡᒐᒥᓄᑦ ᐊᒻᒪᓗ ᐊᒥᕐᒥᒃ ᑐᓄᖓᓅᕐᓯᓱᓂ ᐊᒻᒪᓗ ᓵᖓᓄᑦ, ᖃᓄᐃᓪᓗᐊᒪᖔᑦ ᐆᑦᑐᕋᕐᓱᓂ. ᐊᖑᑎᒥᒃ ᐊᓐᓄᕌᓕᐅᕈᒪᕙᓗᑦᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᐊᕐᓇᖅ ᐊᖑᑎᖓ ᖃᓄᐃᓪᓗᐊᒪᖔᑦ ᓱᕐᖄᑎᕆᔪᖅ ᓱᕐᖄᑎᕈᑎᒥᓂᒃ ᕿᓯᕐᒨᕆᓚᖓᑦᓱᓂ ᐃᓕᑦᑎᓂᐊᕋᒥ.
ᐅᓗᒻᒧᑦ ᑐᑦᑑᑉ ᐊᒥᖓᓂᒃ ᐃᓕᑦᑎᑐᖅ, ᑐᖓᓕᐊᓂᒃ ᖁᑉᐸᕆᓂᐊᑕᖓᓂᒃ ᐊᓐᓄᕌᓕᐊᖓᑕ, ᐆᑦᑑᑎᖃᕐᓱᓂ ᐃᒧᓯᒪᔪᒥᒃ ᐊᒥᕐᒥᒃ. ᑐᕈᓯᖅ ᐊᒻᒪᓗ ᐊᖑᑎᒃ ᓂᑯᕐᕋᔫᒃ ᓴᓂᐊᓂ, ᑕᑯᓐᓇᐅᔮᕐᓱᑎᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑌᒣᒻᒪᓗ ᐃᓕᑦᑎᕆᐊᑕᒫᑦ, ᓱᒐᓗᑦᑐᖅ ᐊᑎᒋᐅᑉ ᐱᒻᒪᕆᐅᓂᕐᐹᖏᓐᓂᒃ, ᐆᑦᑑᑎᒋᓗᒍ ᓵᑦᓴᖓᓂᒃ ᑐᓄᑦᓴᖓᓂᓘᓐᓃᑦ, ᖃᐅᔨᒐᓱᐊᕐᑐᖅ ᓈᒻᒪᓈᑦᓯᐊᕋᓗᐊᕐᒪᖔᑦ ᐃᓕᑦᑎᑕᖓ. ᒫᓂ ᐃᓕᑦᑎᐅᑎᓕᒃ ᐊᖏᓂᕐᓴᒥᒃ ᐅᓗᒻᒥᒃ. ᒫᓂ ᑕᑯᓐᓇᑌᑦ ᐱᕆᑦᓯᑎᓪᓗᒍ, ᐊᑎᒋᐅᑉ ᓴᐅᒥᖓ ᑕᓕᕐᐱᖓᓗ ᐊᑦᔨᒌᑦᓯᐊᓂᐊᕐᒪᑎᒃ.
ᐊᑦᔨᓕᐊᕕᓂᖅ ᓴᑰᒍᑎᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇᑕᒐ ᑭᓕᐅᑕᖓ ᑕᑭᔫᑦᓱᓂ ᐊᒻᒪᓗ ᐊᖏᔫᑦᓱᓂ ᐅᓗ ᑖᒃᑯᐊ ᕿᓯᓕᕆᒍᑎᒋᓲᒋᒃ. ᐅᓇᑕᒐ ᒥᑭᔪᖅ ᑭᓕᐅᑕᖅ ᓇᑦᔪᕕᓂᐅᓱᑦᓂ, ᑐᑦᑑᑉ ᓇᑦᔪᕕᓂᖓ ᐊᒻᒪᓗ ᐴᖃᑦᑖᐱᒃ ᐅᕐᓱᖃᐅᑎᐅᑦᓱᓂ ᐃᕙᓗᒻᒥᒃ ᐅᕐᓲᐱᔦᒍᑎᐅᑎᓪᓗᒍ. ᐅᓇ ᒥᕐᖁᑎᖃᐅᑎᐊᐱᑦᓴᔭᖅ ᒪᑐᒍᑎᓕᒃ. ᒫᓂ ᒪᕐᕉᓂᒃ ᑭᓕᐅᑖᓐᓂᒃ ᑕᑯᒍᓐᓇᑐᒍᑦ. ᓯᕗᓪᓕᖅ ᑕᑭᔫᑦᓱᓂ ᑭᓕᐅᑕᖅ ᑕᑯᓚᐅᑯᒻᒥᔭᕗᑦ ᐊᕐᓇᖅ ᕿᓯᓕᕆᒋᐊᓐᖓᑎᓗᒍ ᕿᓯᒻᒥᒃ ᓂᖀᔦᑦᓱᓂ ᐸᓂᕐᑐᒥᓪᓗ ᐊᐅᖏᔦᑦᓱᓂ; ᑖᓐᓇ ᑭᓕᐅᑕᖅ ᓲᖑᓂᕐᓴᖅ ᐊᒥᓐᓂᓴᐅᒐᒥ. ᐊᓯᖏᑦ, ᑐᑦᑑᑉ ᑭᐊᓯᕕᓂᖓ, ᐅᓇᓗ ᑐᑦᑑᑉ ᓇᑦᔪᕕᓂᖓ, ᓇᑦᔫᑉ ᓯᓕᓐᓂᐹᖓᓂᑦ ᐱᔭᕕᓂᐅᑦᓱᓂ, ᑭᓯᐊᓂ ᐃᓄᐃᑦ ᐱᒍᒪᓂᕐᓴᐅᓲᕕᓃᑦ ᑐᑦᑑᑉ ᑭᐊᓯᕕᓂᖓᓂᒃ ᐊᑐᕐᑕᐅᓲᒍᓐᓂᒥᒻᒪᑦ ᐱᐊᕋᖅ ᖄᕐᒧᑦ ᖁᐃᔪᕕᓂᐅᑐᐊᕐᒪᑦ ᐃᑎᕈᐃᔦᒍᑎᐅᑦᓱᓂ. ᑐᑦᑑᑉ ᐱᓗᖏᑦ ᓱᓪᓗᓖᑦ ᑭᕕᕐᖃᔭᓐᖏᑐᑦᓴᔭᐅᑦᓱᑎᒃ ᑌᒣᒻᒪᑦ ᖃᐅᓯᓕᒍᐊᕐᑑᔭᖏᑦᑐᑦ ᓯᑦᓯᑐᕐᖃᔭᓐᖏᓂᕐᓴᐅᓱᑎᒃ. ᓯᓚᕐᔪᐊᑉ ᓂᒡᒋᖓᓂᒥᐅᑦ ᑐᑦᑑᑉ ᐱᓗᖏᓐᓂᒃ ᐊᑐᕐᓱᑎᒃ ᐳᑦᑕᖁᑎᓕᐅᓲᕕᓃᑦ ᑭᕕᕐᖃᔭᓐᖏᑐᑦᓴᔭᐅᒻᒪᑕ. ᐊᒻᒪᓗ ᓂᓪᓕᓇᕐᑐᒥ ᓯᓚᒥ ᐅᕐᖂᔪᑦᓯᐊᕌᓘᑦᓱᑎᒃ.
ᐊᑦᔨᓕᐊᕕᓂᖅ ᐅᓗᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐊᖏᔪᕐᒥᒃ ᐅᓗᓕᐅᓲᕕᓃᑦ ᑭᓪᓘᑎᕕᓂᕐᓂᑦ ᐃᓄᐃᑦ ᐱᔭᕕᓂᖏᓐᓂᑦ ᖃᓪᓗᓈᓂᑦ (ᐃᓕᑦᓯᓚᐅᕐᑐᕕᓂᐅᒐᒥᒃ ᖃᓄᖅ ᐅᓗᓕᐅᒋᐊᖃᕐᒪᖔᒻᒥᒃ). ᐅᓘᑉ ᐃᐳᖓ ᕿᔪᐃᓐᓇᖅ, ᑭᓯᐊᓂ ᐅᓗᑐᖃᐅᓂᕐᓭᑦ ᐃᐳᖏᑦ ᓇᑦᔪᕕᓂᐅᓲᕕᓃᑦ ᐃᓪᓕᕆᔭᐅᓂᕐᓴᐅᓱᑎᒃ, ᐃᓛᓐᓂᓘᓐᓃᑦ ᐃᐳᓕᐅᕐᓯᒪᓲᕕᓂᐅᑦᓱᑎᒃ ᑑᒐᔮᕕᓂᕐᓂᑦ.
ᐊᑦᔨᓕᐊᕕᓂᖅ ᐊᓯᐊ ᓴᑰᒍᑎᒃ, ᓯᕕᑐᓂᕐᓴᖅ ᐊᒻᒪᓗ ᓀᓐᓂᓴᐅᑦᓱᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐃᓐᓇᑕᒐ ᑭᓕᐅᑕᖅ ᑐᑦᑑᑉ ᓇᑦᔪᕕᓂᕆᑦᓱᓂᐅᒃ ᕿᓯᓐᓂᒃ ᐊᒥᕐᓂᒃ ᐊᕿᓪᓕᓭᒍᑎᕙᓪᓘᓲᕕᓂᐅᑦᓱᓂ. ᐃᓐᓇᑕᒐ ᐴᖃᑦᑖᐱᒃ ᐅᕐᓱᖃᐅᑎᒃ ᐳᐃᔨᕕᓂᐅᑉ ᐅᕐᓱᖓᓂᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐃᓐᓇᑕᒐᑦᑕᐅᖅ ᐃᓗᖃᕐᓱᓂ ᓴᐅᓂᑯᑖᖅ ᐸᑎᖓ ᐃᓗᐊᓃᑦᑐᖅ ᐲᕐᑕᐅᓂᕐᒪᑦ,
ᐊᑦᔨᓕᐊᕕᓂᖅ ᓴᐅᓂᖅ ᐃᓗᓕᒃ, ᑕᑭᔫᑦᓱᓂ ᐊᒻᒪᓗ ᓂᕈᑭᑦᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐊᑦᓱᓈᕌᐱᖃᕐᒥᓱᓂ ᕿᓚᑦᓯᒪᔪᒥᒃ ᐊᒥᕕᓂᕐᒧᑦ ᐱᓗᖃᕐᓱᓂ ᑲᑉᐳᑎᕕᐅᓲᒍᑦᓱᓂ ᓴᐅᓂᐅᑦᓱᑎᒃ ᑑᒐᔮᒍᑦᓱᑎᓘᓐᓃᑦ ᒥᕐᖁᑎᓄᑦ. ᒥᕐᖁᑎᖃᐅᑎ-ᓚᔭᐅᓲᖑᕐᖂᒪᑦ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᑑᒑᖅ ᐊᒪᐅᑎᖓᑕ ᖂᕐᓗᖓᐅᑎᖓ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᑑᒐᔮᒍᑦᓱᓂ ᐅᓐᖑᐊᖑᔮᕐᑐᖅ ᐊᒪᐅᑎᐅᑉ ᓵᖓᓃᑦᓱᓂ ᑕᑦᓯᖓᓃᓲᒍᑦᓱᓂ, ᑕᑦᓯᖅ ᐊᒪᐅᑎᐅᑉ ᑐᓄᐊᒎᕐᓱᓂ ᓄᑕᕋᐅᑉ ᐊᒫᕐᑕᐅᔫᑉ ᐅᑉᐸᑎᖓᑕ ᐊᑖᒎᓲᖅ, ᑌᒪ ᐊᓈᓇᒋᔭᐅᔫᑉ ᐊᒫᒪᒋᑦᑕ ᐊᑖᒎᕐᓂᐊᓕᕐᒥᒐᒥ ᓄᑕᕋᖅ ᑲᑕᓂᐅᔭᒐᓛᑦᑎᓇᒍ ᐊᒪᐅᑎᒥᑦ. ᑌᒣᒻᒪᑦ ᐊᑕᐅᑎᐊᐱᐅᔮᕐᑐᖅ ᓄᕗᐊᐱᖃᕐᓱᓂ ᕿᓚᑦᑕᐅᓚᖓᑎᓪᓗᒍ ᑕᑦᓯᖅ ᐃᒣᓕᓗᒍ.
ᖃᓂᑦᑑᑎᓪᓗᒋᒃ ᐊᑦᔨᓕᐊᕕᓃᒃ ᐊᕐᓇᐅᑉ ᐊᒡᒐᖏᒃ, ᑐᑦᑑᑉ ᐊᒥᖓᓂᒃ ᐅᓗᒥᓄᑦ ᓇᑲᑎᕆᔪᖅ.
ᐊᕐᓇᖅ ᐃᕙᓗᒻᒥᒃ ᑎᒍᓯᔪᖅ ᒥᕐᖁᑎᖃᐅᑎᒥᓂᑦ ᑑᓪᓕᐅᑉ ᐊᒥᕕᓂᖓᓂᒃ. ᐃᕙᓗᓐᓂᒃ ᑲᑎᖕᙰᔮᕆᔪᖅ, ᐃᓚᖏᓐᓂᒃ ᑎᒍᓯᑦᓱᓂ ᐊᒻᒪᓗ ᐃᓚᖏᑦ ᑐᕐᖁᕆᐊᓪᓚᓱᒋᑦ ᒥᕐᖁᑎᖃᐅᑎᒥᓄᑦ. ᓄᕙᒻᒥᓄᑦ ᐃᕙᓗᓐᓂᒃ ᖃᐅᓯᓕᕐᑎᕆᔪᖅ ᐊᒻᒪᓗ ᑲᑎᖕᙰᔮᕆᐊᓪᓚᓱᒋᑦ ᐊᒥᓪᓕᖏᓐᓂᖓᓂ ᐃᕙᓗᒃ ᐊᑐᓚᖓᔭᖓ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᑕᑯᓐᓇᑐᒍᑦ ᑑᓪᓕᔭᒥᒃ ᓄᑮᔭᕐᑕᐅᔪᒥᒃ. ᓄᑮᑦ ᐃᕙᓗᐃᑦ ᐊᕕᐅᕐᖃᓱᒋᑦ ᐊᒧᑯᑖᕐᑕᐅᓲᑦ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᐊᕐᓇᐅᑉ ᐊᒡᒐᖏᒃ, ᓴᓇᕐᕈᑎᒥᒃ ᑎᒍᓯᔪᖅ ᓇᑦᓯᔭᐅᑉ ᐴᖃᑦᑕᐅᑉ ᐃᓗᐊᓂᑦ. ᑎᒍᓯᔪᖅ ᓴᐅᓂᕐᒥᒃ ᒥᕐᖁᑎᖃᐅᑎᒥᒃ ᐊᒻᒪᓗ ᒥᕐᖁᑎᒥᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂᑕᒐ ᑕᑯᓐᓇᑐᒍᑦ ᓂᐊᓕ ᒥᕐᖁᑎᖃᐅᑎᐊᐱᒥᓂᒃ ᑎᒍᓯᑎᓪᓗᒍ ᑕᑯᒍᓐᓇᓱᓯᓗ, ᐊᒥᐅᑉ ᐃᓗᐊᓅᕐᑕᕕᓂᕐᒥᒃ, ᒥᕐᖁᑎᒥᒃ ᓴᐅᓂᐅᑦᓱᓂ ᑑᒐᔮᒍᑦᓱᓂᓘᓐᓃᑦ, ᐅᕝᕙᓘᓐᓃᑦ ᐅᕙᓂ, ᓴᕕᕋᔭᐅᑦᓱᓂ. ᑕᒐ ᒥᕐᖁᑎᒥᓂᒃ ᖃᐅᓯᓕᕐᑎᕆᔪᕕᓂᖅ ᓄᕙᒻᒥᓄᑦ ᐃᕙᓗᒻᒥᓂᓗ ᓄᕕᓯᒐᓱᐊᕐᓱᓂ ᒥᕐᖁᑎᐅᑉ ᐃᔨᖓᓄᑦ. ᑌᒪ ᐊᓂᑦᓯᓕᕆᕗᖅ ᐴᕌᐱᒥᒃ ᑕᑕᑦᑐᒥᒃ ᐅᕐᓱᒥᒃ ᐃᕙᓗᒻᒥᓂᓗ ᐅᕐᓱᑎᒎᕐᑎᓯᑦᓱᓂ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᐊᕐᓇᐅᑉ ᐊᒡᒐᖏᒃ ᐃᕙᓗᑦᓴᔭᒥᒃ ᓄᕕᓯᒐᓱᐊᕐᑐᖅ ᒥᕐᖁᑎᒧᑦ.
ᐊᕐᓇᖅ ᐊᓯᐊᓂᒃ ᓴᓇᕐᕈᑎᒥᒃ ᑎᒍᓯᔪᖅ ᓇᑦᓯᔭᒥᑦ ᐴᖃᑦᑕᒥᑦ. ᑎᒍᔭᒥᓂᒃ ᐊᑐᓯᔪᖅ ᐃᕙᓗᑦᓴᓂᒃ ᓂᐅᖕᙰᔮᕈᑎᒋᑦᓱᒍ. ᐃᑦᓯᕙᔪᖅ ᑐᐱᐅᑉ ᕿᓯᔭᐅᑉ ᐃᓗᐊᓂ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᑌᒣᓘᑦᓭᓇᕐᑎᓗᒍ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑖᒃᑯᓇᓂ ᖃᓂᓪᓕᑎᕐᓯᒪᔪᓂ, ᑕᑯᒍᓐᓇᓯᐊᕐᑐᒍᑦ ᐅᖁᒣᓕᑕᑦᓴᔭᐅᑦᓱᑎᒃ ᓴᕕᕋᔭᕐᓂᒃ ᑕᑯᒥᓇᕈᑎᓕᐊᕆᓚᖓᑦᓱᒋᑦ.
ᐊᕐᓇᖅ ᑐᐱᕐᒥ ᐃᑦᓯᕙᔪᖅ ᐊᒻᒪᓗ ᐃᓕᑦᑎᓯᒪᔪᓂᒃ ᑐᑦᑐᔭᓂᒃ ᐱᓇᓱᐊᓯᑦᓱᓂ. ᖁᓕᑦᑕᓕᐊᖓᑕ ᑐᐃᖏᓐᓂᒃ ᒥᕐᓱᓯᔪᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒥᕐᓱᐸᓪᓕᐊᓕᕐᖁᑕᒐ ᑲᑎᑎᕆᕐᖄᓚᐅᑲᑦᓱᓂ ᐊᖑᑎᐅᑉ ᐊᑎᒋᑦᓴᖓᑕ ᓵᑦᓴᖓᓂᒃ ᑐᓄᑦᓴᖓᓂᓗ. ᒫᓂ ᑎᑭᕐᓯᒪᔪᖅ ᓴᕕᕋᔭᕐᒥᒃ ᑭᓯᐊᓂ ᖃᒻᒥᑯᑦ ᑕᑯᓚᖓᕐᖂᒍᑦ ᑌᑦᓱᒪᓂᑕᔭᕐᓂᒃ ᑎᑭᕐᓂᒃ ᒥᕐᖁᐃᔭᕐᓯᒪᑦᓱᑎᒃ ᐅᑦᔪᔭᕕᓂᕐᓂᒃ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᐊᒡᒐᖏᒃ, ᖁᓕᑦᑕᐅᑉ ᑐᐃᖓᓂᒃ ᒥᕐᓱᑐᖅ. ᑎᑭᓕᔭᕐᑐᖅ ᓴᕕᕋᔭᕐᒥᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᑯᓐᓇᓯᐊᓚᐅᕆᑦᓯ ᒥᕐᓱᕈᓯᖓᓂᒃ, ᑕᒫᑦᓯᐊᖅ ᒥᕐᖁᑎᒥᓂᒃ ᓄᓱᐃᖃᑦᑕᑐᖅ. ᐃᕙᓗᓪᓗ ᐅᕐᓲᐱᔭᕐᑕᕕᓂᐅᑦᓱᓂ ᓱᑲᖓᓂᐊᓐᖏᒪᑦ ᑭᓗᑦᓯᐊᕿᑦᑑᓗᓂᓗ.
ᐅᖓᓯᓐᓂᓴᒥᒃ ᐊᑦᔨᓕᐊᕕᓂᖅ ᐊᕐᓇᖅ, ᒥᕐᓱᑐᖅ. ᐊᒪᐅᑎᖓᑕ ᑕᕐᓴᖏᑦ ᐱᖁᑏᑦ ᓄᐃᑕᔪᑦ.
ᕿᑲᕐᑐᖅ ᐊᑦᔨᓕᐊᕕᓂᖅ, ᖃᓂᑦᑑᑎᓪᓗᒋᒃ ᒪᕐᕉᒃ ᐊᒦᒃ, ᑲᑎᑎᕐᓯᒪᔫᒃ ᒥᕐᓱᓯᒪᑦᓱᑎᒃ, ᑭᓗᖏᑦ ᓄᐃᑕᑎᓪᓗᒋᑦ. ᑐᐱᐅᑉ ᑭᓪᓚᕆᕙᓗᑦᑕᖓ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᑐᐱᐅᑉ ᖁᓛᖓ, ᒪᕐᕉᒃ ᕿᓯᔮᒃ ᐊᑦᓱᓈᒧᑦ ᕿᓚᑦᑕᐅᒪᑎᓪᓗᒋᒃ, ᑭᓗᖏᓪᓗ ᐊᑦᑕᓇᒐᓛᒐᑎᒃ ᑐᐱᖅ ᐊᓄᕐᓯᐅᓴᕈᓂ ᑐᕐᕿᑕᐅᒐᔭᓐᖏᒪᑦ. ᑕᑯᒍᓐᓇᓱᓯᓗ ᑖᒃᑯᐊ ᑐᐲᑦ ᓵᑦᑐᒪᕆᐅᒻᒪᑕ ᐊᐅᔭᐅᓕᑐᐊᕐᒪᑦ ᖃᐅᒪᔪᑦᓯᐊᖑᓲᒍᑦᓱᑎᒃ. ᑖᒃᑯᐊ ᑐᐱᓕᐊᕕᓃᑦ ᑭᓗᖏᑦ ᒪᕐᕉᓕᕿᖓᔪᑦ ᐃᒻᒥᖃᔭᓐᖏᑐᓕᐊᖑᒪᑦᓱᑎᒃ ᓱᕈᔪᓕᕐᐸᑦ.
ᕿᑲᕐᑐᖅ ᐊᑦᔨᓕᐊᕕᓂᖅ, ᖃᓂᕐᑑᑎᓪᓗᒍ ᑐᐱᐅᑉ ᐃᓗᐊ. ᑐᐱᐅᑉ ᕿᓯᔭᐅᑉ ᖃᓄᐃᑦᑑᓂᖓ ᑕᑯᒋᐊᕐᓗᒍ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᑐᑦᑐᔭ. ᓄᔭᖏᑦᑕ ᖃᓄᐃᑦᑑᓂᖏᑦ ᑕᑯᒋᐊᕐᓗᒋᑦ.
ᐊᕐᓇᖅ ᐊᓐᓄᕌᓕᐅᕐᑐᖅ, ᑕᓕᖓᓂᒃ ᒥᕐᓱᑐᖅ ᑎᒥᖓᓄᑦ, ᑭᓂᑎᖃᑦᑕᓱᒍ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᑎᓯᒋᕗᒍᑦ ᐊᖑᑎᐅᑉ ᐊᑎᒋᑦᓴᖓᓂᒃ ᒥᕐᓱᑐᒧᑦ: ᐊᑎᒋᐅᑉ ᓵᑦᓴᖓ ᑐᓄᑦᓴᖓᓗ ᑲᑎᑎᑕᐅᒌᕐᒪᑎᒃ, ᐁᓕᐅᕐᑕᐅᒋᐊᖃᓕᕆᕗᖅ. ᑕᑯᓐᓇᕆᑦ ᐊᕐᓇᖅ ᑮᓕᖃᑦᑕᒪᑦ ᑭᓗᖃᕐᕕᒋᓚᖓᔭᒥᓂᒃ, ᐊᒥᖅ ᑮᖃᑦᑕᑕᖓ ᓄᕙᒻᒥᓄᑦ ᒪᕐᐸᒐᓛᐱᖃᑦᑕᓱᒍ ᒥᕐᖁᑎᒃ ᐱᔭᕐᓃᓘᓂᐊᓐᖏᒪᑦ. ᑌᒪᓐᖓᓂᐊᓗᒃ ᐃᓄᐃᑦ ᐅᖃᖃᑦᑕᓯᒪᔪᑦ ᐃᓘᓐᓇᑎᒃ ᐊᖑᑏᑦ ᐊᕐᓀᓗ ᑭᒍᑎᒥᓂᒃ ᐊᓪᓕᕈᕐᒥᓂᓗ ᐊᒡᒐᖏᓐᓄᑦ ᐱᖓᑦᓯᐅᑎᐅᑎᓪᓗᒋᒃ. ᑌᒣᒻᒪᓗ ᑌᒪᓐᖓᓕᒫᖅ ᐊᒥᕐᓂᒃ ᐊᕿᓪᓕᑎᕆᑦᓯᐊᓲᑦ ᓄᕙᒻᒥᓄᑦ ᖃᐅᓯᓕᕐᑎᖃᑦᑕᓱᒍ ᑭᓂᑎᕐᓱᒍᓗ ᒥᕐᓱᓕᕈᓂ ᐱᔭᕐᓃᓘᓂᐊᓐᖏᓇᒥ.
ᖃᓂᑦᑐᓚᕆᐅᑎᓪᓗᒍ ᐊᑦᔨᓕᐅᕐᑕᕕᓂᖅ ᑮᓇᖓ ᐊᒻᒪᓗ ᖃᓂᖓ, ᕿᓯᒻᒥᒃ ᐊᕿᓪᓕᓭᔪᖅ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᐊᕐᓇᐅᑉ ᑮᓇᖓ ᐊᒻᒪᓗ ᖃᓂᖓ, ᕿᓯᒻᒥᒃ ᑭᓂᑎᕐᑐᖅ.
ᐊᕐᓇᖅ ᒥᕐᓱᑐᖅ ᐊᓐᓄᕌᓕᐅᕐᓱᓂ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᐊᕐᓇᐅᑉ ᑮᓇᖓ, ᒥᕐᓱᑑᑉ. ᐃᓚᖓᓐᓂ ᖁᖓᖃᑦᑕᓱᓂ, ᐊᒻᒪᓗ ᖃᓄᑭᐊᖅ ᐅᖄᕙᓗᖃᑦᑕᓱᓂ.
ᐊᕐᓇᖅ ᒥᕐᓱᑐᖅ ᑐᐱᕐᒥ, ᑲᑕᐅᑉ ᓴᓂᕋᒋᒃ ᑕᒪᕐᒥᒃ ᓄᐃᑕᔫᒃ, ᕿᓯᔭᒥᒃ ᐅᒃᑯᓯᒻᒥᒃ ᑐᓄᒻᒥᑐᖅ. ᖁᓕᑦᑕᓕᐊᖓ ᐱᔭᕇᕐᐸᓕᐊᓕᕐᑐᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᑕᑯᓐᓇᑐᒍᑦ ᐊᕐᓇᒥᒃ ᑐᐱᕐᒥᑕ ᐃᓗᐊᓂ ᒥᕐᓱᑐᒥᒃ. ᑲᒻᒥᐅᑐᖅ, ᑕᒻᒪᖏᒃᑯᒪ, ᑲᓈᓕᐅᕐᓱᓂ. ᑐᑦᑐᔦᓐᓇᓯᐊᓂᒃ ᐊᓐᓄᕌᕐᓯᒪᔪᖅ,
ᐊᕐᓇᖅ ᓇᑦᓯᔭᒥᒃ ᑭᓂᑎᕐᑐᖅ, ᑭᒍᑎᒥᓄᑦ ᐊᕿᓪᓕᓴᕐᓱᒍ.
ᐊᕐᓇᖅ ᓂᑯᕕᑦᑐᖅ ᐊᒻᒪᓗ ᒥᕐᖁᑎᖃᐅᑎᒥᓄᑦ ᑐᕐᖁᐃᓱᓂ ᐊᑐᖕᖏᑕᒥᓂᒃ ᐃᕙᓗᑦᓴᔭᓂᒃ. ᑕᕝᕙᓂ ᓄᐃᑕᑦᓯᐊᑐᑦ ᐊᓐᓄᕌᖏᑦ, ᖃᕐᓕᒋᒃ, ᐊᒪᐅᑎᖓᓗ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᖃᕐᓕᖏᐊᓪᓛᑦ ᑐᑦᑐᔮᒃ ᓴᓂᕋᕐᒥᒍᑦ ᐳᑭᖃᕐᓱᑎᒃ
ᐊᕐᓇᖅ ᖁᓪᓕᒥᒃ ᐃᑭᑦᓯᔪᖅ (ᐅᕐᓱᒥᒃ ᐃᑯᒪᒍᑎᓕᒻᒥᒃ) ᑐᐱᐅᑉ ᐃᓗᐊᓂ, ᐊᑐᕐᓱᓂ ᑕᕐᖁᑎᒥᒃ, ᕿᔫᑦᓱᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐃᓐᓇᑕᐅᖅ ᖁᓪᓕᖅ ᐱᑦᓯᕕᒻᒦᑐᖅ ᓇᕐᔪᕕᓂᕐᒥ ᐊᒻᒪᓗ ᑕᕐᖁᑎᒃ ᑕᑯᑦᓴᐅᒥᑦᓱᓂ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᑮᓇᖓ, ᐅᖄᔪᖅ ᖁᖓᑦᓱᓂᓗ, ᖁᓪᓕᒥᑕ ᐃᑯᒪᖓᓂᒃ ᓈᒻᒪᓯᓕᕐᑎᕆᑦᓱᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᐊᕐᓇᖅ ᒣᓇ, ᑌᕕᑎᐊᓘᑉ ᐊᕐᓇᖓ.
ᖃᓂᑦᑑᑎᓪᓗᒋᑦ ᐊᑦᔨᓕᐊᕕᓃᑦ ᓴᓇᕐᕈᑎᖏᑦ ᐊᒻᒪᓗ ᐴᑯᐃᑦ ᐊᑐᓚᖓᔭᖏᑦ. ᑎᒍᓯᔪᖅ ᓴᓇᕐᕈᑎᓂᒃ, ᐊᒡᒐᖓ ᐊᑦᔨᓕᐅᕈᑎᒥ ᓄᐃᔪᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐃᒃᑯᐊ ᐱᐅᑎᖏᑦ: ᓴᕕᕋᔮᐱᒃ, ᖃᓗᕋᐅᑎᐅᐱᐅᔮᕐᑐᖅ ᕿᔪᒻᒥᒃ ᐃᐳᓕᒃ ᐊᐅᑦᓰᒍᑕᐅᓚᖓᑦᓱᓂ ᐅᖁᒣᓕᑕᑦᓴᔭᒥᒃ ᖁᓪᓕᐅᑉ ᖁᓛᓃᑦᑎᓗᒍ, ᐅᔭᕋᖅ ᐃᓗᓕᓕᐊᐱᒃ ᑯᕕᓯᕕᐅᓚᖓᔪᖅ ᐊᐅᑕᐅᔪᕕᓂᕐᒥᒃ, ᐃᓗᓕᓕᐊᐱᒃ ᑎᒍᓕᖃᕐᒥᔪᖅ, ᑖᒃᑯᐊ ᐱᖓᔪᖃᕋᓗᐊᕐᓱᑎᒃ ᑭᓯᐊᓂ ᑕᑯᕐᖃᔭᑦᓯᐊᖏᑦᑕᕗᑦ.
ᐊᐅᑦᑎᕆᔪᖅ ᐴᑯᓂᒃ ᐃᓗᓕᒻᒥ ᖃᓘᑎᒥ, ᖁᓪᓕᐅᑉ ᐃᑯᒪᖓᑕ ᖁᓛᓂ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᑯᐊᑦᑕᐅᖅ .22-ᓕᐅᑉ ᓴᒃᑯᖏᑦᑕ ᓄᕗᖏᑦ ᐅᖁᒣᓕᑕᑦᓴᔭᐅᔮᕐᓱᑎᒃ ᐊᑐᕐᑕᐅᒍᓐᓇᒥᑦᓱᑎᒃ ᓴᕕᕋᔭᑎᑐᑦ.
ᐊᑦᔨᓕᐊᕕᓃᑦ ᓴᓇᕐᕈᑎᖏᑦ ᑑᓪᓕᔭᐅᑉ ᐃᓗᐊᓃᑦᑐᑦ ᐊᒻᒪᓗ ᐊᒪᐅᑎᖓᑕ ᐊᑖᒋᓂᕐᓴᖓ, ᑕᕐᓯᑐᕐᓯᒪᔪᖅ ᒪᕐᕈᐃᓂᒃ ᑐᑭᓕᕇᓂᒃ ᐴᑯᓂᒃ. ᓴᓇᕐᕈᑎᖓᑕ ᐃᓚᖓᓐᓂᒃ ᑎᒍᖑᓯᔪᖅ ᐆᓇᕐᓯᓯᑦᓱᒍᓗ ᐃᑯᐊᓚᒥ ᒥᑭᔪᒥ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇᓗ ᑭᑭᐊᕌᐱᐅᔮᕐᑐᖅ ᐊᐅᑎᑦᓯᕕᐅᓚᖓᔪᒧᑦ ᓈᒻᒪᓯᐊᕐᓱᓂ, ᑕᑯᒍᓐᓇᑐᑎᑦ ᓴᓐᓂᖓᑎᑕᐅᔪᒥᒃ ᐊᐅᑎᑦᓯᕕᐅᓚᖓᔫᑉ ᐹᖓᓂ, ᐊᒻᒪᓗ ᒣᓇ ᑭᑭᐊᕌᐱᐅᔮᕐᑐᒥᒃ ᐃᓕᔨᔪᖅ ᑕᑯᒥᓇᕈᑎᓕᐊᕆᓚᖓᔭᖓ ᐳᑐᔭᐅᓂᐊᕐᒪᑦ ᑖᑦᓱᒧᖓ ᐊᒪᐅᑎᐅᑉ ᑭᓂᖓᓅᕐᑐᓴᒫᒍᑦᓱᓂ.
ᓴᓐᓂᖓᑎᓪᓗᒍ ᐃᓕᔨᔪᖅ ᓴᕕᕋᔭᕐᒥᒃ ᑕᑭᑦᑐᑳᒥᒃ ᐊᑦᑎᕆᐅᑎᒧᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᒐ ᐃᓕᔨᕗᖅ ᑭᑭᐊᕌᐱᐅᔮᕐᑐᒥᒃ ᑐᕐᖁᐃᒥᑦᓱᓂᓗ ᐅᕐᓱᒐᓛᐱᒥᒃ, ᑕᒻᒪᖏᑐᐊᕈᒪ. ᐊᐅᑎᑦᓯᕕᒋᓚᖓᔭᕐᒥᓂᒃ ᐅᕐᓲᐱᑎᕆᔪᖅ ᓴᐸᖓᓕᐊᖓ ᐲᕐᓂᐊᒪᑦ ᐅᔭᕋᕐᒥᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᒐ ᐃᓕᔨᕗᖅ ᑭᑭᐊᕌᐱᐅᔮᕐᑐᒥᒃ ᑐᕐᖁᐃᒥᑦᓱᓂᓗ ᐅᕐᓱᒐᓛᐱᒥᒃ, ᑕᒻᒪᖏᑐᐊᕈᒪ. ᐊᐅᑎᑦᓯᕕᒋᓚᖓᔭᕐᒥᓂᒃ ᐅᕐᓲᐱᑎᕆᔪᖅ ᓴᐸᖓᓕᐊᖓ ᐲᕐᓂᐊᒪᑦ ᐅᔭᕋᕐᒥᑦ. ᖁᓪᓕᐅᑉ ᐅᕐᓱᖓᓂᒃ ᐊᑐᕋᑖᕐᑐᖅ. ᐊᐅᓯᒪᓕᕐᑐᒥᒃ ᐃᓗᓕᑦᓴᔭᒥᒃ ᑯᕕᓯᓕᕆᕗᖅ.
ᖃᓂᑦᑑᑎᓪᓗᒍ ᐊᑦᔨᓕᐊᕕᓂᖅ ᑯᕕᓯᔪᖅ ᒥᑭᔪᕐᓚᐅᑎᓪᓗᒋᑦ ᓴᕕᕋᔭᐅᑉ ᐊᐅᓯᒪᔫᑉ ᑭᓪᓚᖓᓄᑦ ᓴᓇᕐᕈᑎᐅᑉ (ᓴᓇᒻᒪᓕᐅᕈᑎᒧᑦ). ᓯᕗᓪᓕᒥ ᓴᕕᕋᔭᕐᒥᒃ ᐃᓕᔨᔪᖅ ᕿᔪᒻᒧᑦ.
ᖃᓘᑎᒥᒃ ᐊᑐᕐᓱᓂ ᑯᕝᕕᕆᔪᖅ.
ᐱᖁᑎᖕᖑᑐᖅ (ᐊᐅᒪᔪᕕᓂᐅᑦᓱᓂ). ᒥᕐᖁᑎᒥᒃ ᑎᒍᓯᔪᖅ ᓴᓇᕐᕈᑎᒥᑦ ᑌᒪ ᐱᖁᑎᒥᒃ ᓴᓇᒻᒪᓕᐅᕈᑎᒦᑦᑐᒥᒃ ᓂᒪᕐᑎᓱᒍ ᐲᕐᓯᓂᐊᓕᕋᒥ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑭᑭᐊᕌᐱᐅᔮᕐᑐᖅ ᐃᓂᒥᓂᑦ ᐲᕐᓂᖏᑦᑐᖅ. ᓴᓃᔦᒐᓛᐱᑦᑐᖅ, ᐊᒪᓗ ᑕᒑᐱᒃ, ᓴᕕᕋᔭᑦᓴᔭᒥᒃ ᓴᐸᖓᕐᑖᐳᖅ ᑕᑯᒥᓇᕈᑎᓕᐊᕆᓚᖓᔭᕐᒥᓂᒃ.
ᓂᒪᖕᖏᑐᖅ ᐊᑦᔨᓕᐊᕕᓂᖅ ᓴᓇᕐᕈᑎᒃ, ᐴᑯᐃᑦ ᐊᒻᒪᓗ ᐱᖁᑏᑦ. ᑐᖓᓕᐊᓂ ᐊᑦᔨᓕᐊᕕᓂᕐᒥ, ᑕᑯᑦᓴᖅ ᓴᓇᒻᒪᓕᐅᕈᑎᒃ ᒪᕐᕉᓂᒃ ᑭᓪᓚᓕᒃ, ᐁᑉᐸᖓ ᐱᖁᑎᓕᐅᕈᑎᒃ, ᐁᑉᐸᖓ ᐃᖃᓘᑉ ᓴᓇᒻᒪᖓᓂᒃ ᓴᓇᒻᒪᓕᒃ, ᐊᒻᒪᓗ ᐊᒥᓱᑦ ᐱᖁᑎᖕᖑᑎᕋᑖᕐᑕᖏᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᒫᓂ ᑕᑯᓐᓇᑐᒍᑦ ᓱᓇᑐᐃᓐᓇᓂᒃ ᐊᑦᔨᒌᓐᖏᑐᓂᒃ ᐊᐅᑦᑎᑕᕕᓂᕐᓂᒃ ᖁᓪᓕᓴᔭᒧᑦ ᐃᓗᓕᓕᐊᐱᒨᕐᑕᕕᓂᐅᑦᓱᑎᒃ. ᑕᑯᒍᓐᓇᑐᒍᑦ ᒪᕐᕉᓂᒃ ᐊᐅᑎᑦᓯᕖᓐᓂᒃ ᑌᒣᒻᒪᑦ ᒣᓇ ᐊᑦᔨᒌᓐᖏᑑᓐᓂᒃ ᐅᖁᒣᓕᑕᑦᓴᔭᐅᑦᓱᑎᒃ ᓴᐸᖓᓕᐅᕈᓐᓇᑐᖅ.
ᐊᕐᓇᖅ ᐱᖁᓯᐅᓕᕐᑐᖅ ᐱᖁᑎᖕᖑᑎᕋᑖᕐᑕᒥᓂᒃ ᓯᓈᖓᓅᕐᖃᓱᒋᑦ ᕿᓯᐅᑉ (ᕿᑐᒪᕐᓴᓯᒪᔫᑉ). ᐊᖏᔪᒥᒃ, ᓴᕕᕋᔭᐅᑦᓱᓂ ᒥᕐᖁᑎᒥᒃ ᐊᑐᕐᑐᖅ.
ᕿᑲᕐᑐᖅ ᐊᑦᔨᓕᐊᕕᓂᖅ ᐱᔭᕇᕐᓯᒪᔪᑦ ᑕᕐᓯᑐᐊᑦ, ᐱᖁᑎᑕᖏᑦ ᐊᒻᒪᓗᑭᑖᑦ, ᐃᖃᓘᑉ ᓴᓇᒻᒪᖓᓂ ᓴᓇᒻᒪᓕᒃ ᐊᒻᒪᓗ ᖃᓗᕋᐅᑎᐅᑉ ᖁᑉᐹ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᓱᓇᑐᐃᓐᓇᓄᑦ ᐃᓚᐅᑎᑦᓯᓯᓐᓂᒥᔪᖅ ᓴᕕᕋᔭᐅᑦᓱᑎᒃ ᖃᓗᕋᐅᑎᓂᒃ ᑕᑯᒥᓇᕈᑎᓕᐊᕆᒪᑦᓱᒋᑦ. ᐅᖁᒣᓕᑕᕆᒍᒪᑦᓱᒋᑦ ᐃᓛᓐᓂᓗ ᐊᐴᑎᖃᑦᑕᓕᑐᐊᕋᒥᒃ ᓱᕐᕚᐱᖃᓲᒍᑦᓱᑎᒃ ᓯᕙᓂᐅᑎᐊᐱᐅᔮᕐᑐᓂᒃ.
ᐊᕐᓇᖅ ᐱᖁᑎᓄᑦ ᑕᕐᓯᑐᐃᔪᖅ ᖁᓕᑦᑕᒥᒃ, ᐊᒪᐅᑎᖓᓗ ᑕᑯᑦᓴᓱᓂ, ᑐᐱᐅᓪᓗ ᕿᓯᔭᐅᑉ ᐊᑭᓐᓇᖓ, ᒥᕐᖁᑎᖃᐅᑎᖓᓗ, ᐊᒻᒪᓗ ᖁᓪᓕᖅ ᑭᓪᓕᒥᑦᑕᖓ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓇ ᒣᓇ, ᑌᕕᑎᐊᓘᑉ ᐊᕐᓇᖓ.
ᐊᕐᓇᖅ ᐱᖁᑎᓄᑦ ᑕᕐᓯᑐᐃᔪᖅ ᖁᓕᑦᑕᒥᒃ, ᐊᒪᐅᑎᖓᓗ ᑕᑯᑦᓴᓱᓂ, ᑐᐱᐅᓪᓗ ᕿᓯᔭᐅᑉ ᐊᑭᓐᓇᖓ, ᒥᕐᖁᑎᖃᐅᑎᖓᓗ, ᐊᒻᒪᓗ ᖁᓪᓕᖅ ᑭᓪᓕᒥᑦᑕᖓ.
ᐱᓱᑦᓱᑎᒃ ᐱᕐᑐᒥ ᑲᔪᓯᔪᑦ ᓄᓇᒥ, ᐅᔭᕋᓱᑦᔪᐃᑦ ᑭᓪᓕᖏᒎᖃᑦᑕᓱᑎᒃ, ᑎᑭᕋᑕᕐᓱᑎᒃ ᑐᐱᕐᒧᑦ ᕿᓯᔭᒧᑦ. ᐊᓯᖏᑦ ᐃᓚᒌᑦ ᐃᓄᐃᑦ, ᐊᖑᑎᒃ, ᐊᕐᓇᖅ ᐊᒻᒪᓗ ᒪᕐᕉᒃ ᑲᒃᑲᓛᒃ ᑐᐱᕐᒥᑕ ᐃᓗᐊᓂᑦ ᐊᓂᔪᑦ ᑐᖕᖓᓱᑦᑎᓯᑦᓱᑎᒃ. ᓭᒨᕐᑐᑦ ᐃᓘᓐᓇᑎᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᑯᐊᑦᑕᐅᖅ ᐃᓄᐃᑦ ᓴᓂᑭᓗᐊᕐᒥᐅᑦ ᑎᑭᓕᕐᑐᑦ, ᒣᓇᓗ ᓴᓂᑭᓗᐊᕐᒥᐅᔭᐅᑦᓱᓂ. ᐊᑖᑕᑦᓯᐊᖓ ᐊᕐᓵᐹᖅ ᑭᑭᕐᑕᒥᐅᔭᕕᓂᖅ ᐃᓅᓯᓕᒫᑲᓵᒥᓂᓗ ᓴᓂᑭᓗᐊᕐᒥᐅᕕᓂᐅᑦᓱᓂ. ᑖᒃᑯᐊ ᐃᓄᐃᑦ ᐊᖑᑏᓪᓗ ᐊᕐᓀᓗ ᐊᑎᒋᓯᒪᔪᑦ ᒥᑎᒐᕐᓂᒃ. ᑕᑯᒍᓐᓇᑐᑎᑦ ᐊᕐᓀᑦ ᐊᑎᒋᖏᑦᑕ ᓇᓴᖏᑦ ᐃᓚᒋᓕᐅᑎᓯᒪᒻᒪᑕ ᐃᓗᑉᐱᐊᖏᓐᓄᑦ ᐱᓗᖏᑦ ᐃᓗᐊᓃᖔᕐᑎᓗᒋᑦ. ᓇᓴᖅ ᐊᑐᕐᑕᐅᓲᖅ ᓯᓚᐹᑉ ᓯᓚᑖᒎᕐᑎᓗᒍ ᓯᓚᑉᐱᐊᓕᕐᕿᑖᕆᔭᐅᑦᓱᓂ ᐱᓗᖏᑦ ᓯᓚᑖᓃᖔᕐᑎᓗᒋᑦ, ᑭᓯᐊᓂ ᓇᓴᖃᕋᑎᒃ. ᓴᓂᑭᓗᐊᕐᒥ ᐊᑎᒌᑦ ᐃᓗᑉᐱᐊᖏᑦ ᑭᒻᒥᓲᓲᕕᓃᑦ ᒥᑎᔦᑦ ᐊᓕᒍᐊᕐᑑᓗᐊᕐᐸᓂᕐᒪᑕ. ᐅᑯᐊ ᐅᓂᐊᕐᑐᑦ ᖃᒧᑎᐊᐲᓐᓂᒃ ᐅᓯᓪᓗᐊᔭᖏᑦᑑᓂᒃ, ᑕᑯᓂᐊᕐᓱᑎᒃ ᐃᓄᓐᓂᒃ ᓄᓇᕘᑉ ᓯᑦᔭᖓᓂᒥᐅᓂᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᑯᒍᓐᓇᑐᒍᑦ ᐱᐊᕋᕐᒥᒃ ᐅᑭᐅᕐᓯᐅᑎᒥᒃ ᐊᑕᔪᕐᓯᒪᔪᒥᒃ, ᐊᑕᔫᒃ ᐅᐃᒍᓕᐅᕐᑕᐅᒪᔫᒃ ᐳᐊᓘᓐᓂᒃ ᑲᒪᐊᐲᓐᓂᓗ ᒥᕐᓱᑕᐅᒪᔫᓐᓂᒃ.
ᑕᒪᖏᒃ ᐃᓄᐃᑦ ᐃᓚᒌᑦ ᖃᒧᑏᒃ ᓴᓂᐊᓃᑦᑐᑦ. ᑲᑐᑦᔨᓱᑎᒃ ᐸᕐᓀᖏᑦᔮᕆᔪᑦ ᐊᒻᒪᓗ ᐃᕐᓯᕕᒻᒥᒃ ᑐᐱᐅᑉ ᐃᓗᐊᓄᑦ ᐃᑎᕐᓯᓱᑎᒃ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᑯᓚᐅᑯᒻᒥᔭᑦᑎᓂᒃ ᐱᐊᕋᒋᐊᓪᓚᖃᕐᒥᔪᖅ ᐊᖓᔪᑦᓯᐅᒫᐱᑦᑐᒥᒃ ᑐᑦᑐᔭᓂᒃ ᐊᓐᓄᕌᕐᓯᒪᑦᓱᓂ. ᐅᑯᐊᑖᒐ ᐊᖑᑎᐅᑉ ᐃᕐᓂᖓᑕᓗ ᐅᑭᐅᕐᓯᐅᑎᐅᑦᓱᑎᒃ ᖁᓕᑦᑕᒋᒃ ᐊᑖᒋᒃ ᖃᑯᕐᑌᓇᐅᑦᓱᑎᒃ. ᖃᑕᓐᖑᑎᒥᓂᒃ ᓭᒨᓕᕐᑑᒃ ᑎᑭᕋᑖᕐᑐᓂᑦ ᓴᓂᑭᓗᐊᕐᒥᑦ. ᐃᓚᒌᓪᓚᕆᑦᑐᑦ; ᐃᓄᐃᑦ ᓴᓂᑭᓗᐊᕐᒥᐅᑦ ᑭᖑᕚᕆᔭᐅᕗᑦ ᐊᒥᓱᐃᓄᑦ ᐃᓚᒌᓄᑦ ᓄᓇᕕᐅᑉ ᑕᕐᕋᖓᑕ ᐅᐊᓐᓂᖓᓂᒥᐅᓄᑦ. ᓴᓂᑭᓗᐊᕐᒥᐅᑦ ᓇᓴᖏᑦ ᐊᑦᔨᒋᔭᐅᑦᔭᖏᑦᑐᑦ ᓄᕐᖃᑲᓪᓚᓲᒍᒐᒥᒃ ᐊᒪᐅᑎᐅᑉ ᓇᓴᖓᓄᑦ. ᐊᕐᓇᐅᑉ ᐊᒪᐅᑎᖓᑕ ᓇᓴᖓ ᑕᑯᓐᓇᑕᕗᑦ ᐃᓚᒋᔭᐅᔪᖅ ᐊᒪᐅᑎᐅᑉ ᐃᓗᑉᐱᐊᖓᓄᑦ. ᑌᒣᒻᒪᑦ ᓄᑕᕋᕐᒥᓂᒃ ᐊᒪᕈᓐᓇᑐᖅ ᓇᓴᖓᓅᑲᓪᓚᒍᓗᑐᐃᓐᓇᓗᒍ ᖁᓖᖓᓅᓂᐊᕐᒪᑦ. ᐅᖃᕋᑖᑫᓐᓇᒥᔪᖓ ᐊᒪᐅᑎᒥᒃ ᐊᒫᕐᕕᖃᓐᖏᑑᓂᕃᑦᓱᖓ, ᑭᓯᐊᓂ ᐅᓇ ᑕᑯᓐᓇᑐᐊᕈᕕᐅᒃ, ᑕᑯᒍᓐᓇᑐᑎᑦ ᓇᓴᑐᐊᖓ ᒪᕐᕈᐃᓕᕿᖓᓐᖏᒪᑦ. ᑕᓕᕐᐱᐊᓃᑦᑐᖅ ᐊᖏᔪᑲᓪᓚᒥᒃ ᑐᑦᑐᔭᐅᑦᓱᓂ ᓇᓴᓕᒃ. ᐊᖑᑎᒃ ᓴᓂᑭᓗᐊᕐᒥᐅᖅ ᒥᑎᒐᐅᑦᓱᓂ ᖁᓕᑦᑕᒥᓂ ᓇᓴᓕᐅᕐᑕᐅᒪᔪᖅ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᑕᑯᓚᐅᑯᒻᒥᔭᑦᑎᓂᒃ ᐱᐊᕋᒋᐊᓪᓚᖃᕐᒥᔪᖅ ᐊᖓᔪᑦᓯᐅᒫᐱᑦᑐᒥᒃ ᑐᑦᑐᔭᓂᒃ ᐊᓐᓄᕌᕐᓯᒪᑦᓱᓂ. ᐅᑯᐊᑖᒐ ᐊᖑᑎᐅᑉ ᐃᕐᓂᖓᑕᓗ ᐅᑭᐅᕐᓯᐅᑎᐅᑦᓱᑎᒃ ᖁᓕᑦᑕᒋᒃ ᐊᑖᒋᒃ ᖃᑯᕐᑌᓇᐅᑦᓱᑎᒃ. ᖃᑕᓐᖑᑎᒥᓂᒃ ᓭᒨᓕᕐᑑᒃ ᑎᑭᕋᑖᕐᑐᓂᑦ ᓴᓂᑭᓗᐊᕐᒥᑦ. ᐃᓚᒌᓪᓚᕆᑦᑐᑦ; ᐃᓄᐃᑦ ᓴᓂᑭᓗᐊᕐᒥᐅᑦ ᑭᖑᕚᕆᔭᐅᕗᑦ ᐊᒥᓱᐃᓄᑦ ᐃᓚᒌᓄᑦ ᓄᓇᕕᐅᑉ ᑕᕐᕋᖓᑕ ᐅᐊᓐᓂᖓᓂᒥᐅᓄᑦ. ᓴᓂᑭᓗᐊᕐᒥᐅᑦ ᓇᓴᖏᑦ ᐊᑦᔨᒋᔭᐅᑦᔭᖏᑦᑐᑦ ᓄᕐᖃᑲᓪᓚᓲᒍᒐᒥᒃ ᐊᒪᐅᑎᐅᑉ ᓇᓴᖓᓄᑦ. ᐊᕐᓇᐅᑉ ᐊᒪᐅᑎᖓᑕ ᓇᓴᖓ ᑕᑯᓐᓇᑕᕗᑦ ᐃᓚᒋᔭᐅᔪᖅ ᐊᒪᐅᑎᐅᑉ ᐃᓗᑉᐱᐊᖓᓄᑦ. ᑌᒣᒻᒪᑦ ᓄᑕᕋᕐᒥᓂᒃ ᐊᒪᕈᓐᓇᑐᖅ ᓇᓴᖓᓅᑲᓪᓚᒍᓗᑐᐃᓐᓇᓗᒍ ᖁᓖᖓᓅᓂᐊᕐᒪᑦ. ᐅᖃᕋᑖᑫᓐᓇᒥᔪᖓ ᐊᒪᐅᑎᒥᒃ ᐊᒫᕐᕕᖃᓐᖏᑑᓂᕃᑦᓱᖓ, ᑭᓯᐊᓂ ᐅᓇ ᑕᑯᓐᓇᑐᐊᕈᕕᐅᒃ, ᑕᑯᒍᓐᓇᑐᑎᑦ ᓇᓴᑐᐊᖓ ᒪᕐᕈᐃᓕᕿᖓᓐᖏᒪᑦ. ᑕᓕᕐᐱᐊᓃᑦᑐᖅ ᐊᖏᔪᑲᓪᓚᒥᒃ ᑐᑦᑐᔭᐅᑦᓱᓂ ᓇᓴᓕᒃ. ᐊᖑᑎᒃ ᓴᓂᑭᓗᐊᕐᒥᐅᖅ ᒥᑎᒐᐅᑦᓱᓂ ᖁᓕᑦᑕᒥᓂ ᓇᓴᓕᐅᕐᑕᐅᒪᔪᖅ.
ᒪᕐᕉᒃ ᐊᖑᑏᒃ ᖃᒧᑏᓐᓂᒃ ᓱᓇᑕᖃᕈᓐᓀᑑᓐᓂᒃ ᐊᑦᔭᓯᔫᒃ ᐳᓯᑦᑎᓱᒋᒃ ᐅᔭᕃᑦ ᐊᒻᒪᓗᑭᑕᐅᓗᖓᔪᑦ ᖄᖓᓅᕐᓱᒋᒃ ᑐᐱᐅᑉ ᓴᓂᖏᓐᓃᑐᓄᑦ ᐅᔭᕋᕐᓄᑦ.
ᑐᑭᒧᐊᕐᑎᓯᔨᐅᑉ ᐅᖄᔭᖏᑦ: ᐅᓯᒍᓗᐊᐱᒻᒥᓂᒃ ᓇᕿᑕᕇᑦᔮᕆᔪᑦ ᕿᓚᑦᓯᒪᑦᓯᐊᕋᑖᓂᒃ ᖃᒧᑎᐊᐱᖏᓐᓄᑦ. ᕿᐱᖃᕐᒥᔪᑦ, ᑕᒻᒪᖏᒃᑯᒪ, ᒥᑎᒐᐅᒻᒥᔪᓂᒃ. ᐃᒻᒪᖄᓪᓘᓃᑦ ᕿᒻᒥᓱᓐᓂᒃ. ᑕᒐ ᒫᓂ ᑕᑯᒍᓐᓇᑐᒍᑦ ᒪᒃᕉᓂᒃ ᐊᑰᓐᓂᒃ, ᓴᓂᑭᓗᐊᕐᒥᐅᓄᑦ ᐃᓗᑉᐱᐊᖃᓐᖏᑑᒃ, ᐊᕐᓇᐅᓗ ᐊᒪᐅᑎᖓᑕ ᓇᓴᖓᓂᒃ. ᑕᑯᒍᓐᓇᒥᔪᒍᑦ ᐱᐊᕋᐅᑉ ᐊᑕᔪᖓ ᑭᓪᓚᖃᕐᒪᑦ ᓇᓕᒃᑳᒥᒍᑦ ᐱᐊᕋ ᐊᖁᑉᐱᑐᐃᓐᓇᓗᓂ ᖁᐃᒐᓱᐊᖃᑦᑕᕋᔭᕐᒪᑦ.
ᖃᐅᔨᒋᐊᕐᕕᓴᖅ
![ᐊᕐᓀᑦ ᕿᑭᕐᑕᒥᐅᑦ ᐊᓐᓄᕌᕕᓂᖏᑦ, ᒥᑎᐅᑉ ᐊᒥᖏᑦ ᐊᕐᓇᖏᑦᑕ, ᕿᒻᒥᓱᒃ ᓇᓴᖓ, ᒪᒥᖓ [ᐃᐱᓗᓂ] ᓄᐃᑕᔪᓐᖑᐊᖅ, ᑭᓂᖓ ᕿᒻᒥᓱᒃ ᐊᑯᖓ ᕿᒻᒥᓱᒃ, ᖃᕐᓖᒃ ᓇᑦᓯᒐᕕᓃᒃ, ᐹᓗᒃ ᓇᑦᓯᒐᕕᓂᖅ, ᕿᒻᒥᓱᒃ ᐊᓕᕐᑎᒃ, ᑲᒥᒃ ᐅᑭᐅᕐᓯᐅᑎᒃ, ᐱᓂᕋᖅ ᕿᒻᒥᓱᒃ, ᒥᑎᕋ ᒥᑎᐅᑉ ᐊᒥᖓ, ᕿᒻᒥᓱᒃ ᐊᓕᕐᑎᒃ, ᐱᓂᕋᖅ ᐃᕕᒐᕐᓂᒃ ᐃᓗᐊᓕᒃ](https://s3.amazonaws.com/isuma.album.small/simiunie_weet.024.jpg)
ᑐᑭᒧᐊᕐᑎᓯᔨᐅᑉ
1. ᑐᑭᒧᐊᕐᑎᓯᔨᐅᑉ ᐅᖄᔭᖏᑦ [PDF 295.32kB]
ᐊᓪᓚᓯᒪᔪᑦ ᐅᖃᓕᓚᒫᕋᓱᐊᕐᓗᒋᑦ ᖃᕋᑕᐅᔭᒃᑯᑦ ᐱᑕᖃᕆᐊᓕᒃ Adobe Acrobat Reader